كوكتەممەن بىرگە كەلەتىن سۋ تاسقىنى ماسەلەسى بۇل جىلى دا بوي كوتەرىپ وتىر. بيىلعى قاردىڭ جىلداعىدان ەسەلەپ جاۋعانىن ەسكەرگەن قالا باسشىلىعى قارقىندى جۇمىسىن وتكەن جىلدىڭ قازانىنان باستادى. جۇيەلى جۇمىستىڭ ناتيجەسىندە وسى كۇنگە دەيىن كوممۋنالدىق قىزمەت جۇيەسى 5 409 066,76 تەكشە مەتر قار شىعاردى.
ال كۇنى كەشەگى نوسەردەن كەيىن اۋماقتاعى ەرىگەن قاردىڭ سۋىن سورعىتۋعا 138 ارنايى تەحنيكا جۇمىلدىرىلدى. استانا قالاسى اكىمىنىڭ ورىنباسارى قوسمان ايتمۇحامەتوۆ قاۋىپتى دەگەن شەتكى ايماقتاردى ارنايى ارالاپ, جۇمىس بارىسىن باقىلادى.
اسىرەسە, «كوكتال-2» تۇرعىن الابى مەن «وڭتۇستىك شىعىس» شاعىن اۋداندارىندا كوبىرەك ورىن الىپ وتىرعان ماسەلەنىڭ ءمان-جايىمەن تانىسقان قوسمان قايىرتايۇلىنىڭ ايتۋىنشا, جەكەمەنشىك ءۇي اۋلالارىنىڭ قارى تازارتىلىپ, رەتكە كەلتىرىلۋ جولىندا جۇمىستار از جۇرگىزىلمەگەن. تۇرعىندارعا اۋلاداعى قاردى اكىمدىكتىڭ ارنايى تەحنيكالارى تازارتاتىن ۋاقىتىن حابارلاپ, كوشەگە شىعارۋىن بىرنەشە رەت حابارلاعان. بۇعان قۇلىقسىزدىق تانىتقان كەيبىر تۇرعىنداردىڭ جاۋاپسىزدىعى دا وسىنداي ماسەلەنىڭ تۋىنداۋىنا اكەپ سوعۋدا.
2014 جىلى – 3,2 ملن توننا, 2015 جىلى – 3,4 ملن توننا, ال 2016 جىلى 2,9 ملن توننا قار شىعارىلعانىن ەسكەرسەك, بيىلعى جۇمىستىڭ قارقىنى جىلداعىدان ەكى ەسەگە ارتقانىن اڭعارامىز. سوعان قاراماستان قار كۇرەۋ جانە سۋ سورعىتۋ جۇمىستارى سايابىرسىپ تۇرعان جوق. جالپى مەحانيكالاندىرىلعان جۇمىستارعا 3 مىڭعا جۋىق ارنايى تەحنيكا تارتىلدى.
بۇگىندە تاسقىنعا قارسى ارناۋلى جۇمىس توبى قارقىندى جۇمىس جۇرگىزۋدە. اسىرەسە, استانانىڭ سۋ باسۋ قاۋپى بار 37 ۋچاسكەسى ەرەكشە نازاردا. «كەمەل» تەحنيكاسىن قولدانا وتىرىپ نوسەر كارىزى جەلىلەرىن تازارتۋ جۇمىستارى بەلسەندى جۇرگىزىلۋدە. ينەرتتىك ماتەريالداردان 4 مىڭ تەكشە مەتر ءىرى قۇم, 2 مىڭ تەكشە مەتر قۇم ارنايى دايىندالدى.
سۋ تاسقىنىنا قارسى شارالارعا كەتەتىن شىعىنداردى جابۋعا قالا اكىمدىگىنەن 1,4 ملرد تەڭگە قاراستىرىلعان. وتكەن جىلدىڭ قاراشاسىنان بەرگى قاردى ەسەپتەگەندە 117,6 مم قار جاۋعان. وسى سەبەپتى قالانىڭ كوممۋنالدىق قۇرىلىمدارى جۇمىسىن كۇشەيتىپ, جەدەل ىسكە كىرىستى.
«كوكتال-2» كەنتىنىڭ تۇرعىنى ايدوس بەيسەباەۆتىڭ ايتۋىنشا, تۇرعىنداردىڭ ءوزى جەرگىلىكتى اكىمدىك تاراپىنان جۇرگىزىلگەن حابارلاندىرۋ شارالارىنا ءمان بەرمەگەن, كوڭىل اۋدارماعان.
– تۇرعىنداردىڭ دەنى تاڭەرتەڭنەن كەشكە دەيىن جۇمىستا. مۇمكىندىكتەرى بولماعان بولار. مەنىڭ بىلۋىمشە, كوبىسى اۋلاداعى قاردى كوشەگە شىعارىپ تاستاۋدان قورىقتى. ايىپپۇل سالىنادى دەپ ويلادى. مىنە, وسى سەبەپتى اۋلاداعى قار ەندى ۇلكەن ماسەلە تۋدىرىپ وتىر, – دەيدى ول.
قالا بويىنشا تاۋلىك بويى 1000-عا جۋىق تەحنيكا توقتاۋسىز جۇمىس ىستەيدى. قالانى سۋدان سورعىتۋ جۇمىستارى ءساۋىردىڭ اياعىنا دەيىن جالعاسۋى مۇمكىن. ەرىگەن قار سۋىن تارتىپ شىعارۋعا سورعىشتار, تراكتورلار جانە باسقا دا ارناۋلى تەحنيكالار ىسكە قوسىلدى. بۇعان قوسا, تۇرعىنداردىڭ ءوتىنىشىن قابىلدايتىن ديسپەتچەرلىك قىزمەت قۇرىلدى.
قوسمان ايتمۇحامەتوۆ, استانا قالاسى اكىمىنىڭ ورىنباسارى: – مىنە, قار كۇرت ەرىپ, جايسىزدىق تۋىنداعان ساتتە تۇرعىندار كوشە بەتكە قالاي بولسا, سولاي قاردى اكەلىپ تاستاۋدا. بۇل دا بولسا سۋ تاسقىنىنىڭ ورىن الۋىنا ءوز اسەرىن تيگىزۋدە. سوندىقتان, جىلدا مۇنداي ماسەلە ورىن الاتىن بولعاندىقتان, تۇرعىندار دا بۇعان اسقان جاۋاپكەرشىلىكپەن قاراسا دەيمىز. ءبىز سوعىس ارداگەرلەرى مەن الەۋمەتتىك كومەككە مۇقتاج وتباسىلاردىڭ اۋلالارىنا قولىمىزدان كەلگەنشە كومەك كورسەتىپ, قاردىڭ شىعارىلۋىن قاداعالايمىز. الايدا باسقا تۇرعىندار وزدەرى بۇعان سالعىرت قاراماۋلارى كەرەك.
گۇلجان راحمان,
«استانا اقشامى»
