ەلوردادا رەسمي تاكسي قىزمەتى ءالى كۇنگە كەڭ قانات جايىپ كەتە الماي تۇر. ويتكەنى, بۇل سالادا قوردالانعان ماسەلە وتە كوپ. باسقاسىن ايتپاعاندا, زاڭسىز جولاۋشىلار تاسۋمەن اينالىساتىندار دا سالانىڭ دامۋىنا از كەدەرگى كەلتىرىپ جاتقان جوق.
سول سەبەپتەن استانا قالالىق كولىك اسسوتسياتسياسىنىڭ وكىلدەرى ەلوردالىق كاسىپكەرلىك پالاتاسىنا ارنايى جۇگىنىپ, «جابايى» تاكسيستەردىڭ جولىن كەسۋدى سۇرادى. وسى ماسەلەگە قاتىستى وتكەن جيىنعا پالاتا جانىنداعى كاسىپكەرلەردىڭ قۇقىعىن قورعاۋ جونىندەگى كەڭەستىڭ توراعاسى يراك ەلەكەەۆ باسشىلىق جاساپ, سالا ماماندارىنىڭ ۇسىنىس-پىكىرلەرىن تىڭداعان ەدى.
ەلدى ەلەڭدەتكەن «ەكسپو – 2017» كورمەسى باستالاتىن كۇن دە جاقىنداپ كەلەدى. ال استانادا ءالى جاڭا زامانعا ساي تاكسي قىزمەتى جوق. بيىلعى جىلدىڭ باسىندا كورمەگە دايىندىق ماسەلەسىن تالقىلاۋ بارىسىندا ەلباسىمىز قالاداعى تاكسي قىزمەتىنىڭ ءار الۋاندىعىن, بىرىڭعاي كيىم ۇلگىسى جانە باسقا ورتاق بەلگىلەرى جوقتىعىن سىنعا العان بولاتىن. بۇل جيىندا استانا قالالىق كاسىپكەرلەر پالاتاسى كاسىپكەرلەردىڭ قۇقىعىن قورعاۋ جانە اكىمشىلىك كەدەرگىلەردى ءتومەندەتۋ ءبولىمىنىڭ باستىعى داۋرەن ساتقانباەۆ قازىرگى ۋاقىتتا رەسمي تاكسي نارىعىن دامىتۋعا كەدەرگى كەلتىرىپ وتىرعان ماسەلەلەرگە توقتالىپ ءوتتى. ونىڭ ايتۋىنشا, زاڭسىز ديسپەتچەرلەر مەن ينتەرنەت-سەرۆيستەر زاڭدى جۇمىس جاساپ جاتقان ديسپەتچەرلەرگە ۇلكەن كەدەرگى كەلتىرەدى ەكەن. سونداي-اق, تاكسيگە ارنالعان تۇراقتاردىڭ وتە از بولۋى, وسى باعىتتاعى ينفراقۇرىلىمدى دامىتۋ ماسەلەسىن كولدەنەڭ تارتادى.
بىرەر جىل ىشىندە ءجۇز شاقتى كومپانيا تاكسي سالاسىنان ءوز ەركىمەن كەتكەن. قازىرگى ۋاقىتتا استانادا ون شاقتى كومپانيا جۇمىس ىستەيدى. سالاداعى ماسەلە ودان ءارى شيەلەنىسە بەرسە, كوپ وتپەي ەلوردادا رەسمي تاكسي قىزمەتى مۇلدەم توقتاۋى مۇمكىن.
وسى ورايدا استانا قالالىق كولىك اسسوتسياتسياسىنىڭ ءتورا-عاسى مەدەت قۇرمانوۆ ماسەلەنىڭ ءمانىسىن بارىنشا اشا ءتۇستى.
– ارنايى تاكسي تۇراقتارىن ەڭ ءبىرىنشى جولاۋشىلار كوپ جينالاتىن اۋماقتاردان ۇيىمداستىرعان دۇرىس. ماسەلەن, «قازاقستان» ورتالىق كونتسەرت زالى اۋماعىندا تاكسي تۇراعى جوق. ال ول جاققا جينالعان حالىق كوپ جاعدايدا تاكسي ۇستاۋ ءۇشىن ورىنبور كوشەسىنە شىعۋعا ءماجبۇر بولادى. سول جەردەن ءبارى جاپا-تارماعاي تاكسي ۇستاعان كەزدە اجەپتاۋىر كولىك تىعىنى پايدا بولىپ, جالپى كوشە قوزعالىسىنا كەدەرگى كەلىپ جاتاتىن كەزدەر از ەمەس. ەكىنشىدەن, BUS LINE جولاعىن رەسمي تاكسيلەردىڭ پايدالانۋىنا رۇقسات بەرۋ قاجەت. سوندا تاكسي قىزمەتىنىڭ تيىمدىلىگى ارتىپ, پايدالانۋشىلار كوبەيەدى. بۇل ءوز كەزەگىندە زاڭسىز جولاۋشى تاسىمالداۋشىلاردى شەتكە ىعىستىرۋعا ۇلكەن سەپتىگىن تيگىزەتىن شارا بولارى ءسوزسىز. ۇشىنشىدەن, تاكسيلەرگە سارى نەمەسە تاعى سونداي ايشىقتى ءتۇستى تىركەۋ ءنومىرىن بەلگىلەۋ كەرەك. مۇنداي تاجىريبە رەسەيدە 2002 جىلدان بەرى قولدانىلىپ كەلەدى. تاكسيدىڭ ءنومىرىن وزگەشەلەۋ, ياعني, ايشىقتاۋ ارقىلى اۆتوكولىك تاكسيلەرىن ەسەپكە الۋدى جانە قاداعالاۋشى ورگاندار تاراپىنان باقىلاۋدى جەڭىلدەتە تۇسەمىز. ءارى مۇنداي نومىرلەر ارقىلى ولار تاكسي
تۇراعىنا كەدەرگىسىز ءوتۋ قۇقىعىنا يە بولادى, – دەدى مەدەت باعيتجولۇلى.
بۇل ماسەلەگە قاتىستى ءوز ءپىكىرلەرىن بىلدىرگەن سالا ماماندارى رەسمي تاكسي قىزمەتىن جەتىلدىرۋ ءۇشىن ءتيىمدى باعا ساياساتىن قالىپتاستىرىپ, بىرقاتار قۇقىقتىق نورماتيۆتىك اكتىلەرگە وزگەرىستەر ەنگىزۋ قاجەتتىگىن دە العا تارتتى. بۇگىندە تىلگە تيەك بولىپ وتىرعان ماسەلەلەر سالدارىنان بىرقاتار تاكسي قىزمەتىن ۇسىناتىن كومپانيالار ءوز جۇمىسىن توقتاتۋعا ءماجبۇر بولعان. بىرەر جىل ىشىندە ءجۇز شاقتى كومپانيا بۇل سالادان ءوز ەركىمەن كەتكەن. قازىرگى ۋاقىتتا استانادا ون شاقتى كومپانيا جۇمىس جاسايدى ەكەن. سالاداعى ماسەلە ودان ءارى شيەلەنىسە بەرسە, كوپ وتپەي ەلوردادا رەسمي تاكسي قىزمەتى مۇلدەم توقتاۋى مۇمكىن. جيىندا ءتيىستى بىرقاتار قۇزىرلى ورگاننىڭ باسشىلارى بۇل ماسەلەنى جان-جاقتى ءتيىمدى شەشۋدىڭ جولدارىن تاياۋ ۋاقىتتا ۇسىناتىندارىن جەتكىزدى.
مەڭدوللا شامۇراتوۆ
