قازاقستان حالىق پارتياسىنىڭ وكىلدەرى نيكونوۆ, فەدوروۆ جانە جيرينوۆسكيلەرگە سالەمدەمە جولدادى. رەسەي فەدەراتسياسىنىڭ مەملەكەتتىك دۋماسىنا جولدانعان سالەمدەمەدە قازاقستاندىق كامپيتتەر بار.
شوكولودتاردىڭ بەتىندە قازاقستاننىڭ كارتاسى بەينەلەنگەن. قحپ مۇشەلەرى قازاق جەرىنىڭ اۋماقتىق تۇتاستىعىنا كوز الارتقان مالىمدەمەلەرگە جاۋاپ قاتتى.
«قۇرمەتتى ۆياچەسلاۆ نيكونوۆ, ەۆگەني فەدوروۆ جانە ۆلاديمير جيرينوۆسكي, جۋىردا سىزدەر قازاقستاننىڭ اۋماقتىق تۇتاستىعىنا قاتىستى قاتقىل مالىمدەمە جاسادىڭىزدار. ءبىزدىڭ وتانداستارىمىزدىڭ بۇعان ناقتى جاۋابى بار. سىرتقى ىستەر مينيسترلىگى ءوزىنىڭ ۇستانىمىن جەتكىزدى. سىزدەرگە كۇللى الەمنىڭ تۇرعىندارى جاقسى كورەتىن قازاقستاندىق شوكولادتاردى جىبەرىپ وتىرمىز. كامپيت جەڭىزدەر جانە ءبىزدىڭ تاريحىمىز بەن گەوگرافيامىزدى وقىڭىزدار!» دەلىنگەن قحپ-نىڭ جاستار قاناتىنىڭ رف مەملەكەتتىك دۋماسىنىڭ دەپۋتاتتارىنا جولدانعان سالەمدەمەدە.
ال قازاقستان حالىق پارتياسىنىڭ توراعاسى ايقىن قوڭىروۆ ەلىمىزدىڭ سولتۇستىك اۋداندارىندا قازاق حالقىنىڭ سالت-داستۇرلەرى جانە ادەپ-عۇرىپتارىن ناسيحاتتايتىن رۋحاني ورتالىقتاردى اشۋدى ۇسىندى. «ەلىمىزدىڭ رەسەيمەن شەكارالاس اۋداندارىندا مەملەكەتتىك تۋىمىز بەكىتىلگەن تۇعىرلار ورناتقان ءجون. ولاردىڭ كولەمى 15-20 سم بولۋى ءتيىس. كوك بايراعىمىز رەسەيدىڭ اۋماعىنان دا كورىنىپ تۇرسا, نۇر ۇستىنە نۇر بولار ەدى. مىنە, سونداي رۋحاني-اعارتۋ ورتالىعىن قاراساي جانە اعىنتاي باتىرلاردىڭ كەسەنەسى ماڭىنان سالايىق. ءبىز بۇل باستاماعا قاراجات جينايمىز, قازاقستاننىڭ بارلىق پاتريوتتارىن وسى ءىستى قولداۋعا شاقىرامىز» دەپ جازدى ا.قوڭىروۆ ءوزىنىڭ الەۋمەتتىك جەلىدەگى پاراقشاسىندا.
ول سونداي-اق «ولكەتانۋ» ءپانىن 5,6,7 سىنىپتارمەن قاتار بارلىق جوعارى سىنىپتاردا وقىتۋ قاجەتتىگىن ايتتى. تانىمدىق قىزمەتىمەن قاتار بۇل كۋرس جاس ۇرپاقتى پاتريوتتىق تۇرعىدان تاربيەلەۋگە ەرەكشە ۇلەس قوساتىنى انىق. «ەلىمىزدە ۇنەمى فلەشموبتار, ءارتۇرلى اكتسيالار وتەدى. بىراق ازاماتتاردىڭ رۋحاني كوزقاراسىن وزگەرتۋ, ساناسىن سىلكىندىرۋگە ول ازدىق ەتەدى. سوندىقتان دا بالالارعا جاستارعا تاريحىمىزدى, ولكەتانۋدى تولىق وقىتاتىن كەز كەلدى. مىسالى, قازاقستاننىڭ سولتۇستىك ءوڭىرى – بۇل ەجەلدەن قازاقتىڭ اتاقونىسى. ءتىپتى, ءسىبىردىڭ وڭتۇستىگى مەن ورال دا كەزىندە قازاق حاندىعىنىڭ قۇرامىنا كىرگەن. التىن وردانىڭ استاناسى – سارايبەركە – پوۆولجە جەرىندە جاريالاندى» دەپ جازدى پارتيا توراعاسى.