ەلوردادا «LAULA-2017» حالىقارالىق بالالار بايقاۋىنا ەلىمىزدىڭ توعىز ءوڭىرى مەن رەسەيدىڭ بىرقاتار قالالارىنان ونەرپازدار قاتىستى. بيىل العاش رەت وتكىزىلگەن شىعارماشىلىق سايىسقا 820 ءوتىنىش كەلىپ ءتۇستى.
بايقاۋدا وقۋشىلار سارايىنىڭ تاربيەلەنۋشىلەرى مەن ەلورداداعى بالالار شىعارماشىلىق ۇجىمدارى بەلسەندىلىك
تانىتتى. ەڭ جاس قاتىسۋشى – سەمەي قالاسىنداعى بالاباقشادان كەلگەن «نۇرشاشۋ» ءانسامبلى بولدى.
ۇيىمداستىرۋشىلاردىڭ ايتۋىنشا, ماقسات – بالالار مەن جاسوسپىرىمدەر
اراسىنداعى دارىندى
ورىنداۋشىلاردى انىقتاپ, ولاردىڭ جەتىستىكتەرىن بىلىكتى ماماندارعا كورسەتۋ.
بالالار بايقاۋىندا
ءتۇرلى اتالىمدارعا قازۇوۋ پروفەسسورى ورىنباي دۇيسەن, قر ەڭبەك سىڭىرگەن ءارتىسى گۇلنار حامزينا, مەملەكەتتىك «ناز» ءانسامبلىنىڭ جەتەكشىسى حاديشا اعىمباەۆا, يۋنەسكو جانىنداعى حالىقارالىق كوركەم سىنشىلار قاۋىمداستىعى ۇلتتىق سەكتسياسىنىڭ مۇشەسى ارداق يۋسۋپوۆا مەن «وقۋشىلار سارايىنىڭ» ديرەكتورى ۇمسىن ارقاباەۆا قازىلىق ەتتى.
قازىلار القاسىنىڭ مۇشەسى گۇلنار حامزينا «بالالاردىڭ شىعارماشىلىق دەڭگەيى جىلدان جىلعا ارتىپ كەلەدى. كوپتەگەن جاڭا بالالار اندەرى پايدا بولدى. قازىلار القاسىنىڭ شەشىمىمەن بايقاۋدىڭ گران-پري يەگەرى ابدراحمان ەربولاتتى ريگا قالاسىندا وتەتىن حالىقارالىق كونكۋرسىنا جىبەرۋ كوزدەلىپ وتىر» دەگەن پىكىرىن ءبىلدىردى.
سايىس سوڭىندا بارلىق قاتىسۋشىلار بايقاۋدىڭ ديپلومانتى اتاندى. 35 قاتىسۋشى ءبىرىنشى ورىندى يەلەنسە, 48 قاتىسۋشى ەكىنشى ورىندى ەنشىلەدى. ال 47 ۇمىتكەر ءۇشىنشى ورىندى قانجىعالادى. ءتورت نوميناتسيا بويىنشا ءتورت ءجاسوسپىرىم گران-پري يەگەرى اتاندى.
گۇلدانا تالعاتقىزى
