مەملەكەت باسشىسى ءوز جولداۋىندا جاڭا سۋديالاردى ىرىكتەۋ پروتسەسىن جاريا جانە ءارى اشىق ەتۋدى تاپسىردى. بۇگىندە سۋديالار كورپۋسىن قالىپتاستىرۋ راسىمىنە ازاماتتار مەن قوعامدىق بىرلەستىكتەردىڭ وكىلدەرى تارتىلعانىن كوپشىلىك قاۋىم بىلە بەرمەيدى.
سۋديالاردى ىرىكتەۋدىڭ نەگىزگى كەزەڭدەرىنىڭ ءبىرى ءاربىر وبلىستىق جانە وعان تەڭەستىرىلگەن سوت جانىندا جۇمىس ىستەيتىن كەڭەستىڭ وڭ قورىتىندىسىن الۋ بولىپ تابىلادى.
سوتتارمەن ءوزارا ءىس-قيمىل جاساۋ جونىندەگى كەڭەسكە وتستاۆكاداعى سۋديالار, زاڭ قوعامداستىعىنىڭ, بۇقارالىق اقپارات قۇرالدارىنىڭ, كاسىپوداقتاردىڭ, قوعامدىق بىرلەستىكتەردىڭ, كوممەرتسيالىق ەمەس ۇيىمداردىڭ وكىلدەرى, سونداي-اق ارداگەرلەر مەن قوعام قايراتكەرلەرى كىرەدى.
كانديدات كونكۋرسقا قاتىسۋعا ارىز بەرگەننەن كەيىن كەڭەس كانديداتتىڭ جەكە باسىن زەردەلەۋ جونىندەگى ءوز جۇمىسىن باستايدى. بۇل ءۇشىن قۇزىرەتتى ورگاندار مەن ۇيىمداردان كانديداتتى سيپاتتايتىن ءتيىستى ماتەريالدار جانە ونىڭ مورالدىق-ادامگەرشىلىك بەينەسىن ايقىنداۋعا مۇمكىندىك بەرەتىن وزگە دە اقپاراتتار سۇراتىلادى. بۇدان باسقا, كەڭەس وتىرىسىندا ۇمىتكەرگە قاتىستى ارىزدار, شاعىمدار قارالادى.
ماتەريالداردى زەردەلەۋ جانە ولاردى وتىرىستا قاراۋ قورىتىندىلارى بويىنشا كەڭەس داۋىس بەرۋ ارقىلى كانديداتتىڭ مورالدىق-ادامگەرشىلىك قاسيەتتەرىن وڭ نەمەسە تەرىس باعالاۋ تۋرالى دالەلدى قورىتىندى شىعارادى.
بۇگىنگى كۇنى تاجىريبە كورسەتكەندەي, ەلوردالىق سوت سۋدياسىنىڭ بوس لاۋازىمىنا ورنالاسۋعا ۇمىتكەرلەر جىل سايىن ارتىپ كەلەدى. وسىعان بايلانىستى, نۇر-سۇلتان قالاسىنىڭ سوتى جانىنداعى سوتتارمەن ءوزارا ءىس-قيمىل جاساۋ جونىندەگى كەڭەسكە ۇلكەن جۇكتەمە تۇسەتىنى ايدان انىق. كەڭەستىڭ قورىتىندىسى كونكۋرس كەزەڭدەرىنەن ءوتۋ كەزىندە ەسكەرىلەتىندىكتەن, كەڭەس ءاربىر كانديداتقا قاتىستى ماتەريالداردى مۇقيات زەردەلەيدى.
كەڭەس جۇمىسى سۋديالار كورپۋسىنىڭ ساپالى قالىپتاسۋىنا ىقپال ەتەدى. ستاتيستيكاعا كوز جۇگىرتسەك, 2021 جىلى كەڭەستىڭ 7 وتىرىسى وتكىزىلدى. 118 ۇمىتكەرگە قاتىستى ماتەريالدار قارالدى. 110 كانديدات وڭ, 8 ادام تەرىس قورىتىندى الدى.
2022 جىلدىڭ باسىنان بەرى وتكىزىلگەن 5 وتىرىستىڭ قورىتىندىسى بويىنشا سۋديالىققا ارىز تاپسىرعان 76 كانديداتقا قاتىستى ماتەريالدار قارالدى. ونىڭ 64-ءى وڭ, 12-ءسى تەرىس قورىتىندى العانىن ايتۋىمىز قاجەت.
بوتاگوز بايانوۆا,
نۇر-سۇلتان قالاسى سوتىنىڭ
باسپاسوز حاتشىسى
