ەلوردادا تىلسىم مەن تاڭعاجايىپتى توعىستىرعان عيمارات بار. ول – استانا تسيركى. جانىنان وتكەن سايىن افيشاسىن قاراي وتەسىڭ. ءبىز ەمەس, بۇل جەرگە بالالاردىڭ ءوزى قۇمبىل. جاقىندا تسيرك ونەرپازى, جاپ-جاس جىگىت دارحان كامبىشەۆپەن تانىستىق. «الپامىس باتىر» تەاترلاندىرىلعان شوۋىندا باس كەيىپكەردى وينادى. ەتنواۋىلدا ءجۇرىپ, استانا تسيركى ەسىمە تۇسە كەتكەنى. وعان سەبەپ, دارحان جاپ-جاس بولا تۇرا, 20 جىلدان بەرى تسيرك ونەرىنە قىزمەت ەتەدى. الماتى تسيركىنىڭ ءارتىسى. سوندا استاناداعى سيقىرشىلار ورداسىنا قانشا جىل دەپ ويلادىم بىردەن. ارتىنشا وسى ماقالا جازىلدى…
بۇل عيمارات قۇرىلىسى 2002 جىلى باستالعان. قۇرىلىسىن جۇرگىزگەن – «كونتسەرن «نايزا-قۇرىلىس» مەكەمەسى. 2005 جىلى ەلباسى تسيرك عيماراتىنىڭ اشىلۋىنا قاتىستى. حالىقارالىق يلليۋزيونيستەر قاۋىمداستىعىنىڭ تولىق مۇشەسى, تاماشا ونەرپاز بالتابەك جۇماعۇلوۆ العاشقى ديرەكتور ەدى. بىراق, سيقىرشى 2005 جىلى كەنەتتەن كوز جۇمدى. بۇگىندە بۇل مەكەمەگە قازاقستاننىڭ ەڭبەك سىڭىرگەن ءارتىسى ەرىك جولجاقسىنوۆ باسشىلىق ەتەدى.
جوبا اۆتورى – ساۋلەتشى تولەگەن ءابىلدا ءوزىنىڭ سەرىكتەستەرىمەن بىرلەسە وتىرىپ, «ۇشاتىن تاباقشاعا» ۇقساعان بىرەگەي تسيرك عيماراتىن دايىنداعان. مەكەمەنىڭ كورەرمەندەرگە ارنالعان كلاسسيكالىق ديامەتردەگى (13 مەتر) ارەناسى بار. زالعا ءبىر مەزەتتە 2000 كورەرمەن سىيادى, 36 ورىندىق VIP-لوجا جەكە ورنالاسقان.
ۇجىمدا كاسىبي تسيرك ونەرى مايتالماندارى قىزمەت ەتەدى. وعان ءبىر عانا ولجاس جۇماعۇلوۆتىڭ اتىن ايتسا, جەتىپ جاتىر. ەرلى-زايىپتى سيقىرشى بالتابەك پەن رايسا جۇماعۇلوۆتاردىڭ ۇرپاعى. بالتابەك پەن رايسا ونەر كورسەتكەندە, مىڭداعان كورەرمەننىڭ ويى دا, كوزى دە الدانىپ قالاتىن. بالتابەكتىڭ تۇياعى اكەسىنىڭ جولىن جالعاپ, يلليۋزيا ونەرىنىڭ سوڭىندا ءجۇر. بۇگىندە ول – استانا تسيركى جاس تالانتتارىنىڭ ءبىرى. تسيركتە فوكۋسشى-يلليۋزيونيست, شاباندوز بولىپ جۇمىس ىستەيدى. قىتايدىڭ تسيركىمەن كەلىسىمشارتقا قول قويىپ, سول جاقتا 4 جىلداي جۇمىس ىستەپ كەلدى.
بۇگىندە تسيرك مايتالماندارىنىڭ كوكسەيتىنى – فرانتسياداعى ەڭ ءىرى, دۇنيەجۇزىلىك مونتە-كارلو بايقاۋىندا توپ جارۋ. زاماناۋي تسيرك ونەرىندە بۇعان دەيىن بۇل بايقاۋدىڭ باس جۇلدەسىن العان بالتابەك جۇماعۇلوۆ قانا. ول – وسى بيىكتى باعىندىرعان جالعىز قازاق.
قارلىعا يبراگيم
