كەشە ەلوردانىڭ بارلىق مەكتەپتەرىندە سىڭعىرلاعان ۇنىمەن جۇرەكتى تەبىرەنتەتىن سوڭعى قوڭىراۋ سوعىلدى. اسىرەسە, ون ءبىر جىل ءبىلىم ءنارىن جيناعان التىن ۇيالارىنان ارمان جولىنا قانات قاققان 5 870 تۇلەك ءۇشىن بۇل ايتۋلى شارانىڭ ءمانى بولەك. ەندى ولار مۇنداي سالتاناتتى ءساتتى ەشقاشان باستان كەشپەيدى. بوزبالا مەن بويجەتكەندەردىڭ بال-بۇل جانعان جۇزدەرىنەن بالالىقتان ارىلماعان تولقىنىس, ۇستازدارىمەن قوشتاسقىسى كەلمەگەن قيماستىق سەزىم بايقالىپ تۇردى.
جالپى, ەلوردالىق وقۋشىلار استانالىق مارتەبە اتىنا ابدەن لايىق. بيىل دا ولار رەسپۋبليكا بويىنشا 12 رەت قاتارىنان «ۇزدىك كوماندا» اتاعىنا يە بولدى. سونداي-اق, ءبىزدىڭ جەتكىنشەكتەردىڭ 2017-2018 وقۋ جىلىندا حالىقارالىق, رەسپۋبليكالىق وليمپيادالاردا جانە عىلىمي جوبالاردا قانجىعالارى بوس قايتقان ەمەس. ولار 39 التىن, 53 كۇمىس جانە 90 قولا جەڭىپ الىپ, باس-اياعى 182 مەدالدى يەلەندى.
جىل سايىن مەكتەپ تۇلەكتەرىن ۇلتتىق بىرىڭعاي تەستىلەۋ سىناعى كۇتىپ تۇرادى. وسى جىلى وعان ەلوردادان 5 329 وقۋشى قاتىسپاق. ايتقانداي, بيىل «التىن بەلگىگە» ۇمىتكەرلەر سانى بىلتىردان كوپ. ياعني, 277 تۇلەك ءوز بىلىمدەرىن قورعاۋعا تاس-ءتۇيىن دايىندالۋدا. سونىمەن قاتار, 318 وقۋشى ۇزدىك اتتەستات الۋعا باعىن سىناماق. «التىن بەلگى» ۇمىتكەرلەرىنىڭ كوپ بولىگىن شاھارداعى №48, №1, №54, №66 جانە №75-ءشى مەكتەپتىڭ وقۋشىلارى قۇراپ وتىر.
ايتا كەتەيىك, استانادا ۇلتتىق ەمتيحان جىلداعىداي 3 ۋنيۆەرسيتەتتىڭ بازاسىندا ۇيىمداستىرىلادى. ونىڭ ءوتۋ مەرزىمى: 20 ماۋسىمنان 1 شىلدەگە دەيىن جوبالانعان. الداعى ماۋسىمنىڭ سوڭىندا قالا باسشىلىعى اتىنان «التىن بەلگى» يەگەرلەرىنە ارنالعان «ەلوردا ماقتانىشى» اتتى شارا وتكىزىلەدى.
