مامىر ايى مامىراجاي مەيرامعا تولى. تابيعات-انا دا ەرەكشە جاسانىپ, قۇلپىرىپ كەتەدى. بايشەشەكتەر ءبۇر جارىپ, اعاشتار كوگەرە باستايدى. ايتۋلى مەرەكە ەلىمىزدە 1996 جىلدان بەرى تويلانادى. بىرلىگى بەكەم ەلدىڭ كەلەشەگى جارقىن. ەلباسى دا ۇنەمى ءوز سوزىندە تاتۋلىقتى ۇلگى ەتىپ سويلەيدى. «ىنتىماق جۇرگەن جەردە ىرىس بىرگە جۇرەدى» دەپ بابالارىمىز دا بەكەر ايتپاعان. قازاقستان دەگەن كيەلى شاڭىراقتىڭ استىندا سان ءتۇرلى ۇلت دوستىقتىڭ بايراعىن جەلبىرەتىپ, تاتۋ-ءتاتتى ءومىر سۇرۋدە. ادامعا بەيبىتشىلىكتەن ارتىق باقىت جوق.
الاڭعا جينالعان جۇرتتىڭ قاراسى كوپ. ءبارى دە مەرەكەلىك كوڭىل-كۇيگە بولەنگەن. اسىرەسە, بالعىنداردىڭ قۋانىشىندا شەك جوق. ءبىر-ءبىر شار ۇستاپ, بەيبىتشىلىكتى ناسيحاتتاپ جۇرگەندەي كورىندى كوز الدىمىزعا. شارا بارىسىندا ەلورداداعى ەتنومادەني بىرلەستىكتەردىڭ وكىلدەرى مەيرامنىڭ كورىگىن قىزدىردى. ساحنادا سان ءتۇرلى حالىقتىڭ اندەرى شىرقالدى. ۇلتتىق بيلەرى ورىندالدى. الماتىدان ادەيى كەلگەن «الاشۇلى» توبىنىڭ جىگىتتەرى جالىندى اندەرىن توگىلدىردى. تاعى دا باسقا تانىمال ونەرپازدار ونەر كورسەتتى. مەرەكەلىك كونتسەرت كەشكە دەيىن سوزىلدى. جينالعاندار ادەمى اسەرگە بولەندى. استانادا تۇراتىن ەتنوس وكىلدەرى 50 مەترلىك قايىرىمدىلىق داستارقان جايدى.
وندا سان الۋان ۇلتتاردىڭ تاعامدارى قويىلدى. باعاسى دا قىمبات ەمەس. قايىرىمدىلىق شارادان تۇسكەن قاراجاتتى قاتەرلى ىسىك اۋرۋىنا شالدىققان التى جاسار ايىمجان دوسجاننىڭ ەم-دومىنا اۋدارادى.
ودان ءبىز دە اۋىز تيدىك. داستارقان شەتىندە تۇرعان قىرعىزدىڭ ايىر قالپاعىن كيگەن قاريانى سوزگە تارتتىق. ەسىمى – بەيسەنبەك شارشەنوۆ.
«مەن قازاقپىن. بىراق قىرعىزستاندا تۋىپ, ەرجەتتىم. وتانىما ورالعانىما 15 جىل بولدى. مەكتەپتە ۇستاز بولدىم. قىرعىز مادەني ورتالىعىنداعى جەكسەنبىلىك مەكتەپتە ءدارىس وقيمىن, قىرعىز تىلىنەن ساباق بەرەمىن. بۇگىنگى مەرەكەمەن بارلىق اعايىندى قۇتتىقتايمىن» دەيدى اقساقال اقجارىلقاپ پەيىلمەن. استاناداعى ازەربايجان ۇلتتىق مادەني ورتالىعىنىڭ توراعاسى ۆيدادي سالاحوۆ تا قۋانىشتان شەت قالمادى.
«قازاقستان حالقىنىڭ بىرلىگى كۇنى قۇتتى بولسىن! قازىرگى تاڭدا ەلوردادا 5 مىڭ ازەربايجان تۇرادى. جالپى, ەلىمىزدە 130 مىڭ ازەربايجان بار. 1937 جىلى ارمەنيادان 90 مىڭ ازەربايجان جەر اۋدارىلدى. سول كەزدە قازاق حالقى ءبىزدى باۋىرعا باسىپ, قولداۋ كورسەتتى. بەينەلەپ ايتقاندا, ءوزى قينالىپ وتىرسا دا, جارتى ءتىلىم نانىن ءبولىپ بەردى. ءبىز ونى ۇمىتپايمىز. قۇدايعا شۇكىر, سول قيىندىقتىڭ ءبارى ءوتتى. ەلباسىمىز امان بولسىن! ەلىمىزدىڭ بىرلىگى ارتا بەرسىن!» دەيدى اكادەميك ىزگى لەبىزىن ءبىلدىرىپ.
شارا اياسىندا ۇلتتىق ويىندار باسەكەسى قىزدى. كۇشتەرى تاسىپ, اتويلاعان جىگىتتەردىڭ نامىسى قوزدى. اسىق اتۋ سايىسىندا ەرەسەكتەر مەن بالالار ساقانى شىر ءۇيىرىپ, نىسانا كوزدەدى. قازاق كۇرەسىنىڭ جالاۋى جەلبىرەپ, بالۋاندار كۇش سىناستى. ارقان تارتىس ويىنىن قالا باسشىسى اسەت يسەكەشەۆتىڭ ءوزى تاماشالادى. قىسقاسى, جۇرتشىلىق مەرەكەلىك قۋانىشقا بولەندى.
وسىنداي بىرلىك مەيرامىن ۇلىقتاعان مەرەكەلىك شارالار ەلوردا اكىمدىگىنىڭ الدىنداعى ورتالىق الاڭدا دا سالتانات قۇردى.
ازامات ەسەنجول
