ەلورداداعى №3 بالالار كىتاپحاناسىندا «تاۋەلسىز ەلىم – تىرەگىم» اتتى تاريحي تانىمعا تولى كەش ءوتتى.
شارانىڭ ماقساتى جاس جەتكىنشەكتەردىڭ ەلگە, جەرگە دەگەن وتانسۇيگىشتىك سەزىمدەرىن وياتۋدى كوزدەگەن. وعان قالاداعى №15 مەكتەپ-ليتسەيىنىڭ 6 «ا» سىنىبىنىڭ وقۋشىلارى قاتىستى. كەش بارىسىندا ەلىمىز ەگەمەندىك العاننان بەرگى تاريحي كەزەڭدەر جايىندا سالماقتى ءسوز قوزعالدى. كەڭەس ۇكىمەتىنىڭ وزبىرلىق ساياساتىنا قارسى شىققان جەلتوقسان وقيعاسىنىڭ قاھارماندارى تۋرالى ايتىلدى. تاۋەلسىزدىككە ارنالعان تاقىرىپتىق سلايد كورسەتىلدى. وقۋشىلار اقىنداردىڭ ازاتتىقتى تولعاعان جىرلارىن وقىدى. حالىقتىڭ سۇيىكتىسىنە اينالعان كومپوزيتور ەسكەندىر حاسانعاليەۆتىڭ جۇرەكتى تەبىرەنتىپ, ادام بويىنداعى رۋحتى وياتاتىن «اتامەكەن» ءانىن شىرقادى.
سونداي-اق, جەتكىنشەكتەر اراسىندا تۋعان جەر تاقىرىبىنا ارنالعان ماقال-ماتەل ايتۋدان سايىس ءوتتى. وعان وقۋشىلاردىڭ تىڭعىلىقتى دايىندالىپ كەلگەنى بايقالدى. ءبارى دە بابالار قالدىرىپ كەتكەن ناقىل سوزدەردى جاتقا بىلەتىندىگىن كورسەتتى.
– تاۋەلسىزدىك – ەڭ اسىل, قىمبات ۇعىم. سوندىقتان ونى جاس قۇراقتاي قاۋلاپ ءوسىپ كەلە جاتقان بالالار ءبىلۋى قاجەت. بۇگىنگى كەشتىڭ باستى ماقساتى – وسى. ارينە, قازىرگى جەتكىنشەكتەردىڭ ويى وزىق. تاريحىمىزدان تەرەڭ حاباردار. بارلىعىن بىلگىسى, تۇسىنگىسى كەلەدى. كىتاپ وقۋعا دا قۇمارتىپ تۇرادى. كەشتىڭ كورىگىن قىزدىرعان وقۋشىلارعا العىس ايتامىن, – دەيدى كىتاپحانا مەڭگەرۋشىسى مارال اقتاەۆا.
شارا سوڭىندا تاعىلىمدى كەشكە بەلسەندى اتسالىسقان وقۋشىلار مەن وقىرماندارعا شاعىن سىيلىقتار بەرىلىپ, تاۋەلسىزدىككە ارنالعان كىتاپ كورمەسىنە شولۋ جاسالدى.
ازامات ەسەنجول
