«Digital System Servis» جشس كومپانياسى تەلەكوممۋنيكاتسيالىق نارىقتا 2005 جىلدان باستاپ تۇراقتى قىزمەت كورسەتىپ كەلەدى. وسى كەزەڭ ىشىندە ول Mitel, Aastra, Ericsson, Advantech Wireless جانە ت. ب. سياقتى جەتەكشى الەمدىك وندىرۋشىلەرمەن تابىستى جۇمىس ىستەپ, ءوزىن سەنىمدى سەرىكتەس رەتىندە مويىنداتتى.
كومپانيا تەلەكوممۋنيكاتسيالىق جابدىقتاردى جوبالاۋدى, جەتكىزىپ بەرۋدى, مونتاجداۋدى, كەشەندى ينتەگراتسيالاۋدى جۇزەگە اسىرادى جانە ونىمدەرىن پايدالانۋعا بەرەدى. بۇل سالادا تەك قازاقستاندا عانا ەمەس, الىس-جاقىن شەتەلدىك كاسىپورىندارعا دا سەرۆيستىك قىزمەت كورسەتەدى.
IT سالاسىنداعى اۋتسورسينگتى قامتيتىن تەلەكوممۋنيكاتسيالىق جوبالاردى ازىرلەيدى جانە وسى باعىتتا باسقا دا قىزمەتتەردىڭ تولىق سپەكترىن ۇسىنادى.
– «Digital System Servis» جشس ءاردايىم دامۋعا جانە ءوزىن-ءوزى جەتىلدىرۋگە ۇمتىلادى, ول تولاسسىز دامۋ ۇستىندە, – دەدى كاسىپورىن ديرەكتورى مارات مۇسابەكوۆ. – ءبىز كورسەتەتىن قىزمەتتەردىڭ بارلىعىنىڭ ساپاسى جوعارى بولىپ تابىلادى. وعان الەمدىك دەڭگەيدەگى كومپانيالاردىڭ ءبىزدى سەرىكتەس رەتىندە مويىنداۋى جانە اتقارعان جوبالارىمىزدىڭ تابىستىلىعى كەپىل.
كومپانيا العاش تەلەكوممۋنيكاتسيالىق جابدىقتار مەن ونىڭ باعدارلامالىق جاساقتاماسىن ازىرلەي باستاعانىندا ۇيىمدا تەك ءۇش-اق ادام بولعان. ودان ءوندىرىستى وركەندەتۋ جانە شىعارىلاتىن ونىمدەر كولەمىن ۇلعايتۋ ماقساتىندا زاۋىت سالۋ قاجەت بولدى. 2016 جىلى نۇر-سۇلتان قالاسىنىڭ اكىمدىگى «استانا – جاڭا قالا» ارنايى ەكونوميكالىق ايماعىنىڭ №1 يندۋستريالدى پاركى اۋماعىنان تەلەكوممۋنيكاتسيالىق جابدىقتار –مودەمدەر, كوممۋتاتورلار شىعاراتىن زاۋىت قۇرىلىسىنا جەر ۋچاسكەسىن ءبولدى. دەگەنمەن كاسىپورىن قورىنداعى قاراجات زاۋىت سالۋعا جانە ءوندىرىستى ءارى قاراي دامىتۋعا جەتكىلىكتى ەمەس ەدى.
كاسىپكەر م.مۇسابەكوۆ بيزنەسكە مەملەكەتتىك قولداۋ الۋ ءۇشىن «دامۋ» قورىنىڭ استانالىق فيليالىنا جۇگىندى. قاجەتتى قۇجاتتار پاكەتىن جيناپ, ويعا العان ىسىنە بەل شەشە كىرىستى. سودان 3-4 ايدىڭ ىشىندە مەملەكەتتەن بىرنەشە باعدارلاما بويىنشا كەشەندى قولداۋ تاپتى. زاۋىت قۇرىلىسىن ينۆەستيتسيالاۋعا 14,25 پايىز نەسيە ءبولىندى, ونىڭ 40 پايىزى «بيزنەستىڭ جول كارتاسى-2020» مەملەكەتتىك باعدارلاماسى شەڭبەرىندە سۋبسيديالاناتىن بولدى. قالعان بولىگىن كاسىپكەردىڭ ءوزى تولەدى. نەسيە مەرزىمى – 5 جىل.
نەسيە الۋعا قويىلاتىن كەپىل مۇلىكتىڭ جەتكىلىكسىزدىگىنە بايلانىستى «دامۋ» قورى ونىڭ 30 پايىز مولشەرىن ءوز تاراپىنان كەپىلدەندىردى. سونداي-اق مەملەكەتتىڭ وڭدەۋشى ونەركاسىپتى قولداۋ باعدارلاماسى اياسىندا وندىرىستىك ستانوكتاردى جەڭىلدىكپەن ساتىپ الۋعا 6 پايىزبەن قارىز بەرىلدى. سونىڭ ناتيجەسىندە 2018 جىلدان باستاپ كومپانيا كەلەسىدەي تەلەكوممۋنيكاتسيالىق جابدىقتاردى وندىرۋگە كىرىستى: مودەمدەر, كوممۋتاتورلار, تەلەفون ستانسالارى. 2019 جىلى كومپانيا جيناقتاۋشىلاردى ساتىپ الۋ ءۇشىن «Forte Bank» اق بانكىنەن قوسىمشا تاعى نەسيە الدى.
بۇگىندە «Digital System Servis» جشس-تە 70-كە تارتا ادام جۇمىس ىستەيدى. ماماندار قازاقستاننىڭ ماقتاۋلى تەحنيكالىق ۋنيۆەرسيتەتتەرىنەن باسقا, ۇلىبريتانيانىڭ, ماسكەۋدىڭ جوعارى وقۋ ورىندارىندا وقىپ كەلگەن. زاۋىت ايىنا 3 مىڭ ءتۇرلى قۇرىلعىلار شىعارادى. كەلەر جىلى جابدىقتار سانىن ايىنا 40 مىڭعا جەتكىزۋ جوسپارى بار.
– وعان كاسىپورىن قۋاتىنىڭ جانە ماماندارىمىزدىڭ بىلىكتىلىگى تولىق جەتەدى. زاۋىتتىڭ ءالى دە ىسكە قوسىلماي جاتقان وندىرىستىك تسەحتارى بار. سول كەزدە جۇمىسشىلار سانىن دا ارتتىراتىن بولامىز. ءتىپتى قازىر دە قوسىمشا جۇمىس قولىنا ءزارۋمىز. ازىرگە زاۋىتتا جۇمىس ىستەۋگە قۇلشىنىپ وتىرعان جاستاردى كوپ كەزدەستىرە قويمادىق, – دەيدى مارات مۇراتۇلى.
ايتا كەتەيىك, كومپانيا قىزمەتكەرلەرىنىڭ ورتاشا جالاقىسى – 178 مىڭ تەڭگە. جۇمىسشىلار ءۇشىن ەكى جاتاقحانا سالىنعان. قىزمەتكەرلەر زاۋىت اسحاناسىنان تەگىن تاماقتانادى. ودان بولەك, 2-3 جىلدا وزات ماماندارعا پاتەر سىيلاۋ داستۇرگە اينالعان. سونداي-اق جىل سايىن شەتەلدە دەمالىپ كەلۋگە 10 ادامعا تەگىن جولداما بەرىلەدى.
