تاشەنوۆ اتى تەاترعا لايىق پا؟
جۋىردا استانا قالالىق ءماسليحاتىنىڭ كەزەكتى وتىرىسىندا ەلورداداعى ونوماستيكالىق اتاۋلار تالقىلاندى. دالىرەك ايتقاندا, كوشەلەرگە اتاۋ بەرۋ نەمەسە ولاردى قايتا اتاۋ, مەكتەپتەر مەن بىرقاتار مادەني وشاقتارعا تۇلعالارىمىزدىڭ اتىن بەرۋ ماسەلەلەرى ورتاعا سالىندى.
كوتەرىلگەن ماسەلەلەردىڭ ءبىرى جۇمابەك تاشەنوۆتىڭ ەسىمىنە قاتىستى بولدى. قالالىق ونوماستيكالىق كوميسسياعا جاستار تەاترىن وسى مەملەكەت جانە قوعام قايراتكەرىنىڭ اتىنا بەرۋ ۇسىنىسى كەلىپ ءتۇسىپتى. بۇل جونىندە ءالى ناقتى شەشىم شىققان جوق. قالالىق ءماسليحاتتىڭ الداعى وتىرىستارىندا اتالمىش ماسەلە ءالى دە قارالاتىن بولادى. جۇمابەك تاشەنوۆ ۇلىقتاۋعا تۇراتىن تۇلعا ەكەنى داۋ تۋدىرمايدى. الايدا ونىڭ اتى تەاترعا لايىق پا؟ ءبىز وسى سۇراقتى ونەرگە جاناشىر وقىرماندارىمىزعا قويدىق.
وتەن احمەت, جازۋشى:
– جۇمابەك تاشەنوۆ – مەملەكەت قايراتكەرى رەتىندە تىم اۋقىمدى تۇلعا. تەاتردى وعان قومسىنعانىم ەمەس, دەگەنمەن ءار نارسەنىڭ دە ءوز رەتى بولادى. ول كىسىنىڭ اتىندا استانامىزدا جىل وتكەن سايىن كورىكتەنە تۇسەتىن ۇلكەن كوشە بار. جۇمەكەڭنىڭ قايراتكەرلىك تابيعاتىنا عىلىمي مەكەمە, الدە بىرەگەي وقۋ ورنى لايىعىراق بولار ما ەدى دەپ ويلايمىن.
تەاترعا مادەنيەت, ونەر سالاسىندا ايتارلىقتاي ەڭبەك سىڭىرگەن, ءىز قالدىرعان تۇلعانىڭ اتى بەرىلگەنى ءجون سياقتى. نەگىزى «جاستار تەاترى» دەگەن تىركەس بۇلدىر. «جاستار دراما تەاترى» دەسە, تۇسىنىكتىرەك بولاتىن شىعار.
تولقىن سۇلتانوۆا, اكتريسا:
– جاستار تەاترىنا قازاق ونەرىنىڭ جاناشىرى, قانشاما تەاتر, مۋزەي, فيلارمونيالاردىڭ اشىلۋىنا, وركەن جايۋىنا ۇيىتقى بولعان ازامات وزبەكəلى جəنىبەكوۆتىڭ اتىن بەرسە دەيمىن.
ءوزىم تورعاي ءوڭىرىنىڭ قىزى بولعاندىقتان, جاسىمنان وزاعانىڭ وسى وبلىستىڭ ءوسىپ-وركەندەۋىنە قوسقان ۇلەسى جايلى ەستىپ ءوستىم. ارقالىق قالاسىنداعى قازاق دراما تەاترىندا جۇمىس ىستەپ جۇرگەنىمدە دە اعا-اپالارىمىز ول كىسىنىڭ دانالىعى مەن پاراساتتىلىعىن ۇنەمى اۋىزدارىنان تاستامايتىن.
ولكەلىك مۇراجايدىڭ اشىلۋىنا سۇبەلى ۇلەس قوسقان مەملەكەت جانە قوعام قايراتكەرى, ساڭلاق ەتنوگراف, قازاق مادەنيەتىن زەرتتەۋشى وزبەكالى جانىبەكوۆتىڭ ەسىمى بۇل كۇندە قازاق بالاسىنىڭ قاي-قايسىسى ءۇشىن بولسىن قۇرمەتتى. ول – قازاق حالقىنىڭ ۇلتتىق مادەنيەتىنىڭ, انا ءتىلىنىڭ, ءداستۇرى مەن ادەت-عۇرپىنىڭ جاڭارىپ, دامۋىنا ەلەۋلى ۇلەس قوسقان ونەرتانۋشى, عالىم. سونىمەن قاتار, قازاقستاننىڭ تۇپكىر-تۇپكىرىنەن شىققان تالانتتاردى جيناپ, ۇلكەن ساحناعا جولداما بەرگەن كىسى. سوندىقتان ەلورداداعى جاستار تەاترىنا ءو.جانىبەكوۆتەي ازاماتتىڭ اتىن بەرسە, نۇر ۇستىنە نۇر بولار ەدى.
P.S. جاستار تەاترى بىلتىر بۇرىنعى ك.بايسەيىتوۆا اتىنداعى وپەرا جانە بالەت تەاترى عيماراتىنا كوشكەنى بەلگىلى. سوعان سايكەس تەاتردان قازاقتىڭ بۇلبۇل ءانشىسىنىڭ اتاۋى الىندى. بىزدىڭشە, «كۇلاش بايسەيىتوۆا اتىنداعى جاستار تەاترى» اتاۋىن بەرسەك, ادىلەتتىلىك قالپىنا كەلەر ەدى. كۇلاش بايسەيىتوۆا 24 جاسىندا كسرو حالىق ءارتىسى اتانعانى بارشامىزعا ايان. ونىڭ ۇستىنە قازاق تەاترىنىڭ نەگىزىن قالاۋشى ادامداردىڭ ءبىرى. وسى جاقتارىن باعامداساق, ونىڭ اتى جاستار تەاترىنا بەرىلۋىنە وزىنەن-ءوزى سۇرانىپ تۇرعانداي.
دايىنداعان: امانعالي قالجانوۆ