نۇر-سۇلتان قالاسىنىڭ اكىمى التاي كولگىنوۆ جاڭبىر كەزىندە سۋ باسىپ قالاتىن كوشەلەردىڭ پروبلەماسى قالاي شەشىلىپ جاتقانىن ءمالىم ەتتى.
«وتكەن اپتالاردا ادەتتەگىدەي ازاماتتاردى جەكە قابىلدادىم. وسىعان دەيىن ايتقانىمداي, ءبىز پروبلەمالاردى شەشۋ ىسىنە تەك دالمە-ءدال عانا ەمەس, سول سياقتى جۇيەلى دەڭگەيدە دە قاراۋعا تىرىسامىز. ازاماتتاردى قابىلداۋ كەزىندە, قالا تۇرعىندارىمەن كەزدەسۋ بارىسىندا كوتەرىلگەن ماسەلەلەردى نەگىزگە الدىق. ناتيجەسىندە ينفراقۇرىلىمدىق دامۋ جوسپارى مەن حالىقتىڭ جىل سايىنعى ءوسۋىن, ەلوردا جولدارىنا تۇسەتىن ترافيكتىڭ ۇلعايعانىن ەسكەرە وتىرىپ, 10 جانە ودان دا كوپ جىلعا ارنالعان قالالىق كولىكتىڭ بىرىڭعاي تەحنيكالىق پايىمىن ازىرلەۋگە ارنالعان كەشەندى كولىك سحەماسىنىڭ (كقت) تۇجىرىمداماسىن قابىلدادىق.
جوسپار مەن تۇجىرىمدامانى قالالىق ءماسليحات قولدادى.
نوسەر كارىزىن سالۋ بويىنشا جۇرگىزىلىپ جاتقان جۇمىستارعا تولىعىراق توقتالىپ وتكىم كەلەدى.
ماسەلەن, وتكەن جىلدىڭ وزىندە ءبىز 130 كم-دەن استام نوسەر كارىزى مەن ارىق-ناۋا جۇيەسىن سالدىق, سونداي-اق 146 پروبلەمالى ۋچاسكەدە سۋ باسۋ ماسەلەسى شەشىلدى.
قالانىڭ ەڭ پروبلەمالى تۇستارىنىڭ ءبىرى – ب.مومىشۇلى داڭعىلىندا سۋ باسۋ پروبلەماسى شەشىلدى. توقتاۋسىز جاۋعان جاۋىن كەزىندە كولىكتەردىڭ بەلشەسىنەن سۋعا باتاتىنى, سول سياقتى ۇرلەمەلى قايىقتار ارقىلى جۇرتتىڭ نازارىن اۋدارعانى ەستەرىڭىزدە بولار. اتالمىش داڭعىلعا نوسەر كارىزىنىڭ ماگيسترالدى كوللەكتورىن سالدىق. بۇل كارىزدىڭ ۇزىندىعى 500 مەتردى قۇرايدى – باسى داۋىلپاز كوشەسىنەن باستالىپ, ەلىم-اي كوشەسىنە دەيىن (ب.مومىشۇلى داڭعىلىن قيىپ وتەدى) جالعاسادى. جاڭا ورىن قولدانىستاعى نوسەر كارىزى جەلىسىنىڭ وتكىزۋ قابىلەتىن 1,5 ەسە ارتتىرۋعا مۇمكىندىك بەردى.
سونىمەن قاتار, جاستار شاعىن اۋدانىندا (تاشەنوۆ پەن اممان كوشەلەرىنىڭ قيىلىسى) جەتكىزۋشى كوللەكتورلاردى قايتا جاڭعىرتۋ ارقىلى تازارتۋ قۇرىلىسى سالىندى. جاڭا نىسانداردىڭ قۋاتى تاۋلىگىنە 42 مىڭ تەكشە مەتردەن اسادى. اتالعان نىسان تاشەنوۆ, باراەۆ, ءۋاليحانوۆ, پۋشكين, يمانباەۆ كوشەلەرىندە, رەسپۋبليكا داڭعىلىنىڭ جوعارعى بولىگىندە, تاۋەلسىزدىك داڭعىلىندا سۋ باسۋ ماسەلەسىن شەشۋگە مۇمكىندىك بەردى. تازارتۋ عيماراتىنىڭ ەرەكشەلىگى – ەسىل وزەنىنە قۇيىلار الدىندا جاڭبىر مەن ەرىگەن قار سۋى سۇزگىدەن ءوتىپ, تازارتىلادى.
تەلمان ەلدى مەكەنىندە تازارتۋ قۇرىلىسى مەن ماگيسترالدىق كوللەكتور, سول سياقتى پريگورودنىي ەلدى مەكەنىندە جانە الاش تاس جولى بويىنداعى لوگيستيكالىق ورتالىق اۋماعىندا تازارتۋ قۇرىلىسى سالىندى.
سونداي-اق 2019 جىلى مىڭجىلدىق اللەياسى اۋدانىنداعى 2 ۋچاسكەدە نوسەر كارىزى ماسەلەسى شەشىلگەن بولاتىن.
الماتى اۋدانىندا (ش.قالداياقوۆ كوشەسى), جاڭا ۆوكزال, ۇلى دالا داڭعىلى بويىندا جانە ت.ب. تۇستاردا نوسەر كارىزىنىڭ قۇرىلىسىن جۇرگىزىپ جاتىرمىز. نوسەر كارىزدەرى مەن تازارتۋ عيماراتىنىڭ قۇرىلىسى مەن قۋاتىن ۇلعايتۋ بويىنشا جۇمىستار جۇيەلى دەڭگەيدە جۇرگىزىلىپ جاتىر» دەدى ەلوردا اكىمى.
