كورنەكتى جازۋشى, مەملەكەتتىك سىيلىقتىڭ لاۋرەاتى اكىم تارازيدىڭ 85 جىلدىق مەرەيتويى قازاق ۇلتتىق ونەر ۋنيۆەرسيتەتىندە جالعاستى.
اكىم اعامىز ءبىراز جىلداردان بەرى وسى وقۋ ورداسىندا قىزمەت ىستەيدى. جاستارعا دراماتۋرگيا سالاسىنان ءدارىس وقيدى. ۇلتتىق ونەر ۋنيۆەرسيتەتىنىڭ پروفەسسورى. سوندىقتان ىرگەلى وقۋ ۇجىمى پاراساتتى سۋرەتكەردىڭ مەرەيتويىن ءۇش كۇن بويى دۇركىرەتىپ وتكىزدى. الدىمەن «تارازي تاعىلىمى» دەگەن ادەبي كەشتىڭ شىمىلدىعى ءتۇرىلدى. زيالىلار مەن شەت مەملەكەتتەردەن كەلگەن قوناقتار جينالعان كەشتە ەلباسىنىڭ قابىرعالى قالامگەرگە ۇزاق عۇمىر مەن شىعارماشىلىق تابىس تىلەگەن قۇتتىقتاۋى وقىلدى. ۋنيۆەرسيتەت رەكتورى, ەڭبەك ەرى ايمان مۇساقوجاەۆا دا جازۋشىعا ىزگى لەبىزىن ءبىلدىرىپ, سىي-قۇرمەت كورسەتتى. قازاقستان جازۋشىلار وداعىنىڭ توراعاسى ۇلىقبەك ەسداۋلەت ءسوز زەرگەرىنىڭ قازاق ادەبيەتىنىڭ قازىناسىنا قوسىلعان سۇبەلى ەڭبەگىن جوعارى باعالادى. تۇركيا, ازەربايجان, وزبەكستان سەكىلدى الىس-جاقىن ەلدەن كەلگەن قوناقتار كەش يەسىنە تۋعان ەلدەرىندەگى ادەبي قاۋىمنىڭ ىستىق سالەمىن جەتكىزدى. اسەرلى ءسوز بەن قۇنارلى ويعا ورىلگەن كەش اۋەلەگەن ءان مەن كۇمبىرلەگەن كۇيگە تولى بولدى.
كەش جالعاسى قازاق ۇلتتىق ونەر ۋنيۆەرسيتەتىنىڭ پروفەسسورى ءنازيرا مۇقىشەۆانىڭ «اكىم تارازي – كينودراماتۋرگ. «تۇلپاردىڭ ءىزى»: ستسەناريدەن فيلمگە دەيىن» جانە جۋرناليست ۇلاربەك نۇرعالىمنىڭ «جازۋشى جانى. اكىم تارازي پروزاسىنداعى ۇلتتىق بولمىس» دەپ اتالعان ەكى كىتاپتىڭ تانىستىرىلىمىنا ۇلاستى.
العاشقى جيناق قازاق كينوسىنىڭ ايشىقتى تۋىندىلارىنىڭ ءبىرى اكىم اعانىڭ ستسەناريى بويىنشا تۇسىرىلگەن «تۇلپاردىڭ ءىزى» فيلمىنە (رەجيسسەرى ءماجيت بەگالين) ارنالعان. اۆتور وسى كينونىڭ ستسەناريىنە تەرەڭ تالداۋ جاسايدى. ال ەكىنشى كىتاپقا جاس ادەبي زەرتتەۋشى جازۋشى پروزاسىنداعى كەيىپكەرلەر بەينەسىن ۇلتتىق بولمىسپەن سالىستىرا وتىرىپ زەردەلەيدى.
كەلەسى كۇنى ايتۋلى قالامگەردىڭ شىعارماشىلىعىنا ارنالعان حالىقارالىق عىلىمي-تاجىريبەلىك كونفەرەنتسيا ءوتتى. مۇندا جان-جاقتان جيىلعان عالىمدار, بولمىسى ءبولەك تارازيدىڭ شىعارماشىلىعى تۋرالى ورالىمدى ويلارى مەن ۇنامدى پىكىرلەرىن ورتاعا سالدى.
مەرەيتويعا ارنالعان ءىس-شارالار سوڭى قازاق ۇلتتىق ونەر ۋنيۆەرسيتەتىنىڭ كينوزالىندا سۋرەتكەردىڭ ستسەناريى بويىنشا ءتۇسىرىلگەن فيلمدەر كورسەتىلىمىمەن قورىتىندىلاندى.
