استاناداعى ۇلتتىق اكادەميالىق كىتاپحانادا ازاتتىقتىڭ شيرەك عاسىر تويىنا تاماشا تارتۋ جاساعان رەسپۋبليكالىق «ەگەمەن قازاقستان» گازەتىنىڭ سەرياسىمەن جارىق كورگەن جيناقتاردىڭ تۇساۋكەسەرى ءوتتى.
شارا بارىسىندا ەلىمىزدىڭ باس باسىلىمى قر پرەزيدەنتىنىڭ ءباسپاسوز قىزمەتىمەن بىرلەسىپ جۇزەگە اسىرعان «25 جىلدىڭ 25 ءساتى» جوباسى اياسىندا تاۋەلسىزدىكتىڭ ۇلى مەرەكەسىنە وراي «جيىرما بەس جىلدىڭ جەڭىستەرى مەن جەمىستەرى» جانە زاڭعار جازۋشى ءابىش كەكىلبايۇلىنىڭ ەگەمەندىك العاننان بەرى گازەتتە باسىلعان تەرەڭ تولعامدى ماقالالارىنان تۇزىلگەن «ءداۋىر داۋىسى» اتتى جيناعى مەن جىل سايىن جۇرتشىلىق قۇمارتىپ وقيتىن «ەتجەڭدى» ەگەمەن قازاقستان» كىتابىنىڭ جاڭا باسىلىمى وقىرمانعا جول تارتتى.
جاڭا كىتاپتاردىڭ تۇساۋىن بۇگىنگى قازاق ادەبيەتىنىڭ ابىز اقساقالى سەرىك قيراباەۆ پەن قالامگەر سۇلتان ورازالى كەستى. كورنەكتى عالىم سەرىك اتامىز عاسىرلىق تاريحى بار باسىلىمنىڭ وتكەنىنەن سىر تارتىپ, ءوزى دە ۇزاق جىلداردان بەرى اۆتورى اتانعان گازەتتىڭ كەلبەتى مەن وي-ءورىسى جايىندا سالماقتى ءسوز قوزعادى. قالامى جۇيرىك جۋرناليست, بەلگىلى عالىم باۋىرجان ومارۇلى ايتۋلى مەرەكەدە جارىققا شىققان كىتاپتاردىڭ قۇندىلىعى مەن جەتىستىكتەرى تۋرالى پاراساتتى وي ءوربىتتى.
جالپى, «ەگەمەن قازاقستاننىڭ» ەل ىشىندەگى بەدەلى زور. سوندىقتان بولار, «ەگەمەن» دەگەندە كەز كەلگەن قازاق ەمىرەنىپ تۇرادى. سوناۋ وتكەن عاسىردىڭ باسىندا «ۇشقىننان» وت الىپ, جاڭاشا تۇلەگەن باسىلىمدا قازاقتىڭ قالامى قارىمدى ارداقتىلاردىڭ قولتاڭباسى قالدى. بۇگىندە سولاردىڭ ءىزىن ورتا مەن جاس بۋىن وكىلدەرى ءساتتى جالعاي ءبىلدى.
– تاۋەلسىزدىكتىڭ مەرەيلى مەرەكەسىندە جارىق كورگەن «جيىرما بەس جىلدىڭ جەڭىستەرى مەن جەمىستەرى» كىتابىندا ازاتتىقتىڭ ءاربىر جىلىن تەرەڭ تولعانىسپەن بايانداعان اۆتورلاردىڭ ەڭبەكتەرى ەندى. ال ءابىش اعامىز جايىنداعى «ءداۋىر داۋىسى» جيناعىنا اۆتوردىڭ ءبىزدىڭ گازەتتەگى پاراساتقا تولى ويلى دۇنيەلەرى باسىلدى. بۇل كورنەكتى قالامگەردىڭ پۋبليتسيستيكالىق قىرىنا قوسىلعان سۇبەلى ەڭبەك دەپ باعالايمىن. ەندى ءبىز مۇنداي جيناقتى «ەگەمەنگە» ەڭبەگى سىڭگەن اسىلدارعا ارناۋدى جوبالاپ وتىرمىز. الداعى تاڭدا شەرحان مۇرتازا اعامىزدىڭ باسىلىمدا شىققان وتكىر ماقالالارىنان قۇراستىرىلعان «نامىس نايزاعايى» دەگەن جيناق جارىق كورەدى, – دەدى «ەگەمەن قازاقستان» رەسپۋبليكالىق گازەتى» اق-نىڭ باسقارما توراعاسى دارحان قىدىرالى.
سونداي-اق, بيىلعى باس باسىلىمنىڭ شيرەك عاسىر تويعا ادەيىلەپ ۇيىمداستىرعان «تاۋەلسىزدىك: تۇلعا, تاعىلىم, تاعدىر» دەپ اتالعان شىعارماشىلىق بايقاۋدىڭ قورىتىندىسى شىقتى. كونكۋرستىڭ اقىلداستار القاسى شەشىمىمەن بەلگىلى جۋرناليست قايسار ءالىم 1-ورىنعا لايىق دەپ تانىلسا, جاقسىباي مۇساەۆ 2-ورىندى يەلەندى. ال 3-ورىن كەنجەبولات جولدىباي مەن احمەت ومىرزاققا بەرىلدى. ايتقادىر تىلەۋوۆكە ىنتالاندىرۋ سىيلىعى تابىس ەتىلدى.
ازامات ەسەنجول
