سىبايلاس جەمقورلىق – قوعام دەرتى
سىبايلاس جەمقورلىق – قوعامداعى ەڭ قاۋىپتى الەۋمەتتىك قۇبىلىستاردىڭ ءبىرى. ول ەكونوميكا مەن الەۋمەتتىك قاتىناستاردى عانا ەمەس, قوعامنىڭ قۇندىلىقتارى مەن مورالدىق نەگىزدەرىن بۇزىپ, مەملەكەتتىك اپپاراتتىڭ ءتيىمدى جۇمىس ىستەۋىنە, ەلدەگى تۇراقتىلىق پەن قاۋىپسىزدىككە دە ەلەۋلى قاتەر توندىرەدى.
استانا قالاسىنىڭ ادىلەت دەپارتامەنتى وسى قاۋىپتى كەسەلدىڭ الدىن الۋ ماقساتىندا ءوز قىزمەتكەرلەرى اراسىندا سىبايلاس جەمقورلىق قۇقىق بۇزۋشىلىقتار كورىنىستەرىن بولدىرماۋ, قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسى تالاپتارىنىڭ قاتاڭ ساقتالۋى باعىتىندا جۇيەلى جۇمىستار جۇرگىزۋدە. اتاپ ايتقاندا, جىل باسىنان بەرى وسى تۇرعىدا قۇزىرلى ورگاندارمەن ءبىرلەسە وتىرىپ, بىرنەشە رەت ۇگىت-ناسيحات جۇمىسى مەن سەمينار-كەڭەس, دوڭگەلەك ۇستەل ءماجىلىسى وتكىزىلدى.
قازىر ەلىمىزدە وسى قاۋىپتى ىندەتكە قارسى بىتىسپەس كۇرەس جاريالانۋدا. مەملەكەتتىك قىزمەت پەن سىبايلاس جەمقورلىققا قارسى ءىس-قيمىل ارەكەتتەرىن جۇزەگە اسىراتىن ارنايى ۋاكىلەتتى ورگان قايتا قۇرىلدى. جازالاۋدىڭ قايتىمسىزدىعى ۇستانىمى دا ءساتتى جۇزەگە اسىرىلۋدا. سوندىقتان مەملەكەتتىك قىزمەتكەردىڭ اتىنا كىر كەلتىرەتىن ارەكەتتەردەن اركىمنىڭ دە اۋلاق بولعانى ءجون. مۇنداي زاڭ بۇزۋشىلىققا قاساقانا بارعاندار قاتاڭ جازاعا تارتىلادى. كەيىنگى كەزدە سىبايلاس جەمقورلىققا قارسى زاڭناما قىلمىستىق جولمەن الىنعان مۇلىكتى تاركىلەۋ, سىبايلاس جەمقورلىققا قارسى ءىس-قيمىل جونىندەگى باسشىلاردىڭ دەربەس جاۋاپكەرشىلىگى تۋرالى ەرەجەمەن تولىقتىرىلدى. وندا «مۇددەلەر قاقتىعىسى» دەگەن ماڭىزدى تۇسىنىك بار. بۇل مەملەكەتتىك قىزمەتشىلەردىڭ جاۋاپكەرشىلىگىنىڭ ارتۋىنا, ولاردىڭ الەۋمەتتىك كەپىلدىكتەرىنىڭ جاقسارۋىنا مۇمكىندىك جاساۋدا.
سىبايلاس جەمقورلىقپەن كۇرەستە كوپ نارسە بۇكىل قوعامنىڭ بەلسەنە اتسالىسۋىنا بايلانىستى. الەۋمەتتىك جەلىنىڭ, وزگە دە مەديا-رەسۋرستاردىڭ دامۋى جاعدايىندا سىبايلاس جەمقورلىققا قارسى ءىس-ارەكەتتى ونى جالپى جۇرتشىلىق بولىپ قارسى تۇراتىنداي دارەجەگە جەتكىزگەن ءجون.
قورىتا ايتقاندا, جەمقورلىققا قارسى كۇرەستە بارلىق ادامداردىڭ زاڭ مەن سوت الدىندا تەڭدىگىن ساقتاپ, جەكە جانە زاڭدى تۇلعالاردىڭ بۇزىلعان قۇقىقتارى مەن زاڭدى مۇددەلەرىن قالپىنا كەلتىرۋ, سىبايلاس جەمقورلىق پەن قۇقىق بۇزۋشىلىقتىڭ زياندى زارداپتارىن جويۋ, ولاردىڭ الدىن الۋ جانە بارلىق مەملەكەتتىك ورگاندار مەن لاۋازىمدى ادامدار ءوز قۇزىرەتى شەگىندە كۇرەس جۇرگىزىپ, جەمقورلىقپەن كۇرەس جالپىعا ورتاق مىندەتكە اينالعاندا عانا بۇل كەسەلدىڭ تامىرىنا بالتا شابىلارى ءسوزسىز.
مايا امانتاەۆا,
استانا قالاسى ادىلەت
دەپارتامەنتى ءبولىم
باسشىسىنىڭ مىندەتىن
اتقارۋشى