«استانا وپەرا» تەاترىنىڭ ۇلكەن زالىندا ءىى حالىقارالىق «جىبەك جولى» فەستيۆالىنىڭ جابىلۋ سالتاناتىنا ارنالعان گالا-كونتسەرت بولدى.
كورەرمەنگە كوتەرىڭكى كوڭىل-كۇي سىيلاعان كەرەمەت كەشتە انتيكالىق داۋىرلەردەن-اق ورەلى ونەرىمەن اتى شىققان يتاليادان ارنايى شاقىرىلعان اتاقتى سىرنايشى نەللو سالتسا مەن داۋلەسكەر ديريجەر ماسسيمو سكاپين باستاعان ساحنا ساڭلاقتارى بارىن سالىپ باقتى. «استانا وپەرا» تەاترىنىڭ سيمفونيالىق وركەسترى ويناۋعا وتە كۇردەلى پەسا سانالاتىن ج.ب.ارباننىڭ «ۆەنەتسيا كارناۆالى» تاقىرىبىنداعى ۆارماتسياسىن ورىندادى. بۇگىندە ەلوردامىزداعى ەڭ ىرگەلى مادەنيەت ورداسىندا ەڭبەك ەتىپ جۇرگەن رەسەيدىڭ حالىق ءارتىسى التىناي اسىلمۇراتوۆانىڭ جەتەكشىلىگىندەگى بالەت ترۋپپاسىنىڭ جاڭا حورەوگرافيالىق نومىرلەرى دە كوپشىلىك كوزايىمىنا اينالدى. كونتسەرتتىك باعدارلامادا سونداي-اق, كلاسسيكالىق مۋزىكا جاۋھارلارى دا كەڭىنەن قامتىلدى.
وسى ورايدا ايرىقشا ايتا كەتەرلىك ءبىر جايت, 25 قىركۇيەكتە شىمىلدىعى تۇرىلگەن بۇل فەستيۆال ەلىمىزدىڭ مادەني-رۋحاني ومىرىندەگى ەلەۋلى وقيعا رەتىندە ەستە قالدى. ءبىر جارىم اي بويى التىن سارايداي «استانا وپەرا» تەاترىنىڭ سامالاداي ساحناسىندا جاھاندىق وپەرانىڭ جارىق جۇلدىزدارى يتاليالىق دجۋليو بوسكەتتي, جاپونيالىق اكيكو حوياكاۆا, المانيالىق ميحايل اگافونوۆ, رەسەيلىك ميحايل ۆەكۋ, وزبەكستاندىق ءناجميددين ماۆليانوۆ جانە باسقالار اۋەلەتىپ ءان شىرقادى. استانالىقتار مەن قالا قوناقتارىنىڭ نازارىنا ۇزىن-سانى 14 قويىلىم, 9 كونتسەرت ۇسىنىلدى.
قازاقستاندىق ونەرپازدار وزدەرىنىڭ شەتەلدىك ارىپتەستەرىمەن تاجىريبە الماسىپ, ورىنداۋشىلىق ەرەكشەلىكتىڭ قىر-سىرىن مەڭگەردى. مۇنداي كاسىبي شىڭدالۋ مەكتەبىنىڭ شەبەرلىك دارىستەرى كىم-كىمگە دە پايدالى بولسا كەرەك.
استاناعا ات باسىن بۇرعان مارتەبەلى مەيماندارىمىز دا اعىنان جارىلىپ, جىلى پىكىرلەرىن ءبىلدىرىپ جاتتى. كوپتەگەن مۋزىكانتتار «جىبەك جولى» فەستيۆالىنىڭ ارقاسىندا قازاق ونەرىنىڭ اسىل قازىنالارىمەن تانىسۋعا مۇمكىندىك تۋعانىن اسا ريزاشىلىقپەن اتاپ ءوتتى. «فەستيۆالعا شاقىرىلعانىمدا, جەرگىلىكتى حالىقتىڭ ءتول تۋىندىلارىن ورىنداعىم كەلدى. الدىن الا اقىلداسۋ ارقاسىندا قازاقستاندىق ارىپتەستەرىم كورنەكتى كومپوزيتورلارىڭىز مۇقان تولەباەۆتىڭ «پوەما» اتتى شىعارماسىن بەردى. ونىمەن تانىسقان بويدا كوكەيىمە قونا كەتتى» دەيدى ايگىلى جاپونيالىق سكريپكاشى كەن ايسو.
ال, پولشالىق وپەرا ءانشىسى كاتاجينا ماتسكەۆيچ قازاقستاندا وپەرا مەن بالەتكە ۇلكەن قىزىعۋشىلىقتىڭ بارلىعىنا قۋاناتىنىن جاسىرمادى. ونىڭ دالەلى رەتىندە ءاربىر كورسەتىلىمى تولىق انشلاگپەن وتەتىن عاجايىپ تەاتر عيماراتىن العا تارتا سويلەدى.
«استانا وپەرا» تەاترىنىڭ مۇرىندىق بولۋىمەن ۇيىمداستىرىلعان مۇنداي ءىرى ءىس-شارالار تاۋەلسىز مەملەكەتىمىزدى دۇنيە جۇزىنە كەڭىرەك تانىتۋعا يگى اسەرىن تيگىزەرى انىق.
تالعات باتىرحان
