كەشە باس قالادا ءداستۇرلى «SAMGAU» VII حالىقارالىق فەستيۆالىنىڭ شىمىلدىعى ءتۇرىلىپ, تەاتر اپتالىعىنىڭ سالتاناتى باستالدى. بيىلعى بايقاۋدىڭ كورىگىن ەلىمىز بەن شەتەلدەن كەلگەن 15 ونەر ۇجىمى قىزدىرادى.
حالقىمىز جەتى سانىن كيەلى دەپ سانايدى. سوندىقتان جەتىنشى رەت ءوتىپ وتىرعان فەستيۆالدىڭ ماڭىزى وزگەشە. بۇل ايتۋلى شاراعا استانادان ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, م.گوركي اتىنداعى مەملەكەتتىك اكادەميالىق ورىس دراما تەاترى, «جاستار» تەاترى, قالالىق كومەديا تەاترى مەن قازاقستاننىڭ ەڭبەك سىڭىرگەن قايراتكەرى نۇركەن وتەۋىلوۆتىڭ تەاترى قاتىسادى. بۇل ساحنا ۇجىمدارىنىڭ ونەرى ەلوردالىقتارعا جاقسى تانىس دەپ ايتۋعا بولادى. سونداي-اق الماتى, قاراعاندى, سولتۇستىك قازاقستان, پاۆلودار جانە شىعىس قازاقستان وبلىس ورتالىقتارىنداعى تەاتر ارتىستەرى دە ءوز ونەرلەرىن تالعامى بيىك كورەرمەندەرگە تارتۋ ەتپەك. ال وسى ونەر بايگەسىندە رەسەي, ليتۆا, وزبەكستان, قىرعىزستاننان كەلگەن ۇجىمداردىڭ سپەكتاكلدەرىن كورۋگە قولايلى مۇمكىندىك تۋىپ وتىر. قازىر الەمدە تەاتر ونەرى جاڭا بەلەسكە كوتەرىلدى. ساحناعا جاڭا تەحنولوگيالاردى ەنگىزۋ ارقىلى كەيىپكەردىڭ وبرازىن اشۋ جاندانا تۇسكەن. بۇل ۇردىستەر رەسەي تەاترلارىندا كەڭىرەك قولدانىلىپ ءجۇر.
ءبىر اپتاعا سوزىلاتىن مادەني شارادا كورەرمەندەر اتالعان تەاترلاردىڭ «ايمان-شولپان», «ءلايلى-ءماجنۇن», «قاراكوز», «اكە», «رومەو مەن دجۋلەتتا» سەكىلدى ۇزدىك تۋىندىلارىن تاماشالايدى. ەلوردا جۇرتشىلىعى بۇل قويىلىمداردى قاللەكي تەاترى, «جاستار» تەاترى جانە «Nomad City Hall» ساحنا زالىنان كورەدى.
سونىمەن بىرگە فەستيۆال اياسىندا ساحنا مايتالماندارى تەاتر ارتىستەرىنە اكتەرلىك جانە رەجيسسەرلىك باعىتتا شەبەرلىك ءدارىس وقيدى.
بايقاۋعا باق سىناۋعا كەلگەن تەاترلاردىڭ ونەرىن وسى سالانىڭ مايىن ءىشىپ, جىلىگىن شاققان ماماندارى ساراپتايدى.
ەندەشە, ەلوردادا جەتىنشى مارتە ءوتىپ وتىرعان تەاتر اپتالىعىنان قۇر قالماڭىز!
