كورەيانىڭ پحيونچحان قالاسىندا ءوتىپ جاتقان قىسقى وليمپيالىق ويىنداردا بۇرناعى كۇنى بياتلوننان ايەلدەردىڭ 4ح6 شاقىرىمدىق ەستافەتاسىندا بەلارۋس قۇراماسى التىن مەدال جەڭىپ الدى. سول تورتتىكتىڭ قۇرامىندا ءبىزدىڭ قانداسىمىز دينارا الىمبەكوۆا دا ونەر كورسەتتى. ءسويتىپ, قىسقى ويىنداردا چەمپيون اتانعان تۇڭعىش قازاق قىزىنىڭ ەسىمى دە بەلگىلى بولدى.
دينارا 1996 جىلعى 5 قاڭتاردا قاراعاندى وبلىسىنىڭ اباي قالاسىندا تالعات الىمبەكوۆ دەگەن قازاق جىگىتىنىڭ وتباسىندا تۋعان. اناسى – رەسەيلىك ورىس قىزى. دينارا ءۇش جاسقا تولعان كەزدە اتا-اناسى بەلارۋستىڭ موگيلەۆ وبلىسىنداعى چاۋسى قالاسىنا كوشىپ بارادى. بىراق كوپ ۇزاماي ونىڭ اكە-شەشەسى اجىراسىپ كەتەدى. اناسىنىڭ كەيىنگى نەكەسىنەن ەۆگەني, ۋليانا دەگەن باۋىرلارى دۇنيەگە كەلەدى.
دينارا اباي قالاسىنا ەڭ سوڭعى رەت جەتى جاسىندا كەلىپ كەتكەن ەكەن. بىراق كەيىن ءوزىنىڭ ەشقاشان قازاقستان قۇراماسى ساپىنا شاقىرىلماعانىن ايتادى.
بولاشاق وليمپيادا چەمپيونى العاش رەت 11 جاسىندا, 2007 جىلى اياعىنا شاڭعى بايلاپ كورەدى. وسىعان بايلانىستى بۇعان دەيىن بارىپ جۇرگەن فورتەپيانو كلاسىن تاستايدى. ارادا ءبىر جىل وتكەندە ول بياتلونعا اۋىسادى. 2011 جىلدان باستاپ ءتۇرلى حالىقارالىق جارىستارعا قاتىسا باستايدى.
دينارا ءوزىنىڭ العاشقى ءىرى تابىسىنا 2011 جىلى بەلارۋستىڭ راۋبيچي قالاسىندا وتكەن جاسوسپىرىمدەر اراسىنداعى الەم چەمپيوناتىندا جەتتى. سول جولى ول اننا سالو, داريا بلاجكو اتتى قۇربىلارىمەن بىرگە ەستافەتالىق جارىستا توپ جاردى.
پحيونچحاندا قازاق قىزى الدىمەن جەكە جارىسقا ءتۇسىپ, 56-ورىندا قالىپ قويدى. ال ەستافەتاعا قاتىسۋ ءۇشىن ول كوماندالاسى نادەجدا پيسارەۆامەن تالاستى. سوڭىندا تاڭداۋ ديناراعا ءتۇستى. كۆارتەت قۇرامىندا تاعى سوچي وليمپياداسىنىڭ ءۇش دۇركىن چەمپيونى داريا دومراچەۆا باستاعان نادەجدا سكاردينو, يرينا كرۋيكو دەگەن قىزدار بولدى. مۇندا قازاق قىزى ءۇشىنشى بولىپ جۇگىرىپ, سوڭعى كەزەڭ ەستافەتاسىن دومراچەۆاعا وتە جاقسى حالدە جەتكىزىپ بەردى. ناتيجەسىندە بەلورۋس قىزدارى قاشىقتىقتى 1 ساعات 12 مينۋت 03.4 سەكۋندتا جۇگىرىپ ءوتىپ, مارەگە ءبىرىنشى بولىپ كەلدى. ولار تارتىستى شايقاستىڭ سوڭعى مەزەتىندە شۆەد جانە فين قىزدارىن ارتتا قالدىردى.
ءبىز دينارانىڭ سوڭعى جىلدارداعى ونەر كورسەتۋلەرىنىڭ ءبارىن باقىلاپ ءجۇر ەدىك. وزىمەن بىرنەشە رەت تەلەفون ارقىلى دا سويلەسكەنبىز. ال كەشە سولاي تاعى دا جەلى جولىمەن تىلدەسىپ قالۋدىڭ رەتى كەلدى.
– دينارا, سەنى ۇلكەن جەڭىسىڭمەن شىن جۇرەكتەن قۇتتىقتايمىز! ەستافەتاعا شىعاتىنىڭدى قاشان ءبىلدىڭ؟
– سودان ەكى كۇن بۇرىن. ءبىز ناديا پيسارەۆا ەكەۋمىز قاشىقتىققا جۇگىرىپ كوردىك. كەشكى جاتتىعۋدان كەيىن جاتتىقتىرۋشىلار جارىسقا مەنىڭ باراتىنىمدى ايتتى.
– بۇل جاڭالىقتى قالاي قابىلدادىڭ؟
– قاتتى قۋاندىم. راس, ءبىر جاعى ناديا ءۇشىن قاپا دا بولدىم. ول ءوزىنىڭ رەنجىگەنىن كورسەتتى, سوسىن مەنىڭ دە كوڭىل كۇيىم ءتۇسىپ كەتتى. بىراق تاڭداۋدى مەن ەمەس, باپكەرلەر جاسادى عوي. سوندىقتان جارىسقا قاتىسقانىم ءۇشىن وتە باقىتتىمىن.
– كومانداداعى قۇربىلارىڭ سەنى ەركەلەتىپ «دينوزاۆريك» دەپ اتايدى ەكەن…
– ءيا, سولاي اتايتىنى راس. الايدا مەن ونداي قاتىگەز ەمەسپىن, مىنەزىم بارىنشا جۇمساق… قازاققا ءتان قايىرىمدىلىق مەندە دە بار.
وسى وليمپيادادا قازاقستان قۇراماسى ساپىنان يۋليا گالىشەۆانىڭ فريستايلدىڭ موگۋل جارىسى بويىنشا قولا جۇلدە جەڭىپ العانى دا بەلگىلى. جۇلدەگەر سپورتشى بۇرناعى كۇنى ەلگە ورالدى. ونى الماتى اەروپورتىندا سپورت سالاسىنىڭ باسشىلارى مەن قالا جۇرتشىلىعى قارسى الدى.
* * *
بۇگىن شاڭعىشى الەكسەي پولتورانين كلاسسيكالىق ادىسپەن 50 شاقىرىمعا جۇگىرۋ جارىسىنا قاتىسادى. ول سايىستىڭ باستى فاۆوريتتەرىنىڭ ءبىرى سانالىپ وتىر.
سەرىك ءپىرنازار
