تاۋەلسىزدىك كۇنى – ەستەن كەتپەيتىن, تاريحتان وشپەيتىن كۇن, بۇكىل الەمنىڭ ەل ەكەندىگىڭدى ەلەگەن, حالىق ەكەندىگىڭدى تانىعان, ياعني جاراتقاننىڭ جارىلقاعان كۇنى. جەكە ادامنىڭ عانا ەمەس, بۇكىل جارانداردىڭ قۇقىعىن ادامزاتتىڭ قۇندىلىعىنداي قۇرمەت تۇتقان كۇن. ءومىر سالتىن ءوز زاڭدارىڭا سايكەس, ءوز داستۇرىڭمەن, ءوز ادەت-عۇرپىڭمەن قالىپتاستىراتىن جولدىڭ باسى. بۇل كۇننىڭ قاسيەتىن ءتۇسىنۋ ۇلتتىق سانا-سەزىمنىڭ ويانۋىمەن شەكتەلمەيدى, حالىقتىڭ مۇددەسىنە ساي العاشقى قادامنان باستاپ تولىققاندى ءىس-ارەكەت قاتار ءجۇرۋى ءتيىس.
ەگەمەندى ەلىمىزدىڭ مەملەكەتتىك رامىزدەرىنەن باستاپ بۇگىنگى كۇنگە دەيىنگى ءجۇرىپ وتكەن جولىنا زەر سالىپ, كوڭىلگە كوپ نارسەنى توقيتىن تۇس تا, جەتىستىگىمىزگە مارقاياتىن كەز دە – وسى. اتا-بابا, اعا ۇرپاقتىڭ الدىنداعى بورىشىمىزدى ورىندايتىن, پارىزىمىزدى پايىمدايتىن كۇن, كەلەشەگىمىز – ءوز ۇرپاعىمىزعا ونەگە كورسەتەتىن كۇن. ياعني, بارعا – قاناعات, وتكەنگە – سالاۋات, كەلەشەككە امانات ەتەتىن كۇن.
وزگەنى تەڭ سانايتىن, ەلىڭنىڭ نامىسىن قورعاپ, ەسەسىن ءجىبەرمەيتىن كۇن. تاۋەلسىز ەكەندىگىڭدى سەزىنىپ, ونىڭ تۋىن جوعارى ۇستاپ, دۇنيەدە تاۋەلدىلەردىڭ دە بار ەكەندىگىن ەسكەرەتىن كۇن. سوعىسسىز الەم, بەيبىت ءومىردىڭ قامىن ويلايتىن كۇن. تاۋەلسىزدىكتەن اسقان ولشەم جوق. ونىڭ مۇمكىندىكتەرى دە شەكسىز. ەڭ باستى بايلىعىمىز – ادام بولسا, ادامي كاپيتال – سول بايلىقتىڭ تورەسى. ەلدىڭ مەرەيىن اسىرۋ دا, جوعىن جاسىرۋ دا وسى ۇعىمدارعا بايلانىستى بولماق. سوندىقتان تاۋەلسىزدىككە قىزمەت ەتۋ – ءوزىڭنىڭ ورەڭدى, دەڭگەيىڭدى, ادامگەرشىلىگىڭ مەن ازاماتتىعىڭدى, ەڭبەكسۇيگىشتىگىڭدى ىسپەن دالەلدەپ, ءوزىڭ ءۇشىن, وتباسىڭ ءۇشىن, وتان ءۇشىن جاندى اياماۋ. وزگەدەن ادىلەتتىلىكتى تالاپ ەتۋدەن بۇرىن ءوزىڭنىڭ ادىلەتتى بولۋىڭ – مەملەكەتتى بەكەم ەتۋگە قوسقان ۇلەسىڭ بولارى حاق. تاعى ءبىر ۇلەستىڭ ۇلكەنى – وتباسىڭداعى جانداردى ەلجاندى ەتىپ تاربيەلەۋ. سانالى ادام ءۇشىن بۇدان ارتىق باقىت, بايلىق بولماس.
جىل وتكەن سايىن تاۋەلسىزدىكتىڭ جىلناماسى تولىعا تۇسەدى, ماڭىزى دا ارتا بەرەدى. تۋعان ەلىمىزگە «تاۋەلسىزدىك شەجىرەسىنىڭ مۇشەلىن مىڭ جىلدان قايىرۋدى جازسىن!» دەگەن اق-ادال تىلەگىمىزدى ارنايمىز!
