ەلوردا تەاترلارى جاڭا قويىلىمداردىڭ تۇساۋكەسەرىنە دايىندىق ۇستىندە. بۇل استانا كۇنى مەرەكەسىنىڭ قارساڭىندا كورەرمەندەرگە ۇسىنىلاتىن تاماشا تارتۋ بولماق.
«ءتىل تابىسقاندار»
ق. قۋانىشباەۆ اتىنداعى مەملەكەتتىك اكادەميالىق قازاق دراما تەاترى «ءتىل تابىسقاندار» كومەدياسىن ۇسىنادى. كومەديا اۆتورى – قىرعىز دراماتۋرگى مار بايجيەۆ, قويۋشى رەجيسسەرى – قر ەڭبەك سىڭىرگەن قايراتكەرى, اتالمىش تەاتر ساحناسىندا جيىرما ەكىگە تارتا سپەكتاكل قويعان بولات ۇزاقوۆ.
كورەرمەندى كۇلدىرە وتىرىپ, بۇگىنگى قوعامداعى وزەكتى ماسەلەنىڭ ءبىرى – ءتىل جايىن قوزعايتىن كومەديا ارقىلى استانا قالاسىنىڭ تۋعان كۇنى قارساڭىندا كوپتەن كورمەگەن باۋىرى مۇقامبەتتى ىزدەپ كەلگەن اۋىلداعى اپكەسى بولدۋقاننىڭ قىزىقتى ۋاقيعاعا تاپ بولۋى سۋرەتتەلەدى
«تورعايدىڭ ۇياسى»
م.گوركي اتىنداعى مەملەكەتتىك اكادەميالىق ورىس دراما تەاترى وسىلاي اتالاتىن تراگەديانىڭ تۇساۋكەسەرىن وتكىزەدى. قويىلىمنىڭ قويۋشى رەجيسسەرى – قر ەڭبەك سىڭىرگەن ءارتىسى بەكبولات پارمانوۆ, قويۋشى سۋرەتشىسى – قر مادەنيەت قايراتكەرى قانات ماقسۇتوۆ, باستى رولدە – «شابىت» حالىقارالىق شىعارماشىل جاستار فەستيۆالىنىڭ لاۋرەاتى, استانا قالاسى اكىمى سىيلىعىنىڭ يەگەرى (2008 ج) سۆەتلانا فورتۋنا.
«مەنىڭ ەركىندىگىم وزگەنىڭ ەركىندىگى باستالعان جەردە ءتامام بولادى». بۇل الەمگە ايگىلى فرانتسيالىق ءانشى, ءارى اكتريسا ەديت پيافپەن ۇقساس سپەكتاكل كەيىپكەرىنىڭ ءسوزى. بەت پەردەسىنىڭ استارىنا ءوز-وزىنەن جاسىرىنعان باستى ءرول سومداۋشىعا ەديت پياف ءومىر سۇرۋگە كۇش بەرەدى. ءبىرىنشى جاقتان ءانشىنىڭ تاعدىرىن باياندايتىن ول ءوز پسيحياترىنا اندەرىن ورىندايدى. وسىنداي ارەكەتتەرمەن كورەرمەندەردى باۋراپ الىپ, بىرتىندەپ اسىل وي ۇشىعىن شىعارادى. ادامعا ءومىر سۇرۋگە كۇش بەرەتىن – ءۇمىت پەن سەنىم ەكەنىن ۇعىندىرادى. سپەكتاكلدە ەديت پيافتىڭ مۋزىكاسى مەن اندەرى جاندى داۋىستا ورىندالادى.
«مەرەكە»
استانا قالاسىنىڭ قۋىرشاق تەاترى كىشكەنتاي كورەرمەندەردى «مەرەكە» قويىلىمىمەن قۋانتادى. قويىلىم اۆتورى – ونەرگە ەندى عانا قادام باسىپ كەلە جاتقان جاس دارىن قۋات ەجەمبەكوۆ, رەجيسسەرى قر ەڭبەك سىڭىرگەن ءارتىسى قۇرالاي ەشمۇراتوۆا.
جىل – ون ەكى اي نىشاندارى مەرەكەلىك شاڭىراق استىنا باس قوسىپ, ارقايسىسى ءوزى تۋرالى سىر شەرتەدى. ءار كەيىپكەر سونىمەن بىرگە ءتۇرلى ۇلتتاردىڭ ءداستۇرىن تىلگە تيەك ەتەدى. سول ارقىلى كىشكەنتاي كورەرمەندەر ويىن تۇرىندە ءتۇرلى ەلدەردىڭ مەرەكەلىك داستۇرلەرى مەن ادەت-عۇرىپتارىمەن تانىسادى. بىرەگەي قويىلىم ءار ەلدىڭ مادەنيەتىمەن تانىستىرىپ قانا قويماي, ءوز مادەنيەتىنە دەگەن قۇرمەت پەن سۇيىسپەنشىلىكتى وياتۋعا باعىتتالعان. سپەكتاكل بارىسىندا كىشكەنتاي كورەرمەندەر كەيىپكەرلەرگە كومەكتەسۋ ارقىلى وزدەرى دە قويىلىم قاتىسۋشىلارى اتانادى.
«ماڭگىلىك ەل» مۇشايراسى
1 شىلدەدە كونگرەسس-حولل سارايىندا استانا كۇنى مەرەكەسىنە ورايلاستىرىلعان «ماڭگىلىك ەل – ۇلت مۇراتى» پوەزيا كەشىندە «ماڭگىلىك ەل» رەسپۋبليكالىق ءمۇشايراسىنىڭ قورىتىندىسى شىعارىلادى.
ادەبي كەشتە قازىرگى قازاق پوەزياسىنىڭ تۋعان ەل مەن استاناعا ارنالعان ۇزدىك تۋىندىلارى وقىلىپ, بايقاۋ جەڭىمپازدارى ماراپاتتالادى. سونداي-اق, بايقاۋ قاتىسۋشىلارىنىڭ بارلىق شىعارمالارى توپتاستىرىلعان كىتاپتى شىعارۋ جوسپارلانۋدا.
بايقاۋدىڭ ماقساتى – وزگە ەلدەرمەن يىق تىرەستىرگەن تاۋەلسىز قازاق ەلىن جانە ونىڭ اي ديدارلى استاناسىن جىرعا قوسۋ, ۇزدىك تۋىندىلاردى جيناقتاۋ بولسا, مىندەتى – بايقاۋدىڭ ۇزدىك تۋىندىلارىن كەڭىنەن دارىپتەۋ, جۇرەكتەن شىققان اسەرلى شىعارمالار ارقىلى كەلەر ۇرپاق بويىنا تۋعان ەلگە, استاناعا دەگەن سۇيىسپەنشىلىك سەزىمىن ۇيالاتۋ.
