نۇر-سۇلتان قالاسىنىڭ اكىمى التاي كولگىنوۆ ەلوردانىڭ سپورت سالاسى وكىلدەرىمەن كەزدەسىپ, بىرقاتار ماسەلەنى تالقىلادى.
ەلوردا باسشىسى كەزدەسۋگە قالاداعى بالالار مەن ءجاسوسپىرىمدەر سپورت مەكتەپتەرىنىڭ, فەدەراتسيالاردىڭ, سپورت كەشەندەرى مەن مەكەمەلەردىڭ جەتەكشىلەرىنە, جاتتىقتىرۋشىلار مەن سپورتشىلارعا ارنايى شاقىرىلعانىن, سالاداعى وزەكتى ماسەلەلەردى تالقىلاۋعا, سارالاۋعا كەلگەنىن اتاپ ايتتى. ءوز كەزەگىندە قاتىسۋشىلار شەشىمىن كۇتكەن پروبلەمالاردى ورتاعا سالىپ, اكىمگە ءوز ۇسىنىستارى مەن وتىنىشتەرىن ءبىلدىردى.
اشىق اڭگىمە بارىسىندا بۇگىندە قالاداعى كوپتەگەن سپورت مەكەمەلەرى جاتتىعۋلار مەن جارىستاردى وتكىزۋ ءۇشىن زالدار مەن سپورت كەشەندەرىن جالعا الاتىنى ايتىلدى. ماسەلەن, «الاتاۋ» سپورت سارايىنا جۇزۋگە باراتىن سپورتشىلاردىڭ ايتۋىنشا, بۇل كەشەندە دۋشتىڭ جۇمىس ىستەمەيتىنى, باسسەيننىڭ جوندەۋدى قاجەت ەتەتىنى بەلگىلى بولدى. مۇندا مۇگەدەك سپورتشىلار ءۇشىن جاعداي جاسالماعان, ليفت ىستەمەيدى. ال «بارىس ارەناداعى» ءجۇزۋ باسسەينىنىڭ باعاسى وتە قىمبات دەيدى وسى سالانىڭ ماماندارى.
«قالانىڭ حالقى ميلليوننان اسىپ كەتتى, بىراق بالالار مەن جاسوسپىرىمدەر سپورت مەكتەپتەرى سول قالپىندا, تىپتەن قىسقاردى دەپ تە ايتۋعا بولادى. ال سپورت كەشەندەرىن جالعا الۋ ءۇشىن ۇلكەن قاراجات كەرەك. قالادا ساداق اتۋ سپورتىنىڭ بازاسى جوق. وتە ىڭعايسىز, اۋماعى كەلمەيتىن زالدا جاتتىعۋعا ءماجبۇر. نەگىزىنەن, جالعا الىپ جاتتىعادى. سولاي بولعانىمەن, قالا اتىنان جارىسقا قاتىسۋشىلار قازاقستاننىڭ, ازيانىڭ چەمپيوندارى بولعان» دەدى نۇر-سۇلتان قالاسى ترياتلون فەدەراتسياسىنىڭ باس حاتشىسى سايات باتپەنوۆ.
وسى ماسەلەگە وراي اكىم پارامەترى كەلەتىن سپورت كەشەنىن ىزدەستىرۋدى تاپسىردى. بىرقاتار فەدەراتسيالاردىڭ جەتەكشىلەرى ەگەر جەر ماسەلەسى شەشىلسە, وزدەرى سپورت كەشەنىن سالىپ الۋعا مۇمكىندىكتەرى بار ەكەنىن ايتتى. قالا باسشىسى وسى رەتتە فەدەراتسيالاردىڭ وزدەرىن بەلسەندى بولۋعا شاقىرىپ, قۇرىلىس جۇرگىزۋگە قولداۋ بىلدىرەتىنىن جەتكىزدى.
– نۇر-سۇلتان ەلىمىزدىڭ باس قالاسى بولعاندىقتان, قاي سالادا بولماسىن الدىڭعى قاتاردان كورىنۋى ءتيىس دەپ ويلايمىن. بۇل رەتتە سپورت سالاسىنىڭ الار ورنى ايرىقشا ەكەنى ءسوزسىز. ءبىز اكىمدىك تاراپىنان جان-جاقتى قولداۋ بىلدىرۋگە دايىنبىز. بۇگىن سىزدەردەن 16 ۇسىنىس-ءوتىنىشتى ەستىدىم. بارلىق جاعدايدى جان-جاقتى قارايتىن بولامىز, – دەدى ا.كولگىنوۆ.
جيىن بارىسىندا وليمپيادا ويىندارىنىڭ جۇلدەگەرى, بوكسشى مارينا ۆولنوۆا قالا باسشىسىنا سپورتشىلارعا قولداۋ بىلدىرگەنى ءۇشىن بىلعارى قولعاپ سىيلادى.
«نۇر-سۇلتان قالاسىنا جاقىن ارادا نادال مەن دجوكوۆيچتىڭ كەلەتىنى, كۇرەستەن الەم چەمپيوناتىنىڭ ءوتۋى قالا تۇرعىندارى, اسىرەسە, جاستار مەن بالالار ءۇشىن ۇلكەن وقيعا بولماق. بۇل شارالار كوپتەگەن ادامداردىڭ سپورتقا دەگەن ىقىلاسىن ارتتىرادى دەپ ويلايمىن. ءوز سپورتشىلارىمىزعا قولداۋ بىلدىرەيىك. ال بۇگىن كوتەرىلگەن ماسەلەلەر بويىنشا جۇيەلى جۇمىستار جۇرگىزىلىپ, شەشىمدەر قابىلداناتىن بولادى» دەپ تۇيىندەدى سپورت وكىلدەرىمەن وتكەن كەزدەسۋدى قالا باسشىسى. 
