ەلىمىزدە بولاشاعىنان ءۇمىت كۇتتىرەتىن جاس سۋرەتشىلەر از ەمەس. سولاردىڭ ءبىرى – «ۇستاز – ۇلى ەسىم», «كۇز بوياۋى», «ماڭگى ەل – قازاقستانىم», «مەنىڭ انام – دۇنيەدەگى ەڭ جاقسى ادام» سياقتى رەسپۋبليكالىق, حالىقارالىق بايقاۋلاردىڭ جۇلدەگەرى جارقىن تاستانبەك.
بالدىرعان شاعىنان ونەرگە اۋەس بولىپ وسكەن ول دومبىرا, حور ۇيىرمەلەرىنە قاتىسىپ, سازبەن جانۋارلاردى, اڭداردى مۇسىندەۋدى سۇيىكتى ىسىنە اينالدىرعان. 2014 جىلدان بەرى استاناداعى №8 ورتا مەكتەبىنەن ءبىلىم العان العىر وقۋشى فيزيكا مەن قازاق ءتىلى ءپاندەرىنەن وليمپيادالارعا قاتىسىپ, جۇلدەلى ورىندارعا يە بولادى. ۇلگىلى وقۋشى رەتىندە تانىلعان جارقىن 8-سىنىپتان كەيىن قازاق ۇلتتىق ونەر ۋنيۆەرسيتەتىنىڭ دارىندى بالالارعا ارنالعان مەكتەپ-ينتەرناتىندا «كەسكىندەمە جانە ءمۇسىن» ماماندىعى بويىنشا ءبىلىمىن جەتىلدىرۋدە.
«اكادەميالىق كەسكىندەمەنىڭ تەحنيكاسىن مەڭگەرۋ كوپ سۋرەت سالۋدى, تالماي ەڭبەكتەنۋدى قاجەت ەتەدى. ال جارقىننىڭ ونەرگە دەگەن قۇلشىنىسى زور. ەڭبەكقورلىعى تاعى بار. سونىڭ ارقاسىندا ءبىراز جەتىستىككە دە جەتىپ ءجۇر» دەيدى مادەنيەت سالاسىنىڭ ۇزدىگى, وقىتۋشى گۇلنار ماحانبەتجانوۆا شاكىرتى جايلى.
جالپى, جاس سۋرەتشىنىڭ شىعارمالارىندا اكۆارەل بوياۋى ارقىلى شىنايى قىس بەينەلەرى, اۋىل مەن قالا تابيعاتى, استانا قالاسىنىڭ كورىكتى عيماراتتارى كورىنىس تاپقان. كەيىپكەرىمىز كەلەشەكتە ۇزدىك تۋىندىلاردى ومىرگە اكەلەتىن ۇلكەن قىلقالام شەبەرى بولۋدى ارماندايدى. «تالاپتىعا نۇر جاۋار» دەگەندەي, ورەلى ورەننىڭ ونەرى ورگە ءجۇزسىن دەيمىز. ونىڭ اتا-اناسى مەن ۇستازدارى دا جارقىننىڭ بولاشاعىنىڭ جارقىن بولارىنا سەنىمدى.
