«وبىر قاۋپى بار» دەگەن دارىگەردىڭ دياگنوزى اركىمگە دە اشىق كۇندە جاي تۇسكەندەي اسەر ەتەدى. مۇندايدا جاقىن-جۋىعى جاقسى دارىگەر ىزدەپ, جان-جاققا سابىلادى. الدىمەن اۋداننان وبلىسقا بارادى. ولار ءبىر شەشىمگە كەلەر بۇرىن ناۋقاستىڭ اناليزدەرىنىڭ الدىن الماتىعا جىبەرەدى. ءۇمىت پەن كۇدىك ارالاسقان كۇندەر زۋىلداپ ءوتىپ جاتىر. جامان ايتپاي جاقسى جوق, مۇندايدا ەرتە قامدانعان ءجون. سودان جانىن شۇبەرەككە ءتۇيىپ, جاعدايى بارلار استاناعا كەلەدى.
نۇر-سۇلتاندا تەك وسى وبىرعا بەيىمدەلگەن جالعىز ونكولوگيالىق ورتالىق بار. مۇندا دەرتتى جازباي تانيتىن زاماناۋي قۇرالدار ءتۇرلى اپپاراتتارمەن جابدىقتالعان. باستىسى, بىلىكتى دە تاجىريبەلى دارىگەرلەر دە وسىندا جينالعان. بىراق…
وسى بىراقتىڭ باسىن اشىپ ايتقانىمىزدا جۇرەگىمىز بەن اقىلىمىز ەكىگە ءبولىنىپ, وزىمىزبەن ايتىسادى. جالپى تالاپ بويىنشا, ورتالىققا بولىنگەن قاراجات تەك استانالىقتاردى عانا ەمدەۋگە باعىتتالادى. بۇل دۇرىس, ميلليوننان استام حالقى بار قالانىڭ بيۋدجەتى رەسپۋبليكا اۋماعىن تۇگەل قامتۋعا شاماسى جەتپەيدى. وزگە وڭىرلەردىڭ ادامدارىنا ءوز جەرىندە قاراجات بولىنگەن. سوندا ەڭبەك ەتىپ جۇرگەن دارىگەرلەرى بار دەگەندەي. وسى بيۋدجەتتىڭ ەسەبىندە ەمدەلگىڭىز كەلسە, وندا قالاعا تىركەلىپ, ەمحاناعا بەكىتىلىپ, ەمىڭىزدى الىڭىز. اقىلدىڭ ءۋاجى – وسى. ەندى جۇرەگىمدى تىڭدالىق.
جامان اۋرۋدىڭ لەبى شالىپ وتكەندەردىڭ كوبى شالعاي اۋىلداردا تۇرادى. تۇرىپ جاتقان جەرىنەن وبلىس ورتالىقتارى مەن استانانىڭ اراسىن ەسەپتەگەندە جول اراسى بىردەي دە بولىپ جاتادى. ءبىر جانىن الىپ قالسا, استانانىڭ دارىگەرلەرى الىپ قالاتىنداي اڭسارى اۋاتىنى دا سوندىقتان.
بىراق بەلگىلەنگەن تارتىپتەن ەشكىم اتتاپ وتپەيدى. تۇپتەپ كەلگەندە, ايىقپاس دەرتكە شالدىققان ناۋقاستى تاڭداۋ مۇمكىندىگىنەن ايىرعانداي بولامىز. ويتكەنى بارلىعى دا – قازاقستاننىڭ ازاماتتارى, كەڭ-بايتاق ءوز ەلىمىزدىڭ تۇرعىندارى. باسقا-باسقا جامان كەسەل كەلگەندە نەگە قالاعان جەرىندە اقىرعى ەمىن الماسقا؟ مۇمكىن ۇلكەن جەردىڭ ەمى وڭىنان كەلىپ, ساۋىعىپ تا كەتەر. بولماسا, دەر كەزىندە العان دۇرىس ەمنىڭ شيپاسى ءومىرىن بەس-التى جىلعا سوزىپ بەرەر. بىراق… تاڭداۋ از.
اياعى استاناعا جەتكەندەر قالتاسى كوتەرسە, ورتالىقتان اقىلى تۇردە قىزمەت الادى. ورتا ەسەپپەن ءبىر اۋرۋدى انىقتاۋ ءۇشىن 20-شاقتى اناليز قاجەت دەپ ەسەپتەسەك, وندا ونىڭ باسى 40-30 مىڭنان باستالىپ, سوڭى 7-8 مىڭمەن اياقتالادى.
باسىڭىزعا بەينەت ءتۇسىپ كەلگەندە نۇر-سۇلتاندا جاناشىر تۋىسىڭىز بولسا جاقسى. ول ءۇيىنە تىركەۋگە قويىپ, ەمحاناعا بەكىتەدى. ەمحاناعا تىركەلىپ بولعان سوڭ, ونكولوگ دارىگەرگە بارىپ ورتالىققا جولداما الادى. ونىمەن مامان-دارىگەرگە كورىنەسىز. ول بىرقاتار تالداۋلارىن ەمحاناعا جاساتۋعا كەڭەس بەرىپ, كەيبىرىن قالانىڭ كەڭ سپەكترلى زەرتحانالارىنا, نە ورتالىقتىڭ زەرتحاناسىنا جىبەرەدى. سونىمەن زەرتحانا ناتيجەلەرى قولىڭىزعا تيگەندە اق حالاتتى جانداردىڭ كەلەلى كەڭەسىن تىڭدايسىز. وبىر قاتەرى اينالىپ وتسە, جاقسى. الايدا مۇنداي كۇدىكپەن كەلگەندەردىڭ دياگنوزى كوبىنە راستالادى. تەك, وبىردىڭ كەۋلەگەن كەزەڭىن, ستادياسىن انىقتاپ, قانداي ەم جاسالاتىنى شەشىلەدى. حيمياتەراپيا, وتا, ساۋلەلى ەم, تاعىسىن تاعى ەم-شارا كۆوتا ارقىلى, تەگىن مەديتسينالىق كومەكتىڭ كەپىلدىك بەرىلگەن كولەمىنىڭ شەڭبەرىندە جاسالادى. ودان كەيىنگى ءپاللياتيۆتى كومەكتىڭ جايى بەلگىلى. وسىلايشا ناۋقاس جەردەگى «قىل كوپىردىڭ ۇستىمەن» ءوتۋى ءتيىس. ەگەر قالتاسىندا قاراجات بولماسا, باسقا سالماسىن. بۇل – قالادا تۇرامىن دەگەن قۇقىڭىز بولعانداعى جاعداي.
بۇل ماسەلە جەرگىلىكتى باسقارۋ ورىندارىندا دا كوتەرىلىپ ءجۇر. قالاعا كوبىنە سولتۇستىك وڭىرلەردەن كەلىپ جاتادى. سوندىقتان دا بولار, ەكى قالانىڭ وسى سالاداعى جەتىستىكتەرى ايتارلىقتاي. ال ستاتيستيكا بويىنشا ەلوردادا ەم العان ءاربىر بەسىنشى ادامنىڭ بىرەۋى باسقا وڭىردەن كەلەتىنى دە سوندىقتان. بۇل رەتتە وزگە ءوڭىردىڭ اق حالاتتى جاندارىنىڭ قىزمەتىنە شاك كەلتىرگىمىز كەلمەيدى. دەگەنمەن, كەرەك دەسە ەمحاناسىنا تىركەلىپ, تەگىن ەم الۋدىڭ ىزىنە تۇسكەندەردىڭ جولىن جەڭىلدەتىپ, نەگە ورتالىقتا ايماقتان كەلگەندەرگە مۇمكىندىك جاساماسقا؟! قاجەت بولسا كەلگەن وڭىرلەرىندەگى وسىنداي ناۋقاسقا بولىنگەن قاراجاتتى ورتالىققا اۋدارتىپ الماسقا. ودان قالدى ورتالىق ارقاداعى وسىنداي ورىندارمەن بايلانىسىپ, ەمدەۋ جولدارىن جەتىلدىرۋگە قولعابىس بەرسە كوش تۇزەلەر ەدى.
ازىرگە, كوكىرەگىنە ۇرەي كىرگەن, وبىر قاۋپى بارلار ورتالىقتاردى جاعالاپ, دەرتىنە ءدارۋ ىزدەپ ءجۇر. ءمۇساپىر قالپى مۇنداعى اعايىندارىنىڭ جانىن اۋىرتىپ, ولار دا تانىس دارىگەر ىزدەپ, بىرگە سارسىلۋدا. ەسىكتى تەۋىپ اشىپ بارعىسى كەلسە اقشاسى از, بارمايىن دەسە اۋرۋدىڭ بەتى جامان. قالاعان جەرىندە ەم الىپ, اقىرعى جىلدارىن مۇمكىن ايلارىن لايىقتى وتكىزگىسى كەلسە, تاڭداۋىن تارىلتىپ وتىرمىز.
