تەگىن قايتا دايارلاۋ كۋرستارى قاي ماماندىقتارعا وقىتادى؟
استانادا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا بيىل 500 ادامعا ارنالعان قايتا دايارلاۋ كۋرستارىن ۇيىمداستىرۋ جوسپارلانعان. وسىعان وراي قالا اكىمىنىڭ ورىنباسارى اندرەي لۋكيننىڭ توراعالىعىمەن جۇمىسپەن قامتۋ بويىنشا ۆەدومستۆوارالىق كوميسسيانىڭ وتىرىسى ءوتتى.
ەلوردانىڭ ەڭبەك نارىعىندا سۇرانىسقا يە ماماندىقتارعا وقۋعا جىبەرۋ ماسەلەسىن قاراعان كوميسسيا ءبىلىم بەرۋ ۇيىمدارىنىڭ وتىنىشتەرى مەن ۇسىنعان جوبالارىمەن تانىستى. قورىتىندىسىندا اعىمداعى جىلى تەگىن وقىتۋ كۋرستارىنان وتەتىن ماماندىقتاردى انىقتادى.
سونىمەن, باس قالادا مەكتەپ الدى دايارلاۋ ۇيىمدارىنىڭ ءتاربيەشىسى, ناۋبايشى, اسپاز, تىگىنشى, شاشتاراز-ۇستا, ەلەكترگازدانەكەرلەۋشى, ەلەكتر قۇرىلعىلارىنا قىزمەت كورسەتۋ جانە جوندەۋ بويىنشا ەلەكترومونتەر, ساۋدا مەنەدجەرى, قاداعالاۋشى-كاسسير, داياشى جەتىسپەيتىنى بەلگىلى بولدى.
سوندىقتان وسى جىلى استانا قالاسىنىڭ حالىقتى جۇمىسپەن قامتۋ ورتالىعى قىسقا مەرزىمدى قايتا دايارلاۋ كۋرستارىن ۇيىمداستىرادى.
جيىندا قىسقا مەرزىمدىك وقىتۋ كۋرستارىن وتكىزۋگە 14 ءبىلىم بەرۋ ۇيىمى مەن ورتالىقتارى ءوتىنىش بەرگەنى انىقتالدى. ناتيجەسىندە كوميسسيا ولاردىڭ 8-ءىن ىرىكتەپ الدى. ەندى استانا قالاسىنىڭ مەنەدجەمەنت جانە بيزنەس كوللەدجى, ەۋرازيا گۋمانيتارلىق ينستيتۋتىنىڭ كوللەدجى, استانا قالاسى اكىمدىگىنىڭ كوپبەيىندى كوللەدجى, باسقارۋ كوللەدجى, ىسكەر بيزنەس اكادەمياسى, شاشتاراز مەكتەبى, اقمولالىق وقىتۋ كۋرستىق كومبيناتى, بۋحگالتەرلەر ءۇيى ورتالىعى بازالارىندا جۇمىسسىزدار قىسقا مەرزىمدى قايتا دايارلاۋ كۋرستارىنان وتەتىن بولادى.