جاڭا جىلدان باستاپ مەملەكەت تاراپىنان ناۋقاستارعا بەرىلەتىن تەگىن دارىلەردى تۇرعىلىقتى ەمحانادان الۋعا بولادى. كەشە استانا قالاسى اكىمىنىڭ ورىنباسارى ەرمەك امانشاەۆ پەن دەنساۋلىق ساقتاۋ باسقارماسىنىڭ باسشىسى كامالجان نادىروۆ «گيپپوكرات» ءدارىحاناسىنا بارىپ, ونداعى ازاماتتارمەن جاڭا جۇيەنىڭ ارتىقشىلىعى تۋرالى اڭگىمەلەستى.
استانا قالاسى دەنساۋلىق ساقتاۋ باسقارماسىنىڭ باسشىسى كامالجان نادىروۆتىڭ ايتۋىنشا, جاڭا جىلدان باستاپ كەپىلدەندىرىلگەن كومەك اياسىندا بەرىلەتىن تەگىن ءدارى-دارمەكتىڭ ءتىزىمى دە كوبەيەدى. بۇعان دەيىن ازاماتتار ءدارى الۋ ءۇشىن دارىگەرلەر جازىپ بەرگەن رەتسەپت بويىنشا رەسپۋبليكا داڭعىلىندا ورنالاسقان «گيپپوكرات» ءدارىحاناسىنا جۇگىنەتىن. ال 2018 جىلدان باستاپ ول دارىلەردى ءوزىنىڭ ەمحاناسىنان الا الادى.
دەنساۋلىق ساقتاۋ سالاسىن تسيفرلىق جۇيەگە كوشىرۋ اياسىندا قولعا الىنعان جوبانى جۇزەگە اسىرۋعا قالا ەمحانالارى ساقاداي ساي. جاڭا جوبانىڭ تيىمدىلىگى قالا اكىمدىگىنىڭ 1 ملرد تەڭگەدەي قاراجاتىن ۇنەمدەۋگە جول اشادى. ال ۇنەمدەلگەن قارجى مەديتسينا سالاسىنداعى وزگە دە قاجەتتىلىكتەرگە جۇمسالاتىن بولادى.
ايتا كەتەيىك, استانا قالاسى بويىنشا 2016 جىلى 84 مىڭ ادام, ال جىل باسىنان بەرى 98 مىڭ ازامات تەگىن ءدارى-دارمەكپەن قامتاماسىز ەتىلگەن.
گۇلميرا ايماعانبەت
