«مەن ەلىمىز تاۋەلسىزدىك العان جىلى دۇنيەگە كەلگەنىمە جانە ەسىمىمدى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلىنىڭ قۇرمەتىنە وراي نۇرسۇلتان قويعانىنا ءار ۋاقىتتا ريزامىن. تۇڭعىش پرەزيدەنت تاۋەلسىز قازاقستاننىڭ دامۋىنا وراسان زور ۇلەس قوستى, بۇل ەسىم جاۋاپكەرشىلىك جۇكتەيدى, سوندىقتان نۇرسۇلتان ەسىمىن الىپ ءجۇرۋ – مەن ءۇشىن مارتەبە, مەرەي!» دەيدى پوليتسيا ينسپەكتورى.
نۇرسۇلتان سەيداليەۆ, 29 جاستا, پوليتسيا ينسپەكتورى, اعا لەيتەنانت. ول 1991 جىلى 1 تامىزدا تۇركىستان وبلىسىنىڭ قىزىلجار ەلدى مەكەنىندە دۇنيەگە كەلگەن. اكەسى ءاجىحان مەن اناسى گۇلزينات – وتباسىلىق كاسىپپەن اينالىسقان, ەڭبەكتەن باقىت تاپقان جاندار. نۇرسۇلتان – وتباسىنداعى بوتاكوز, نۇربەك ەسىمدى ءۇش بالانىڭ ءبىرى. ول بالا كەزىنەن پوليتسيا بولۋدى ارمانداعان, جاۋاپكەرشىلىك دەگەن سەزىمدى الدىڭعى ورىنعا قوياتىن قاسيەتى ەرتە بايقالعان. ساباققا العىر بولىپ, 2007 جىلى مەكتەپتى ۇزدىك اياقتاعان. سول جىلى قازاقستان زاڭ كوللەدجىنە وقۋعا ءتۇسىپ, 2010 جىلى ونى ۇزدىك وقىپ, قىزىل ديپلوممەن بىتىرگەن. 2011-2012 جىلدار ارالىعىندا سەمەيدە اسكەري بورىشىن وتەپ, ۇلكەن ومىرگە شىنىققان. 2014 جىلى ول نۇر-سۇلتانداعى پاترۋلدىك پوليتسيا پولكىنە جۇمىسقا ورنالاستى. نەگىزگى مىندەتى قوعامدىق ءتارتىپتى ساقتاۋ جانە جول قاۋىپسىزدىگىن قامتاماسىز ەتۋ بولعاندىقتان, نۇرسۇلتان ءاردايىم ءوز ىسىنە سەرگەك قارايدى. «العاشقى جۇمىس كۇنىنەن باستاپ مەندە كەلەشەككە, ءوز ماماندىعىما دەگەن سەنىمدىلىك بولدى, سەبەبى كوماندانىڭ مەيىرىمدى جانە ارقاشان ءبىر-بىرىنە كومەكتەسۋگە دايىن ەكەنىن بايقادىم. مەن التى جىل بويى وسى جەردە تاجىريبە جيناقتادىم, ەندى جاڭادان كەلگەندەرگە كومەكتەسۋگە اسىعامىن. ءوز مىندەتىڭدى جاۋاپتى اتقارۋ, ونىڭ ماڭىزىن سەزىنۋ ادامعا كۇش بەرەدى» دەيدى ول.
2016 جىلى التىناي ەسىمدى قىزعا ۇيلەنىپ, شاڭىراق كوتەرگەن نۇرسۇلتان ءۇشىن وتباسىلىق قۇندىلىعى – باستى ورىندا, بۇگىندە 3 ۇلدىڭ اكەسىنە اينالعان ول ۇلدارىن ەلىن سۇيەتىن, ەلگە ادال قىزمەت ەتەتىن ازامات قىلىپ تاربيەلەۋدى باستى مۇراتىم دەپ بىلەدى. «جۇمىستان بوس ۋاقىتىمدا وتباسىممەن بىرگە بولامىن, سپورتپەن شۇعىلدانامىن جانە سۋعا شومىلامىن, ءار كەزدە شىنىعىپ, جاقسى فورمادا بولۋ ءبىزدىڭ جۇمىستا وتە ماڭىزدى. پاترۋلدىك پوليتسيا قانداي جاعدايدا دا ول قىلمىس بولا ما, وتباسىلىق جانجال بولا ما, 102-گە تۇسكەن بارلىق شاقىرتۋعا بارادى, حالىققا ەڭ ءبىرىنشى كومەكتى پاترۋلدىك پوليتسيا كورسەتەدى. سوندىقتان مەن ءوز جۇمىسىمدى جاقسى كورەمىن. مەن ءۇشىن ازاماتتاردىڭ قۇقىعى مەن قوعامدىق قاۋىپسىزدىكتى قورعاۋ, دوستىق نيەتتە جانە ءىلتيپاتتى بولۋ, قازاقستان حالقى مەن رەسپۋبليكاسىنا قىزمەت ەتۋ – ۇلكەن مارتەبە» دەيدى جاس نۇرسۇلتان.
