قالا تۇرعىندارى مەن قوناقتارىن ەلوردانىڭ زاماناۋي فۋتۋريستىك عيماراتتار مەن قۇرىلىستاردىڭ كوپتىگى تاڭعالدىرادى. وسىنداي عيماراتتاردىڭ ءبىرى – تاۋەلسىزدىك سارايى, ول ءوز اتاۋىنا قاراماستان, ءوزىمىز ەلەستەتەتىن ءزاۋلىم سارايعا دا, كلاسسيكالىق ستيلدەگى ءساندى عيماراتقا دا مۇلدەم ۇقسامايدى.
استانا تاريحىندا ەڭ تەز سالىنعان قۇرىلىس نىسانى رەتىندە ەلوردالىقتاردىڭ ەسىندە. تاۋەلسىزدىك سارايىنىڭ قۇرىلىسى 2007 جىلى باستالىپ, 2008 جىلدىڭ اياعىندا پايدالانۋعا بەرىلدى. جوبانىڭ اۆتورى – تۇرىك ساۋلەتشىسى گيۋلتەكين لينەا, قۇرىلىستى جۇرگىزگەن – Sembol İnşaat تۇرىك قۇرىلىس كومپانياسى.
تاۋەلسىزدىك سارايى مەملەكەتىمىزدىڭ يميدجدىك نىسانى رەتىندە ءوز قىزمەتىن اتقارۋدا. مۇندا ءىرى حالىقارالىق كەزدەسۋلەر, فورۋمدار, كونفەرەنتسيالار, كەزدەسۋلەر جانە ت.ب. وتەدى. ءۇش قاباتتان تۇراتىن كەشەننىڭ ءبىرىنشى قاباتى ۇلتتىق جانە قازىرگى زامان ستيلدەرىنىڭ ءبىرتۋما ۇيلەسىمىمەن بەزەندىرىلگەن. مۇندا سىيىمدىلىعى 3000 ادامعا ارنالعان كونگرەسس-زال, راسىمدەۋ زالى, پرەسس-ورتالىق, سىيىمدىلىعى 678 ادامدىق ساحنا مەن دىبىس اپپاراتۋراسىمەن جابدىقتالعان كەڭ مەيرامحانا ورنالاسقان. ەكىنشى قاباتتا ونەر, ەتنوگرافيا, ارحەولوگيا جانە انتروپولوگيا گالەرەياسى ورنالاسقان. تۇراقتى جانە ۋاقىتشا قويىلاتىن كوركەمونەر كورمەلەرى بار گالەرەيالار مەن كورمە زالدارى بار.
ءبىر قاراعاندا, قازاق ءۇيىنىڭ كەرەگەسىندەي, يرەكتەلىپ اق تورمەن ايقاستىرىپ بەزەندىرگەن تراپەتسيا تۇرىندەگى اينەكتەن جاسالعان عيمارات. 4D كينوتەاترى, 360 گرادۋستى كينوتەاترى حالىق يگىلىگىنە بەرىلگەن. قازىر مۇندا كۇردەلى جوندەۋ جۇمىستارى ءجۇرىپ جاتىر.
