قازاقستان رەسپۋبليكاسىنىڭ ۇلتتىق ارحيۆىندە العىس كۇنىنە ارنالعان «تاعدىر توعىستىرعان» اتتى قۇجاتتىق كورمە اشىلدى.
مۇندا قازاقستان حالقى اسسامبلەياسىنىڭ قۇرىلۋ قۇجاتتارى, سونىمەن قاتار ەلىمىزدىڭ تاريحىنداعى قيىن-قىستاۋ كەزەڭدەردە, اتاپ ايتقاندا, جاپپاي قۋعىن-سۇرگىنگە, 1936-1949 جىلدارى قازاقستانعا جەر اۋدارىلعاندارعا قاتىستى قابىلدانعان قۇجاتتاردىڭ كوشىرمەلەرى قويىلعان.
تاريح تاعىلىمىن ۇسىنعان كورمەنى مەملەكەتتىك ورگاندار مەن قوعامدىق ۇيىمدار وكىلدەرى تاماشالادى. سونداي-اق العاشقى كەلۋشىلەر قاتارىندا مەكتەپ وقۋشىلارى مەن ستۋدەنت جاستار دا بولدى. ولار كورمە سورەسىنە قويىلعان قۇجاتتاردى قىزىعىپ كوردى.
شارا بارىسىندا استانا قالاسىنداعى نەمىس ەتنومادەني ورتالىعى قازاق جەرىنە جەر اۋدارىلعان اتا-بابالارىنىڭ ءومىرى جايلى جۇرەك تەبىرەنتەرلىك قويىلىم ۇسىندى. تاتار-باشقۇرت جانە ارميان ەتنومادەني بىرلەستىكتەرى وكىلدەرى دە قازاقستاندى ءوز وتانىمىز دەپ ىستىق ىقىلاستارىن ايتتى.
ۇلتتىق ارحيۆ ديرەكتورى جانگەلدى ماحاشوۆ باستاعان مەكەمە قىزمەتكەرلەرى كەلۋشىلەردىڭ بارىنە كورمە قۇجاتتارىن تانىستىردى. كورمە ءبىر اي بويى جۇمىسىن جالعاستىراتىن بولادى.
