ادامنىڭ يممۋن تاپشىلىعى ۆيرۋسى تۋرالى دۇرىس ءارى تولىققاندى اقپارات تاراتۋ جاعىنان استانالىق جۋرناليستەر الدا كەلە جاتىر ەكەن. بۇل ءجونىندە ەلورداداعى جيتس-تىڭ الدىن الۋ جانە وعان قارسى كۇرەس ورتالىعىندا وتكەن دوڭگەلەك ۇستەل جيىنىندا ايتىلدى.
– جۇرتشىلىق ايتۆ-ءنى ءولىمنىڭ ۇكىمىندەي كورەتىنى راس. قوعام بۇل سىرقاتقا قورقىنىشپەن قارايدى. سول سەبەپتى اۋرۋ جۇقتىرىپ العاندار سىرقاتىن جاسىرىپ ءجۇرىپ, اسقىندىرىپ الادى. سوندىقتان ۆيرۋس تۋرالى حالىققا دۇرىس اقپارات بەرۋدىڭ ماڭىزى ۇلكەن, – دەيدى ورتالىقتىڭ باس دارىگەرى ءسابيت ءابدىرايىموۆ.
مامانداردىڭ ايتۋىنشا, ايتۆ تىم جىلدام تارالىپ كەلەدى. مۇنىڭ بىردەن-ءبىر سەبەبى, ادامداردىڭ وعان نەمقۇرايلى قاراۋىندا ەكەن. كوپشىلىك ۆيرۋسقا «مەن بۇل دەرتتەن ساۋمىن, ونىڭ ماعان ەشقانداي قاتىسى جوق» دەگەن كوزقاراسپەن قارايدى. شىنتۋايتىندا, قازىرگى تاڭدا بۇل دەرتتىڭ قۇرىعىنا ەسىرتكىقۇمارلار مەن جەزوكشەلەر عانا ەمەس, سالاۋاتتى ءومىر سالتىن ۇستاناتىن ادامدار دا ءىلىنىپ ءجۇر. ءتىپتى, ولاردىڭ اراسىندا اۋقاتتىلار دا, لاۋازىمدى جۇمىس اتقاراتىندار دا بار. سوندىقتان ايتۆ/جيتس تۋرالى اركىمنىڭ قاپەرىندە جۇرگەنى ارتىق بولمايدى. «ال ۆيرۋستى جۇقتىرىپ العانداردىڭ ساعى سىنباسىن. ونى جۇقتىرعان العاشقى كەزەڭدە اۋرۋدى اسقىنتپاي, سيندرومعا جەتكىزبەي ۇستاپ تۇرۋعا بولادى. ول ءۇشىن ەشقانداي ەمشى-تاۋىپكە جۇگىنبەي, بىردەن ورتالىققا كەلىپ, ارنايى ءدارى-دارمەك قابىلداۋ قاجەت» دەيدى ماماندار.
قر پرەزيدەنتىنىڭ بيىلعى 15 قاڭتارداعى جارلىعىمەن دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى بەكىتىلگەنى بەلگىلى. اتالمىش باعدارلامادا باق وكىلدەرىن ايتۆ/جيتس تاقىرىبى بويىنشا وقىتۋ ماسەلەسى اتاپ كورسەتىلگەن. وسىنى نەگىزگە الا وتىرىپ, جيىن وتكىزگەن استانا قالالىق جيتس-قا قارسى كۇرەس ورتالىعى جۋرناليستەرگە ايتۆ جونىندە ءبىرتالاي اقپارات بەردى. ورتالىقتىڭ مالىمەتى بويىنشا, استانا قالاسىندا بۇگىنگە دەيىن ايتۆ جۇقتىرعان 1108 وقيعا انىقتالعان. ولاردىڭ 39 پايىزى – ايەلدەر. دەرتكە شالدىققانداردىڭ 80 پايىزى 20 مەن 39 جاس ارالىعىنداعى ازاماتتار ەكەن.
جالپى, ادام دەنساۋلىعىنىڭ 90 پايىزى – ءوز قولىندا. سوندىقتان ءاربىر ادام سالاۋاتتى ءومىر سالتىن ۇستانىپ, دۇرىس ءجۇرۋ كەرەك. ەگەر ءوزىڭىزدى ايتۆ جۇقپاسىنا تەكسەرتكىڭىز كەلسە, وسى ورتالىققا بارىپ, قان ساراپتاماسىن تاپسىرۋعا بولادى. مۇندا تەكسەرىلۋ, ناتيجەنى الۋ جاسىرىن تۇردە جۇرگىزىلەتىنىن ەستەرىڭىزگە سالامىز.
قىمبات توقتامۇرات
