شاڭعى جارىسىنان الەمدىك دەڭگەيدە تالاي مارتە جۇلدەگەر اتانعان بۇل اۋلەتتىڭ ۇلكەنى يۋري ستروستين سپورتتىڭ وسى تۇرىنەن قالالىق كوماندانىڭ اعا جاتتىقتىرۋشىسى. سپورتقا كەزدەيسوق كەلگەن ونىڭ اكەسى كەزىندە اسكەري وفيتسەر بولسا كەرەك. ۇلى وتان سوعىسىنا قاتىسقان ميحايل ستاروستين سول كەزدە قالىپتاسقان ادەتىمەن بالالارىنىڭ تاربيەسىنە كەلگەندە تىم قاتال بولىپتى.
– اكەم ءبىزدىڭ سپورتشى بولعانىمىزدى باستى ماقسات تۇتپاعان. ول ءۇشىن ءبىزدىڭ دەنىمىزدىڭ ساۋ, كەز كەلگەن قيىندىققا توتەپ بەرە الاتىن مىقتى, شىنىققان شىمىر ازاماتتار بولىپ ءوسۋىمىز ماڭىزدىراق بولاتىن. ءدال وسىنداي تارتىپپەن وسكەن سپورتتى ومىرىمىزگە سەرىك ەتىپ, سالاۋاتتى ءومىر سالتىن ۇستاندىق. قىستىڭ كۇنگى سۋىقتارعا قاراماي, قارىنداسىم ەكەۋمىز تاڭسارىدەن سۋىق سۋمەن جۋىنىپ, كۇن سايىن جاتتىعۋ جاساۋعا داعدىلاندىق. مەن ءبىر جىلداي ەگىس دالاسىندا تراكتورشى, كەيىن كومباينشى بولىپ ەڭبەك ەتتىم. دالا توسىندە, ەگىس القابىندا ەل يگىلىگى ءۇشىن تەر توگۋدىڭ راحاتىن سەزىندىم. ارينە, مەن ءۇشىن بۇل ءبىر ەرەكشە كەزدەر بولاتىن. سودان تسەلينوگرادتاعى اۋىلشارۋاشىلىعى ينستيتۋتىنا وقۋعا ءتۇسىپ, جوعارى ءبىلىم الدىم. سول كەزدە دە كىشكەنتايىمنان بويىما سىڭگەن قاسيەتتەن ارىلا المادىم. ينستيتۋتتا ۇيىمداستىرىلاتىن سپورتتىق شارالارعا بەلسەنە قاتىسىپ, قولىم قالت ەتسە, جاتتىعۋ جاساۋمەن, ءوزىمدى-ءوزىم شىنىقتىرۋمەن اينالىستىم. ۋاقىت وتە كەلە مەن اۋىل شارۋاشىلىعىن ەمەس, كەڭ جازىق دالانى, اينالامىزدى قورشاعان تابيعاتتى سۇيەتىنىمدى ءتۇسىندىم. ءسويتىپ, ماماندىعىمنان ءبىرجولا قول ءۇزىپ, سپورتقا دەن قويدىم. مەنى ومىرلىك جولداسىممەن تابىستىرعان دا – سپورت, – دەيدى يۋري ميحايلوۆيچ.
بۇگىندە ونىڭ شاكىرتتەرى ەلىمىزدى الەمگە ايگىلەپ جۇرگەن اتاقشى سپورتشىلار قاتارىن تولىقتىرۋدا. جۇبايى مارگاريتا دا 15 جاسىنان سپورتپەن اينالىسقان, مىقتى سپورتشى.
يۋري مەن مارگاريتا ستاروستيندەردىڭ بالالارى داريا مەن مارك شاڭعى جارىسىنان وتكەن الەم بىرىنشىلىكتەرىندە بىرنەشە دۇركىن جۇلدەگەر اتانىپ, اتا-اناسىنىڭ عانا ەمەس, ەلىنىڭ مەرەيىن اسقاقتاتىپ ءجۇر. ەڭ باستىسى, بالالار سپورتتى ءاۋ باستا-اق ءوز جۇرەك قالاۋلارىمەن تاڭداپ العان كورىنەدى. سوندىقتان دا, ولار ءار جارىسقا شىن ىقىلاسىمەن, بويىنداعىنىڭ ءبارىن سالىپ بەرىلە دايىندالادى. سەبەبى, بۇل – بالالاردىڭ ءومىر سالتى.
سپورتشى ستاروستيندەر اۋلەتىندەگىلەردىڭ باسى ۇنەمى بىرگە قوسىلا بەرمەيدى. ءبىرى ۇيدە بولسا, ەكىنشىسى جارىستا, ءۇشىنشىسى جاتتىقتىرۋدا جۇرەتىن ولار جىل سايىن تەك جاڭا جىل مەرەكەسىندە عانا ءبىر داستارحان باسىنا جينالۋدى داستۇرگە اينالدىرعان.
قوشتاساردا كەيىپكەرىم يۋري ميحايلوۆيچ وتباسىنىڭ تاعى ءبىر قۇپياسىن اشىپ بەردى: ول اكەسى ۇيلەنگەن كۇنى وتاۋ قۇرعان ەكەن. ونىڭ اكەسى دە ءدال سول كۇنى شاڭىراق كوتەرىپتى. ەندى ماركتىڭ دە وتباسىلىق وسى ءۇردىستى جالعاستىرىپ, اتا-اناسىنا ءالى تالاي قۋانىش سىيلايتىنا سەنىمىمىز مول.
گۇلبارشىن وكەشقىزى
