سايلاۋدا قانداي سانيتارلىق تالاپتار كۇشىندە بولاتىنى جونىندە ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا ءتۇسىندىرىپ بەردى.
ول 10 قاڭتاردا باس سانيتار دارىگەردىڭ قاۋلىسى جاريالاناتىنىن, قازىر ونىڭ فورماتى تالقىلانىپ جاتقانىن ايتتى. قاۋلىدا شارالاردىڭ نەگىزگى ءۇش ساناتى قابىلدانادى. «العاشقى سانات سايلاۋدى ۇيىمداستىرۋ ىسىنە باعىتتالعان. ەكىنشىسى – سايلاۋشىلارعا قويىلعان تالاپتار. ءۇشىنشىسى – سايلاۋ كۇنى سايلاۋ ۋچاسكەسىندە كۇنى بويى بولاتىن ادامدارعا قاتىستى تالاپتار. نىسانعا قاتىستى تالاپتار, بايلانىسسىز تەرمومەتريا, ادامدار اعىمىن رەتتەۋ, الەۋمەتتىك ارالىق, مىندەتتى ماسكالىق رەجيم مەن سانيتايزەرلەردى پايدالانۋ سەكىلدى ەرەجەلەر ەسەپكە الىنادى. سايلاۋشىلارعا قويىلاتىن تالاپتار بۇكىل ازاماتتارعا قويىلاتىن سول بۇرىنعى تالاپتار بولىپ قالا بەرەدى. اتاپ ايتقاندا, مىندەتتى تۇردە ماسكا كيۋ, انتيسەپتيك سەبۋدى ۇمىتپاۋ, الەۋمەتتىك اراقاشىقتىقتى ساقتاۋ تالاپتارى» دەدى ايجان ەسماعامبەتوۆا اتالعان جيىندا.
سونىمەن قاتار سايلاۋ ۋچاسكەسىندە بولاتىن ادامدارعا قويىلاتىن ناقتى تالاپتار بار. ايجان ەسماعامبەتوۆا ادامدار ىندەتتەن تەستىلەۋدەن وتۋگە تيىستىگىن جەتكىزدى. «قازىرگى تاڭدا ەلدە ەپيدەميولوگيالىق احۋالدىڭ تۇراقسىزدىعىن ەسەپكە الا وتىرىپ, وڭىرلەر بىردە «سارى», بىردە «قىزىل» ايماقتا تۇرعانىن كورىپ وتىرمىز. بۇل دەگەنىڭىز احۋالدىڭ تۇراقسىزدىعىن ايعاقتاي تۇسەدى. سول سەبەپتى سايلاۋ ۋچاسكەسىندە بولاتىن ازاماتتاردىڭ ءبارىن دە مىندەتتى تەستىلەۋدەن وتكىزۋ ماسەلەسى كوتەرىلۋدە. سونىمەن قاتار تەست ايماقتىڭ «قىزىل» نەمەسە «سارى» ايماقتا تۇرعانىنا قاراماستان وتكىزىلەدى. قازىرگى تاڭدا ءبىز ەپيداحۋال ماتريتساسىن ايماقتار تۇرعىسىندا عانا ەمەس, اۋداندار تۇرعىسىندا دا سالا باستادىق. 25 جەلتوقساننان باستاپ سايلاۋ كۇنىنە دەيىن بايقاۋشىلار مەن سەنىمدى وكىلدەر پتر-تەستتىڭ تەرىس ناتيجەسىن كورسەتۋى كەرەك» دەدى ول. قۇزىرلى كوميتەت باسشىسى سايلاۋ ۋچاسكەسىندەگى ازاماتتار تەستتەن تەگىن وتە الاتىنىن ءمالىم ەتتى.