اپتانىڭ العاشقى كۇندەرىندە قازاق ۇلتتىق ونەر ۋنيۆەرسيتەتىندە تۇركى حالىقتارى ءداستۇرلى مۋزىكاسىنىڭ كەشى ءوتتى. اۋقىمدى شارا وتكەن اپتادا باستالعان ءىستم بۇكىلالەمدىك كونفەرەنتسياسىنىڭ اياسىندا ۇيىمداستىرىلدى.
ءداستۇرلى مۋزىكا كەشتەرىندە جامبىل اتىنداعى زالدا ينە شانشار ورىن بولمادى. شارادا الەمنىڭ 70-تەن استام ەلىنەن كەلگەن مۋزىكا زەرتتەۋشىلەرى مەن ساراپشىلارى, استانالىق ستۋدەنتتەر جانە قاراپايىم كورەرمەندەردىڭ باسىن قوسقان ءبىر عانا سەبەپ – ول, تۇركى حالىقتارىنىڭ مادەنيەتىنە دەگەن قىزىعۋشىلىق ەدى.
فەستيۆالدىڭ العاشقى كۇنىندە ۇيىمداستىرىلعان كەشتە تۇركيا, ازەربايجان, وزبەكستان, تۇركىمەنستان ەلدەرىنەن كەلگەن انسامبلدەر ونەر كورسەتتى. ورتا عاسىرلاردا قالىپتاسقان قالالىق جانە دالالىق مادەنيەتتى ناسيحاتتاۋشىلاردىڭ كونتسەرتى باسقا قۇرلىقتان كەلگەن باسقا مادەنيەتتىڭ وكىلدەرىن بەي-جاي قالدىرمادى. ماسەلەن, ءدال وسى كەشتە تىڭدارماندار ۇيعىردىڭ مۇقام, ازەربايجاننىڭ مۇعام جانە وزبەك-تاجىكتىڭ شاشماقوم, كاتتا اشۋلا جانرلارىنداعى شىعارمالارىمەن جاقىنىراق تانىستى. اسىرەسە, شەتەلدەن كەلگەن قوناقتار ءۇشىن تامىلجىعان ءان مەن تارەلكەنىڭ تاندەمى («كاتتا اشۋلا») توسىنسىي بولعانداي. ايتەۋىر, وزبەك انسامبلىنە كورسەتىلگەن قۇرمەتتە ەسەپ بولمادى.
شەتەلدىك قوناقتاردىڭ ءداستۇرلى ءان ونەرىنە, دومبىراعا دەگەن ىقىلاسى دا الابوتەن ەكەن. ءداستۇرلى انشىلەر ەركىن شۇكىمانوۆ «اق قايىڭدى», ەرلان رىسقالي «اسەتتىڭ ءانىن» اۋەلەتە شىرقاعان كەزدە زال ءىشى تولاسسىز شاپالاقتان دۇرىلدەي جونەلدى. قازاق ەلىندە العاش رەت وتكىزىلىپ وتىرعان بۇكىلالەمدىك كونفەرەنتسيادا قازاقتىڭ ءداستۇرلى انشىلەرىنە ايرىقشا ءىلتيپات ءبىلدىرىلۋى, ارينە, قۋانتارلىق جايت.
فەستيۆالدىڭ وزگەشە سيپاتتا وتۋىنە دۇنيەنىڭ تۇكپىر-تۇكپىرىنەن كەلگەن مۋزىكا سالاسىنىڭ وكىلدەرى دە وزىندىك ۇلەستەرىن قوستى دەۋگە بولادى. شەتەلدىك قوناقتار سونداي قاراپايىم. بىزگە ولاردىڭ بوس ورىن بولماسا, كەز كەلگەن جەرگە وتىرا كەتەتىنى قىزىق كورىندى. سونداي-اق, ولاردان قاجەت جەرىندە ونەرپازدارعا قولداۋ كورسەتۋدى, كونتسەرت اياقتالعانشا, ءبىر ورىندا تاپجىلماي وتىرۋدى ۇيرەنسەك, ارتىقتىق ەتپەيتىندەي. سايىپ كەلگەندە, مۇنىڭ ءبارى – ونەرگە دەگەن قۇرمەت.
فەستيۆالدىڭ ەكىنشى كۇنى «قازاقتىڭ زاماناۋي سيمفونيالىق مۋزىكاسى» تاقىرىبىنا ارنالدى. بۇل كەشتە ەركەعالي راحماديەۆ, تىلەس قاجىعاليەۆ, سەرىك ەركىمبەكوۆ, سەرىك ءابدىنۇروۆ سەكىلدى بەلگىلى كومپوزيتورلارىمىزدىڭ شىعارمالارى وينالدى. ۇيعىر, قازاق, قىرعىز, تۇركىمەن, وزبەك, تۇرىك, ازەربايجان حالىقتارىنىڭ ءداستۇرلى جانە سيمفونيالىق مۋزىكاسىن ناسيحاتتاعان كەشكى كونتسەرتتەر تىڭدارماندارعا ءتۇبى ءبىر تۇركى حالىقتارى مادەنيەتىنىڭ ۇندەستىگىن تاعى ءبىر مارتە بايقاتتى.
روزا ارەن
