استانا قالاسى ەنەرگەتيكا باسقارماسى Wi-Fi-عا تەگىن قوسىلۋعا مۇمكىندىك بەرەتىن جانە ۇيالى تەلەفوندار مەن پلانشەتتەردى قۋاتتايتىن قۇرىلعىلاردى ورناتۋدى قولعا الدى. مۇنداي ورىندار ەلوردانىڭ ءار اۋدانىندا, ناقتىراق ايتساق, 18 جەردە جۇمىس ىستەيتىن بولادى.
بۇل باستاما «ەكسپو-2017» حالىقارالىق مامانداندىرىلعان كورمەسى قارساڭىندا قالا تۇرعىندارى مەن قوناقتارىنا جايلى جاعداي جاساۋ ماقساتىندا قولعا الىنىپ وتىر. قۇرىلعى ارنايى باتارەيالاردىڭ كومەگىمەن كۇن ەنەرگياسىن جيناقتاپ, ەلەكتر قۋاتىن ءوندىرىپ شىعارادى. بۇگىندە ەلوردالىقتار ۇيالى تەلەفوندارىن «استانا» كونتسەرت زالى الاڭىندا ورناتىلعان اۆتونومدى باعاندار مەن ورىندىقتاردا قۋاتتاي الادى.
باسقارما وكىلى رۋستام قادىروۆتىڭ ايتۋىنشا, وسى ايدىڭ سوڭىنا دەيىن قوندىرعىلار سول جاعالاۋدا, پرەزيدەنت پاركىندە ورناتىلادى. سۇراستىرا كەلە, بۇل جوبانىڭ تەك باسى عانا ەكەندىگىن بىلدىك. «بولاشاقتا جىلى ايالدامالاردى دا دەربەس تۇردە ءوزىن قۋاتپەن قامتاماسىز ەتە الاتىنداي جاساۋ جوسپاردا بار. قالاداعى ەنەرگيا جەلىسىندەگى جۇكتەمەنى ازايتۋ ءۇشىن فوتوەلەكترلىك ەلەمەنتتەر مەن جەل گەنەراتورىن ورناتا باستايمىز» دەدى ول.
گۇلدانا تالعاتقىزى
