استانا اكىمى ادىلبەك جاقسىبەكوۆ «جاڭا بەلەس – 2015» اتتى ستۋدەنت قاتارىنا قابىلداۋ سالتاناتىنا قاتىستى. مەرەكەلىك ءىس-شاراعا ەلوردامىزداعى بارلىق جوو-نىڭ بىرىنشى كۋرس ستۋدەنتتەرى كەلدى. بيىل قالامىزداعى جوعارى وقۋ ورىندارىنا ءبىلىم بايگەسىندە اينالاسىنان ات وزدىرعان 12208 جەتكىنشەك قابىلدانىپتى.
ونىڭ 6004-ءى – وزگە وڭىرلەردىڭ وكىلدەرى. ەل ەرتەڭى سانالاتىن بولاشاق ماماندار قاتارىنا ورەلى ورەندەردىڭ قوسىلۋى, ارينە, جاقسىلىقتىڭ بەلگىسى. ەندىگى جەردە ولاردىڭ اۋديتوريالاردا ءدارىس تىڭداۋمەن عانا شەكتەلىپ قالماي, باس شاھاردىڭ الەۋمەتتىك-مادەني ومىرىنە بەلسەنە ارالاسۋىنا, ءارتۇرلى ۋنيۆەرسيتەتتەردەگى ارىپتەستەرىمەن دوستىق قارىم-قاتىناس ورناتۋىنا ىقپال ەتۋدىڭ ماڭىزى وتە زور.
ءبىرىنشى كۋرستىقتاردى قۇتتىقتاعان ءا.جاقسىبەكوۆ ءبىزدىڭ ەلىمىزدە تالابى بار جاستاردىڭ ساپالى ءبىلىم الۋلارىنا جان-جاقتى جاعداي جاسالعانىن اتاپ ءوتتى.
– ەلباسىنىڭ سارابدال ساياساتى ارقاسىندا مەملەكەتىمىزدە وسكەلەڭ ۇرپاقتىڭ قالاعان ماماندىعىن مەڭگەرۋلەرىنە مول مۇمكىندىك تۋعىزىلعان. ال, ءبىزدىڭ قالامىز ءىلىم-ءبىلىمنىڭ ورتالىعىنا اينالعالى قاشان. استانادا جاقسى وقىپ قانا قويماي, قوعامدىق-ساياسي, مادەني-رۋحاني ۋاقيعالاردىڭ قايناعان ورتاسىندا جۇرۋگە بولادى. سوندىقتان الداعى ۋاقىتتا ديپلوم العاندا سىزدەردىڭ سۇيىكتى قالامىزدى كوركەيتۋگە, ەلىمىزدى وركەندەتۋگە قوماقتى ۇلەس قوساتىندارىڭىزعا سەنىمىم مول. ءبارىڭىزدى قۇتتىقتاي وتىرىپ, ارقايسىلارىڭىزعا باياندى باقىت, تولايىم تابىستار تىلەيمىن, –دەپ ءسوزىن تۇيىندەدى ول.
سالتاناتتى ءراسىم اياسىندا ەلورداداعى جوو بەلسەندىلەرىنىڭ شەرۋى ءوتتى. وعان قاتىسۋشىلاردى ىرىكتەۋ كەزىندە شاكىرتتەردىڭ قوعامدىق قارەكەتشىلدىگى مەن عىلىمي جوبالارعا اتسالىسۋىنا ايرىقشا نازار اۋدارىلدى.
قالاباسى ءا.جاقسىبەكوۆ ستۋدەنتتىك بيلەتتى ءبىرىنشى بولىپ ل.ن.گۋميلەۆ اتىنداعى ەۇۋ ماقتانىشتارىنىڭ ءبىرى, جامبىل وقۋلارىنىڭ ۇزدىگى, اعىلشىن ءتىلى بويىنشا رەسپۋبليكالىق عىلىمي جوبالار بايقاۋىنىڭ جەڭىمپازى, ماتەماتيكا جانە حيميا پاندەرىنەن وليمپيادا جۇلدەگەرى, «التىن بەلگى» يەگەرى ادىلەت شىمباەۆ پەن نازارباەۆ ۋنيۆەرسيتەتىنىڭ ۇكىلەگەن ءۇمىتى, ماتەماتيكادان حالىقارالىق وليمپيادانىڭ كۇمىس مەدال يەگەرى, نازارباەۆ ۋنيۆەرسيتەتى امەريكا حيميالىق ينجەنەرلەر ينستيتۋتى ستۋدەنتتەر سەكتسياسىنىڭ باسقارما مۇشەسى التىن جالامباەۆاعا تاپسىردى.
– ەڭ الدىمەن قۇربى-قۇرداستارىمدى بۇگىنگى حالىقارالىق ستۋدەنتتەر كۇنىمەن قۇتتىقتايمىن. استانا قالاسى اكىمدىگىنىڭ قولداۋىمەن ۇيىمداستىرىلعان بۇل ءىس-شارادان العان اسەرىمىز ۇشان-تەڭىز. ويتكەنى, جان-جاقتان جينالعان قىز-جىگىتتەر اراسىنان وزدەرىمىزگە جاڭا دوستار تاپتىق. ارمان-اڭسارلارىمىزدى ايتىسىپ, جارقىن كەلەشەگىمىز جايىنداعى ويلارىمىزدى ورتاعا سالدىق. ولاردى جۇزەگە اسىرۋ جولىندا ءبىر-بىرىمىزگە دەمەۋ بولامىز دەگەن ۇمىتتەمىز, – دەدى ءا.شىمباەۆا.
ءبىرىنشى كۋرستىقتاردىڭ ءداستۇرلى ءۆالسى بۇگىنگى زامانعى بيلەرگە ۇلاستى. ەلىمىزدىڭ بەلگىلى ونەر ۇجىمدارى مەرەكە كورىگىن ودان ءارى قىزدىردى.
