ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ «حالىق قازىناسى» ۇلتتىق ونەر ورتالىعى ۇلتتىق ونەردى دارىپتەۋگە ارنالعان جاڭا فورماتتاعى «ءبىزدىڭ جارمەڭكە» جوباسىن ۇسىنىپ, قوياندى, كوكجار, قاراوتكەل سىندى تاعىلىمى مول تاريحي جارمەڭكەلەردى جاڭعىرتتى.
جارمەڭكەنىڭ ءسانىن كەلتىرگەن قولونەرشىلەر, ۇلتتىق كيىم ديزاينەرلەرى, زەرگەرلەر مەن قىش شەبەرلەرى جينالعان قاۋىمدى ەرەكشە بۇيىمدارىمەن ءتانتى ەتتى. ءجۇن ءتۇتىپ, ۇرشىق يىرگەن, تەكەمەتتىڭ ءتۇر-ءتۇرىن كورسەتكەن شەبەرلەردىڭ جۇمىسى, ءسانى ايرىقشا ۇلتتىق كيىمدەر, تەرىدەن جاسالعان زاتتار, ۇلتتىق ناقىشتاعى زەرگەرلىك بۇيىمدار, قۇراق كورپە, قورجىن, ت. ب. بۇيىمدار حالقىمىزدىڭ ىسمەرلىك, ۇستالىق جانە زەرگەرلىك ونەرى جوعارى دەڭگەيدە دامىعانىن اڭعارتتى.
بۇعان قوسا, كورەرمەندەر توعىزقۇمالاق, لاڭگى, اسىق سىندى ۇلتتىق سپورت تۇرىنەن وتكىزىلگەن جارىستى تاماشالاي الدى. بوز كىلەمدە بەلدەسكەن بالۋاندار, اسىق اتىپ, توعىزقۇمالاق ويناپ جارىسقان جاستار جارمەڭكەلەردى تەك ساۋدا-ساتتىقتىڭ عانا ەمەس, سونىمەن قاتار سپورت ونەرىنىڭ دە ورداسى بولعانىن كورسەتە ءبىلدى.
تەاترلاندىرىلعان قويىلىم تۇرىندە وتكەن كونتسەرتتە ەرلان رىسقالي, جانعالي ءجۇزباي, ەربولات شالدىبەكوۆ, تولعانباي سەمباەۆ, ەلمۇرا جاڭابەرگەن, مەدەت سالىقوۆ, كلارا تولەنباەۆا, ايگۇل ەلشىباەۆا, ارداق بالاجانوۆا, قۇماربەك قالقاتاي, نۇربولات ارزاماسۇلى, راۋشان ورازباەۆا, پەريزات تۇراروۆا, ايزات قارابەكوۆا, كۇنسۇلۋ تۇرىكپەن, دىنيسلامبەك جايلاۋباي, اسقار مۇقيات, ءبىرجان ايتاحمەتوۆ, سەرىك نۇرمولداەۆ, ارداق ەلەۋسىز, ۆەنەرا تابىس, باۋىرجان مۇحامەتباي, نۇربانۋ جۇرتەكينا, نۇركەن ياكياەۆ, سالتانات ەرسۇلتان, ەرجىگىت اليەۆ, دارىن قۇدايبەرگەن, شولپان شاراپاتوۆا, جۇماگۇل قۋانىشقاليەۆا, ءادىل ءجۇنىسوۆ, رايحان ومار ونەر كورسەتتى. باۋىرجان اقتاەۆ جەتەكشىلىك ەتەتىن «استانا سازى» قازاق مەملەكەتتىك انسامبلى, «تۇران» فولكلورلىق انسامبلى, «قوبىز-رۋح» توبى, «مۇراگەر» بالالار ءانسامبلى, «Astana musical» مەملەكەتتىك تەاترى, «ناز» بي تەاترى دا ونەرىن ورتاعا سالدى.
