5 قازاندا «اقىلدىڭ كىلتى. ءومىرداستان» تەلەەپوپەياسىنىڭ ەكىنشى ماۋسىمى كورەرمەن نازارىنا جول تارتادى. ەل تاۋەلسىزدىگىنىڭ 25 جىلدىعىنا ارنالعان جيىرما سەريالدى تەلەتۋىندىنىڭ الدىن الا كورسەتىلىمى استانادا ءوتتى.
– جوبانىڭ تۇساۋكەسەرىن «تاۋەلسىزدىككە تارتۋ» دەپ بەكەر اتاعانىمىز جوق. تەلەحيكايانىڭ ءون بويىندا ەكى عاسىردا قوس اۋلەتتىڭ باسىنان وتكەن ءتۇرلى تاريحي وقيعالارى, سول كەزدەگى ساياسي جۇيەنىڭ اسەرى كورىنىس تابادى. اتا, اكە, بالا دەگەن ۇعىمداردىڭ قارىم-قاتىناسى, ۇرپاقتار ساباقتاستىعى كەڭىنەن قوزعالادى. كوپشىلىك كورەرمەننىڭ ىقىلاسى بولار, وتاندىق تەلەحيكايالاردىڭ ىشىندە «اقىلدىڭ كىلتى. ءومىرداستان» بىلتىر رەيتينگى ەڭ جوعارى جوبالاردىڭ ءبىرى بولدى. سوندىقتان وقيعانىڭ جالعاسىن تۇسىرۋدە ەش كۇمان تۋمادى. جوبانىڭ رەجيسسەرى مۇرات بيدوسوۆ قازاق رەجيسسەرلەرى قولدانا قويماعان ەرەكشە ءتاسىل – پاراللەليزمدى سيۋجەتىنە ارقاۋ ەتتى. تاۋەلسىزدىككە تارتۋىمىز بۇل عانا ەمەس. بيىل ءشامشى قالداياقوۆ تۋرالى 4 سەريالدى كوركەم ءفيلمنىڭ تۇساۋىن كەسەمىز. ال كەلەسى جىلى مۇقاعالي ماقاتاەۆ پەن قاجىمۇقان مۇڭايتپاسوۆ تۋرالى تەلەۆيزيالىق جوبالاردى ۇسىنامىز, – دەيدى «حابار» اگەنتتىگى» اق باسقارما توراعاسىنىڭ ورىنباسارى رينات كەرتاەۆ.
تەلەەپوپەيا ابايدىڭ «قارا سوزدەرى» فيلوسوفياسى نەگىزىندە تۇسىرىلگەن, دەگەنمەن ۇلى ويشىلدىڭ كوركەم تۋىندىلارىنىڭ تىكەلەي جەلىسىنە قۇرىلماعان.
ەكى پاراللەل سيۋجەتتىك جەلىدە تۇسىرىلگەن «اقىلدىڭ كىلتى. ءومىرداستان» تەلەحيكاياسىنداعى وقيعا قازاقتىڭ سوڭعى حانى كەنەسارى مەن ەلدەگى كوتەرىلىستەر توڭىرەگىندە ءوربيدى. ال ەكىنشى تاقىرىپ – 1975 جىلدان باستالىپ, قازاقستان تاۋەلسىزدىك العان جىلدارمەن اياقتالادى. ءداستۇر بويىنشا ءفيلمنىڭ سوڭعى نۇكتەسى ابايدىڭ «قارا سوزدەرىمەن» تۇيىندەلىپ وتىرادى.
باستى رولدەردە باۋىرجان قاپتاعاي, دارحان سۇلەيمەنوۆ, ەربول يدريسوۆ, ءاليا دانياروۆا, گۇلنار جاقىپوۆا, ۆيتالي كۋپريانوۆ سەكىلدى بەلگىلى تەاتر جانە كينو اكتەرلەرى وينايدى. تەلەەپوپەيانىڭ ەكىنشى ماۋسىمى 5 قازاننان باستاپ ءدۇيسەنبى-جۇما ارالىعىندا ساعات 19:40-تا «حابار» ارناسىنان كورسەتىلەدى.
ءمادينا جاقىپ
