ءۇش ايدان بەرى سايراگۇل ساۋىتبايدىڭ تاعدىرىنا الاڭداعان جۇرت سوتتىڭ سوڭعى وتىرىسىنا دەيىن وڭ شەشىم شىعاتىنىنا ۇمىتتەندى. ءساۋىر ايىندا تاريحي اتامەكەنى – قازاقستانعا كەلۋ ماقساتىندا قازاق–قىتاي شەكاراسىن امالسىزدان زاڭسىز كەسىپ وتۋگە ءماجبۇر بولعان انانىڭ اق تىلەگى قابىل بولدى. سوت سايراگۇل ساۋىتبايعا التى اي مەرزىمگە باس بوستاندىعىنان ايىرۋ تۋرالى شارتتى جازا تاعايىندادى. سايراگۇل تاعدىرىنان ءبىزدىڭ گازەت تە تىسقارى قالماي, بىرنەشە ماقالا ارناعان بولاتىن.
سوت وتىرىسىندا الماتى وبلىسى جاركەنت كەنتىندەگى پانفيلوۆ اۋداندىق سوتىنىڭ سۋدياسى دينارا قۇيقاباەۆا قىتاي قازاعى سايراگۇل ساۋىتبايدى قازاقستاندا قالدىرۋ تۋرالى شەشىمىن جاريالادى. ناقتى ايتقاندا, «قازاقستان قىلمىستىق كودەكسىنىڭ 392-بابى 1-تارماعى بويىنشا سايراگۇل ساۋىتبايدى كىنالى دەپ تاۋىپ, 6 ايعا باس بوستاندىعىنان ايىرۋ تۋرالى شارتتى جازا تاعايىندالسىن. 6 اي مەرزىم پروباتسيالىق باقىلاۋ مەرزىمى تاعايىندالسىن. سوت زالىنان بوساتىلسىن» دەپ مالىمدەدى. بەلگىلى بولعانداي, ساۋىتبايدىڭ قىلمىسى «ونشا اۋىر ەمەس» دەپ باعالاندى. سوت شەشىم شىعاراردا بۇۇ-نىڭ بالالار قۇقىعى كونۆەنتسياسى نەگىزگە الىنعانى, ساۋىتبايدى كامەلەتتىك جاسقا تولماعان ەكى بالاسىنان, وتباسىنان اجىراتپاۋ ءۇشىن وسىنداي شەشىم شىعارىلعانى تۋرالى ايتىلدى. ەتنيكالىق قازاق رەتىندە, قازاقستان ازاماتتىعىن الۋعا قۇقىعى بار تۇلعا رەتىندە ونى قازاقستاننان شىعارىپ جىبەرۋ جازاسى تاعايىندالمايتىنىن ايتقاندا, جينالعان كوپشىلىكتىڭ
قۋانىشىندا شەك بولمادى. وسىلايشا, سوت شەشىمىمەن سايراگۇل ساۋىتباي سوت زالىنان بوساتىلدى.
قوعامدىق رەزونانس تۋدىرعان سايراگۇل ساۋىتبايدىڭ ىسىنە قوعام بەلسەندىلەرى مەن تانىمال تۇلعالار ءبىر كىسىدەي اتسالىسقانى بەلگىلى. الەۋمەتتىك جەلىدە قولداۋشىلار توبى قالىڭ بولدى. ونىڭ سوتىنا وتاندىق باق قۇرالدارىنان بولەك, الەمدىك باق-تان «The Wall Street Journal», «New York Times», «The Washington Post» باسىلىمدارى مەن «France-Presse» اگەنتتىگىنىڭ وكىلدەرى كەلدى.
سوت زالىنان بوساپ شىققان سايراگۇل ساۋىتباي «مەن حالقىما, ەلىمە سەنىپ كەلدىم. پانا ىزدەدىم. بار ەكەنسىزدەر. اللا وسىنداي بىرلىگىمىزدەن ايىرماسىن. قيىن-قىستاۋ كەزدە سۇرىنگەن ءبىر قازاققا سۇيەۋ بولعاندارىڭىز ءۇشىن, بار بولعاندارىڭىز ءۇشىن زور العىس ايتامىن» دەپ جينالعان جۇرتقا ريزاشىلىعىن ءبىلدىردى.
جارايسىزدار, ازاماتتار! بۇل – قازاقتىڭ باسىن بىرىكتىرگەن سوت بولدى. بيلىك قازاقتىڭ ىرگەسىن اجىراتۋعا قۇشتار بولسا, حالىقتىڭ ءوزى بىرگە بولعاندى قالاپ تۇر.