تاريحتان سىر تارتقان تۋىندىلار
تاۋەلسىزدىك سارايىندا «رۋحاني جاڭعىرۋ» باعدارلاماسى اياسىندا «قازاقستاندىق سۋرەتشىلەردىڭ تۋىندىلارى» اتتى ونەر كورمەسىنە ارنالعان اشىق ەسىك كۇنى ءوتتى.
كورمەگە ۇلتىمىزدىڭ ۇلى تاريحىنان سىر تارتقان وتاندىق قىلقالام شەبەرلەرىنىڭ 100-گە تارتا كارتينالارى قويىلدى. ولاردىڭ اراسىندا الپىسباي قازىعۇلوۆ, كاميل مۋللاشەۆ, جەڭىس كاكەنوۆ, راشيد قۇلباتىروۆ, اعىمسالى دۇزەلحانوۆ, سەمبىعالي سماعۇلوۆ جانە تاعى باسقا ەسىمدەرى ەلگە تانىمال سۋرەتشىلەردىڭ بەدەرى ايشىقتى تۋىندىلارى بار. تاريحتىڭ تەرەڭ تۇنىعىنان سىر تارتقان شىعارمالاردى كورگەن كەزدە بويىڭىزدا رۋح اتويلاپ, بابالاردىڭ ات ۇستىندەگى مىعىم وتىرعان بەينەسى كوز الدىڭىزعا كەلەدى.
«بۇگىندە ەلىمىزدە كوركەمسۋرەت ونەرى وتە جاقسى دامىعان. ءابىلحان قاستەەۆ سالعان جول بيىككە كوتەرىلدى. ءبىزدىڭ قىلقالام شەبەرلەرىنىڭ ءاربىر شىعارماسىنان ۇلتتىق بوياۋدىڭ ءيسى اڭقىپ تۇرادى. ماسەلەن, كورمەدەگى «قىز ۇزاتۋ», «جايلاۋدا», «شىعارىپ سالۋ» سەكىلدى ءداستۇرىمىزدى دارىپتەگەن كارتينالاردى كورىپ, كوڭىلىڭىز كوتەرىلەدى. وسى كورمە ارقىلى سۋرەتشىلەردىڭ ەڭبەگىن ەلگە كەڭىرەك ناسيحاتتاۋدى ماقسات ەتتىك» دەدى شارانى ۇيىمداستىرۋشى تىلەۋكەش جاۋباسوۆا.
مەرەي دىلدابەكوۆ