ەلوردانىڭ بارلىق اۋدانىندا كوكتەمگى سۋ تاسقىنىنىڭ الدىن الۋ جۇمىسى جۇرگىزىلىپ جاتىر. قالاداعى سۋ تاسقىنى قاۋپى بار ۋچاسكەلەردىڭ سانى وتكەن جىلدارمەن سالىستىرعاندا 21-گە دەيىن ازايدى.
استانا قالاسى توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, قازىرگى ۋاقىتتا ەلوردادا كوكتەمگى سۋ تاسقىنىنىڭ الدىن الۋ ماقساتىندا قار مەن مۇزدى جيناۋ جۇمىسى كۇشەيتىلگەن رەجيمدە جۇرگىزىلۋدە. قىسقى كەزەڭنىڭ باسىنان باستاپ كوممۋنالدىق قىزمەتتەر ەلوردادان 3,2 ملن تەكشە مەتردەن استام قار شىعارىپ, 20 مىڭنان استام اۋماقتا ارىق جەلىلەرى تازارتىلدى.
سۋ تاسقىنى, سۋ باسۋ – بولجاپ بولمايتىن سالدارعا اكەلۋى مۇمكىن قاۋىپتى تابيعي قۇبىلىس. ول اۋا رايى تەمپەراتۋراسىنىڭ كەنەت كوتەرىلۋى, قاردىڭ قارقىندى ەرۋى, نوسەر جاڭبىر, قۋما جەل, مۇزدىڭ كەپتەلۋى جانە ت. ب. وزەن, كولدەگى سۋدىڭ كوتەرىلۋى ناتيجەسىندە بولۋى ىقتيمال. ونىڭ الدىن الۋ جانە سۋ تاسقىنىن بولدىرماۋ ءۇشىن ازاماتتىق قورعاۋ ورگاندارى مەن كوممۋنالدىق قىزمەتتەر تۇراقتى جۇمىس جۇرگىزۋدە, ينەرتتى ماتەريالدار قورى دايىندالدى. جەكە سەكتور تۇرعىندارىمەن ءۇي ماڭىنداعى اۋماقتى قاردان ۋاقىتىلى تازارتۋ تۋرالى اقپاراتتىق-ءتۇسىندىرۋ جۇمىسى بەلسەندى تۇردە جۇرگىزىلۋدە.
الماتى اۋدانىندا كوكتەمگى سۋ تاسقىنىنا قارسى ءىس-شارالار باستالعاننان بەرى بارلىعى 2911 مەتر اۋماقتان قار شىعارىلىپ, وڭتۇستىك-شىعىس شاعىن اۋدانىنىڭ وڭ جاعى جانە جەلەزنودوروجنىي تۇرعىن الابىنىڭ كوشەلەرىندە 984 مەتر ناۋا-ارىق جەلىلەرى جۋىلىپ-تازارتىلدى. سۋ باسۋ قاۋپى بار ايماقتاردان شىعارىلعان قاردىڭ جالپى كولەمى 13500 تەكشە مەتردى قۇرايدى.
– سۋ تاسقىنىمەن كۇرەسۋ ءۇشىن 85 تەحنيكا, 300 قاپ قۇم جانە 70 درەسۆا ساموسۆالى دايىندالىپ, ۋاقىتشا ورنالاستىرۋدىڭ 4 پۋنكتى انىقتالدى. ىقتيمال سۋ باسۋ ايماعىنا 7 ۋچاسكە جاتادى. جالپى, تۇرعىندار مەن مۇلىكتىڭ قاۋىپسىزدىگىن قامتاماسىز ەتۋ ءۇشىن سۋ تاسقىنىنا قارسى ءىس-شارالاردى جالعاستىرۋ وتە ماڭىزدى. وسى كەزەڭنىڭ قانشالىقتى ءساتتى وتەتىنى الدىن الا جاسالعان جۇمىسقا بايلانىستى, – دەدى اۋدان اكىمى ماقسات ساماتۇلى.
بايقوڭىر اۋدانىندا دا سۋ تاسقىنىنىڭ الدىن الۋ جۇمىسى جالعاسىپ جاتىر. اۋدان اكىمىنىڭ ورىنباسارى ريشات تۇردىبەكوۆ اۋداندىق توتەنشە جاعدايلار باسقارماسىنىڭ باسشىلىعىن, ەكوجۇيە قىزمەتكەرلەرىن جانە شارۋاشىلىق جۇرگىزۋشى سۋبەكتىلەر وكىلدەرىن جيناپ, ءوندىرىس تۇرعىن الابىندا سۋ تاسقىنىنا قارسى ءىس-شارالار بويىنشا كوشپەلى كەڭەس وتكىزدى. وندا سۋ تاسقىنىنىڭ الدىن الۋ شارالارى پىسىقتالىپ, وسى باعىتتاعى جۇمىستى كۇشەيتۋ تاپسىرىلدى. بۇل رەتتە جەكە سەكتور تۇرعىندارىنان سۋ باسۋدى بولدىرماۋ ءۇشىن قىزمەت كورسەتۋشى ۇيىمعا كومەكتەسىپ, جەكەمەنشىك ۇيلەردىڭ ماڭىنداعى قاردى اۋلالاردان كوشەلەرگە شىعارۋ ەسكەرتىلدى.
سۋ تاسقىنىنا قارسى ءىس-شارالار بويىنشا ەسىل اۋدانىنىڭ اكىمى اسىلبەك ەسەنباەۆ تا كوشپەلى كەڭەس وتكىزدى. ۇركەر تۇرعىن الابىندا ۇيىمداستىرىلعان جيىنعا استانا قالاسى بويىنشا توتەنشە جاعدايلار دەپارتامەنتى باستىعىنىڭ ورىنباسارى داستان الدابەكوۆ, ەسىل اۋدانى توتەنشە جاعدايلار باسقارماسىنىڭ باستىعى تالعات كاەرلينوۆ قاتىسىپ, شارا اياسىندا بىرلەسكەن جۇمىس جوسپارىن بەلگىلەدى.
سۋ تاسقىنىنا قارسى ءىس-شارالار اياسىندا استانا قالاسى توتەنشە جاعدايلار دەپارتامەنتىنىڭ قىزمەتكەرلەرى سارىارقا اۋدانى اكىمىنىڭ اپپاراتىمەن بىرلەسىپ, سۋ تاسقىنىنا اسا بەيىم ۋچاسكەلەردى ارالادى.
– قىس مەزگىلىنىڭ باسىنان باستاپ سارىارقا اۋدانىنىڭ قار پوليگونىنا 600 مىڭ تەكشە مەتردەن استام قار شىعارىلدى. قازىرگى ۋاقىتتا ارىق-ناۋا جۇيەسىنىڭ 16 مىڭ كۋب مەترىن جانە بارلىق جاڭبىر قابىلدايتىن, درەناجدىق قۇدىقتاردى قاردان, مۇزدان جانە قوقىستان تازارتۋ جۇمىسى جۇرگىزىلۋدە. بۇل جەكە سەكتوردىڭ سۋ باسۋ قاۋپىن ازايتۋعا كومەكتەسەدى, ەرىگەن جانە نوسەر سۋىنىڭ كەدەرگىسىز وتۋىنە ىقپال ەتەدى. كۇن سايىن ارىق جەلىلەرىن 4 تەحنيكا مەن 28 جۇمىسشى تازالايدى, – دەدى سارىارقا اۋدانى اكىمى اپپاراتى كوممۋنالدىق شارۋاشىلىق ءبولىمىنىڭ باسشىسى تەمىرلان ارينوۆ.
سۋ تاسقىنىنا قارسى ءىس-شارالار شەڭبەرىندە بەكىتىلگەن كەستەگە سايكەس مەردىگەر ۇيىمداردىڭ جەكە سەكتورلاردان قار ماسسالارىن شىعارۋ جۇمىسى باستالدى. بۇل ىسكە 201 جول جۇمىسشىسى, 91 مامانداندىرىلعان تەحنيكا جۇمىلدىرىلدى. جەكە سەكتوردان قار شىعارۋ جۇمىسى 7 ناۋرىزعا دەيىن جالعاسادى. وسى كەزەڭدە تۇرعىندار ءۇيىنىڭ اۋماعىنان قاردى الىپ, جول جيەگىنە شىعارۋى كەرەك.
استانا قالاسىنىڭ توتەنشە جاعدايلار دەپارتامەنتى وسى مەزگىلدە مۇز ۇستىندە ءجۇرۋدىڭ اسا قاۋىپتى ەكەنىن ەسكەرتەدى. مەحانيكالاندىرىلعان تازالاۋ كوشە بويىنداعى اشىق جەرلەردە جۇزەگە اسىرىلادى. وسىعان بايلانىستى اۋدان اكىمدىكتەرى جەكە سەكتورلاردىڭ بارلىق تۇرعىنىن ۇيلەردىڭ توبەسىنەن جانە ىرگەلەس اۋماقتارداعى قاردى جولعا دەيىن تازارتىپ, مۇمكىندىگىنشە كوشەگە شىعارۋعا شاقىرادى.
«تۇنگى اياز كەزىندە سۋمەن ارالاسقان قار قاتىپ قالادى. بىراق كۇندىز تىكەلەي كۇن ساۋلەسىنىڭ اسەرىنەن مۇز ەرىمەسە دە, كەۋەكتى جانە بورپىلداق بولىپ, ونىڭ قۇرىلىمى بۇزىلادى. مۇنداي نازىك مۇزدىڭ ۇستىمەن ءجۇرۋ ادام ومىرىنە اسا قاۋىپتى. سوندىقتان وقىس وقيعالاردىڭ ورىن الماۋى ءۇشىن اتا-انالار اسىرەسە جاس بالالاردى قاراۋسىز قالدىرماسا ەكەن» دەيدى ماماندار. ال بىرىڭعاي قۇتقارۋ قىزمەتىنىڭ تەلەفونى – «112».
