«قازاق ەنتسيكلوپەدياسى» باسپاسىنان جازۋشى, كينودراماتۋرگ, كۇيشى, ادەبيەت جانە ونەر زەرتتەۋشىسى تالاسبەك اسەمقۇلوۆتىڭ بەس تومدىعى جارىق كوردى.
سەگىز قىرلى, ءبىر سىرلى ازاماتتىڭ جارى زيرا ناۋرىزباەۆانىڭ ايتۋىنشا, بۇل – تالاسبەكتىڭ ارتىندا قالعان مۇرالارىنىڭ جارتىسى عانا. الدا تاعى وسىنداي كولەمدەگى ەڭبەكتەرىن شىعارۋ جوسپاردا بار.
ال وقىرماننىڭ قولىنا ءتيىپ جاتقان بەس تومدىققا توقتالساق, ءبىرىنشى تومىندا جازۋشىنىڭ قازاقتىڭ كۇي ونەرى تۋرالى جازعان روماندارى جيناقتالعان. سونىڭ ىشىنە «ءتالتۇس», «كارى كۇيشى» جانە اياقتالماعان «تاتتىمبەت cەرى» شىعارمالارى ەنگىزىلگەن.
ەكىنشى تومىنان دا پروزالىق شىعارمالارمەن قاتار, كينورومانداردى تابا الاسىز. «ءبىرجان سال», «تۇمار پاديشا», «قۇنانباي» كوركەم فيلمدەرىنىڭ ستسەناريلەرىمەن جانە وزگە دە اڭگىمە-پوۆەستەردى وسى كىتاپتان تابا الاسىزدار.
ءورىستىلدى وقىرماندار وسى كينورومانداردى ءۇشىنشى تومنان وقي الادى. ال ءتورتىنشى جانە بەسىنشى تومدار ارقىلى زەرتتەۋشى تالاسبەكتى تانيسىز. العاشقىسىندا مۋزىكا جايلى, بايىرعى مۋزىكالىق تەرمينولوگيا تۋرالى ويلارىن وقي الاسىز. سونداي-اق, كۇي ونەرىنىڭ ءتاڭىرىسى تاتتىمبەت قازانعاپۇلى جونىندە جان-جاقتى مالىمەتتەرگە قانىعاسىز. بۇعان قوسا, كۇيشى سۇگىر اۋلەتىمەن تانىساسىز. ءۋالي بەكەنوۆ, ءشامىل ابىلتاەۆ, جانعالي ءجۇزباي, سەكەن تۇرىسبەك سىندى كۇي ونەرىنىڭ مايتالماندارىنىڭ, قوبىزشى سماتاي ۇمبەتباەۆتىڭ ونەرىنە تالاسبەكتىڭ بەرگەن باعاسىن بىلەسىزدەر. سونىڭ ىشىندە جىرشى بەرىك ءجۇسىپوۆ پەن ءانشى ماقپال ءجۇنىسوۆا تۋرالى جازعاندارى دا بار. وسى ءتورتىنشى تومنان ادەبيەتتانۋشى تالاسبەكتىڭ ادەبيەت جونىندەگى ويلارى مەن ۇلى ابايدان باستاپ ۆاسيلي شۋكشين, اسىلبەك ىقسان سىندى جازۋشىلاردىڭ ەڭبەكتەرىنە كوزقاراسىن تاني تۇسەسىز.
بەسىنشى تومدا ميفولوگيا, تاريح, ەتنوگرافيا تۋرالى زەرتتەۋلەر توپتاسقان. مۇندا زەرتتەۋشى قازاق ەپوسىنان تارتىپ, باتىرلىعىمەن دە, كۇيشىلىگىمەن دە اتى شىققان كەتبۇقا تۋرالى ويلارىن ايتادى. شىعىستان باتىسقا قاراي ويىسىپ, تۇتاس عالامدى قامتيدى.
جۋىردا استانادا جانە الماتىدا بەس تومدىقتىڭ رەسمي تۇردە تانىستىرىلىمى بولادى.
امانعالي قالجانوۆ
