كەشە «Zووm» سەرۆيسىنىڭ پلاتفورماسىندا ونلاين فورماتتا نۇر-سۇلتان قالاسى ءماسليحاتىنىڭ كەزەكتەن تىس سەسسياسى ءوتتى. ءماسليحات دەپۋتاتىنىڭ وكىلەتتىگىن مەرزىمىنەن بۇرىن توقتاتۋ, تاعى باسقا ماسەلەلەر قارالعان سەسسيا جۇمىسىنا قالا اكىمىنىڭ ورىنباسارى نۇرلان نۇركەنوۆ قاتىستى.
ءماسليحات دەپۋتاتى اقىلبەك كۇرىشباەۆتىڭ پارلامەنت سەناتىنا سايلانۋىنا بايلانىستى وكىلەتتىگى توقتاتىلدى. ورتالىق سايلاۋ كوميسسياسىنىڭ قاۋلىسىمەن تانىستىرعان قالالىق سايلاۋ كوميسسياسىنىڭ توراعاسى ۆلاديمير رەدكوكاشين دەپۋتاتتىڭ وكىلەتتىگى ەلىمىزدىڭ جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى زاڭىمەن رەتتەلەتىنىن ايتىپ ءوتتى.
ودان كەيىن ءسوز العان دەپۋتات ەرلان سىدىقوۆ سەناتقا سايلانعان ارىپتەسىنە اق جول تىلەدى.
جاقىندا ەلوردا اۋماعىندا سىرتقى كورنەكى جارنامانى ءۇي-جايلاردىڭ شەگىنەن تىس اشىق كەڭىستىكتە, جالپىعا ورتاق پايدالانىلاتىن اۆتوكولىك جولدارىنىڭ بولىنگەن بەلدەۋىندە نەمەسە بەلدەۋىنەن تىس جەردە ورنالاستىرۋ قاعيدالارى ازىرلەندى. وسى قۇجاتپەن جانە قالا اكىمدىگىنىڭ جەر كوميسسياسىنىڭ وزگەرگەن قۇرامىمەن قالالىق ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحاەۆ تانىستىردى.
سەسسيا الدىندا وتكەن قالالىق ءماسليحاتتىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسىندا دەپۋتات قاراقات ابدەن وسى سىرتقى كورنەكى جارنامادان بيۋدجەتكە تۇسەتىن سالىق مولشەرىن سۇرادى.
– بيىل سىرتقى كورنەكى جارنامانى ورنالاستىرۋدان بيۋدجەتكە تۇسەتىن سالىق مولشەرى ءوستى. بۇرىن بۇل 326 ميلليون تەڭگەنى قۇراسا, قازىر 600-800 ميلليون تەڭگەگە دەيىن ءوستى. ارينە, مۇنىمەن شەكتەلۋگە بولمايدى. سالىستىرمالى تۇردە ايتقاندا, الماتى قالاسىندا سىرتقى كورنەكى جارنامادان 3 ميلليارد تەڭگەدەن استام قارجى تۇسەدى. ياعني بىزگە بۇل باعىتتا ءالى دە ەڭبەكتەنۋ كەرەك دەپ ويلايمىن, – دەپ جاۋاپ بەردى بۇل ساۋالعا ن.ۇرانحاەۆ.
ال اكىمدىكتىڭ جەر كوميسسياسىنىڭ قۇرامى 13 ادامنان 9 ادامعا قىسقاردى. ونىڭ سەبەبىن قالا اكىمىنىڭ ورىنباسارى نۇرلان نۇركەنوۆ ءتۇسىندىردى.
بىلتىر قالالىق ءماسليحات دەپۋتاتتارى كاسىپكەرلەرگە سالىقتىق ستاۆكا مولشەرىن تومەندەتتى. اتاپ ايتقاندا, بوۋلينگكە 72 ايلىق ەسەپتىك كورسەتكىشتەن 30 اەك-كە تومەندەتىلىپ, ايىرباستاۋ پۋنكتتەرىنە 70 اەك بەلگىلەندى. بىراق سودان كەيىن سالىق كودەكسىنە وزگەرىستەر ەنگىزىلدى. سوعان سايكەس ستاۆكا مولشەرىنە قايتا وزگەرىس ەنگىزىلدى. بۇل تۋرالى ايتقان قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمۇرزاەۆ دەپۋتاتتاردى اتالمىش وزگەرىستەرمەن تانىستىردى.
يممۋننوتاپشىلىعى بار جانە ونكولوگيالىق اۋرۋلارمەن اۋىراتىن بالالارعا توقسان سايىن 5 اەك مولشەرىندە الەۋمەتتىك كومەك قاراستىرىلعان. وسى جونىندە بايانداما جاساعان قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا بۇل جاردەم كولەمىن اي سايىن 25 اەك-كە دەيىن كوتەرۋدى ۇسىندى. سونداي-اق قالاعا «كوگىلدىر وتىننىڭ» كەلۋىنە بايلانىستى الەۋمەتتىك وسال توپتارعا گاز قۇبىرىن تارتۋ قاراستىرىلعانىن جەتكىزدى.
سەسسيادا ايتىلعان ۇسىنىستار مەن تانىستىرىلعان قۇجاتتاردى ءماسليحات دەپۋتاتتارى ءبىراۋىزدان بەكىتتى.
