استانادا قر مادەنيەت جانە سپورت مينيسترلىگى, قازاقستان حالقى اسسامبلەياسى جانە قازاقستان تەاترلارى اسسوتسياتسياسىنىڭ قولداۋىمەن «ەكسپو-2017» حالىقارالىق مامانداندىرىلعان كورمەسى اياسىندا قازاقستان ۇلتتىق (ەتنيكالىق) تەاترلارىنىڭ IV رەسپۋبليكالىق فەستيۆالى ءوتتى. بەس كۇنگە سوزىلعان فەستيۆالگە استانالىق تەاترلارمەن قاتار ەلىمىزدىڭ تۇكپىر-تۇكپىرىنەن كەلگەن ونەر ۇجىمدارى قاتىستى.
فەستيۆالدىڭ جابىلۋ سالتاناتىندا ءارتۇرلى اتالىمداردا توپ جارعان مادەني وشاقتار مەن جەكەلەگەن ونەرپازدار ماراپاتتالدى. «جاستار» تەاترى كورەرمەندەردىڭ نازارىنا ءا.كەكىلبايۇلىنىڭ «نارتاۋكەل» سپەكتاكلىن ۇسىنعان ەدى. بۇل قويىلىمدى ساحنالاعان اتالمىش تەاتردىڭ كوركەمدىك جەتەكشىسى نۇرقانات جاقىپباي «تاريحي تاقىرىپتاعى رەجيسسەرلىك شەشىم ءۇشىن» اتالىمىندا جەڭىمپاز اتانسا, باستى ءرولدى سومداعان بەلگىلى اكتەر ءادىل احمەتوۆ «ۇزدىك ەر ادام بەينەسى» اتالىمىنىڭ جۇلدەسىن يەلەندى.
«قازىلار القاسىنا تەاتر سالاسىنداعى بەلدى, بەدەلدى ادامدار جينالدى. ارينە, ولاردىڭ ارقايسىسىنىڭ تالعامى دا, تانىمى دا بولەك. سوندىقتان ءار اتالىم بويىنشا جەڭىمپازداردى انىقتاۋ قيىنعا سوقتى. دەسەك تە, ءبىر جاعدايدا ءبارىمىز ءبىراۋىزدان شەشىمگە كەلدىك. تاريحي تاقىرىپتى نۇرقانات جاقىپباي سياقتى ەشكىم اشا العان جوق» دەگەن قازىلار القاسىنىڭ توراعاسى تالعات تەمەنوۆ ءسوزىن قادىر اقىننىڭ «تالانتتى باعالاڭدار تىرىسىندە» ولەڭىنىڭ جولدارىمەن تۇزدىقتادى.
ل. تولستويدىڭ «اننا كارەنينا» سپەكتاكلىندە باستى ءرولدى سومداعان «ۇزدىك ايەل بەينەسى» اتالىمىندا م. گوركي اتىنداعى مەملەكەتتىك اكادەميالىق ورىس دراما تەاترىنىڭ اكتريساسى سۆەتلانا فورتۋنا (سۋرەتتە) توپ جاردى.
رەسپۋبليكالىق مەملەكەتتىك اكادەميالىق كورەي مۋزىكالىق تەاترى كورسەتكەن تسوي ەن گىننىڭ «پاتشايىم بولۋ وڭاي ما؟» قويىلىمى ۇزدىك سپەكتاكل اتاندى. سونداي-اق, «رەجيسسەرلىك ىزدەنىس ءۇشىن», «ۇزدىك ستسەنوگرافيا», «ەكىنشى پلانداعى ۇزدىك ەر ادام بەينەسى», «ەكىنشى پلانداعى ۇزدىك ايەل بەينەسى», «ءۇمىت», «ۇزدىك اكتەرلىك انسامبل» اتالىمدارىنداعى جۇلدەلەر يەلەرىن تاپتى. شارانىڭ سوڭى ۇلتتىق تەاترلار ارتىستەرىنىڭ كونتسەرتىنە ۇلاستى.
بۇل فەستيۆال ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ءۇشىن دە تابىستى بولدى. قاللەكيلىكتەردىڭ «اققۋدىڭ كوز جاسى» ليريكالىق دراماسىن تاماشالاعان لوندونداعى ايتماتوۆ اكادەمياسىنىڭ باسشىسى راحيما ابدۋۆاليەۆا وسى ونەر ۇجىمىن اتالمىش قويىلىممەن انگليا استاناسىنىڭ ساحناسىنا شاقىردى.
امانعالي قالجانوۆ
