دوستىق ۇيىندە مەملەكەتتىك ءتىلدىڭ مارتەبەسى مەن ماڭىزدىلىعىن ناسيحاتتاۋ ماقساتىندا «ءتىل – دوستىقتىڭ التىن كوپىرى» بايقاۋى ءوتتى. قحا-نىڭ 25 جىلدىعىنا وراي «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا نۇر-سۇلتان قالاسىنىڭ ىشكى ساياسات باسقارماسى جىل سايىنعى «ءتىل – دوستىقتىڭ التىن كوپىرى» اتتى بايقاۋىن ۇيىمداستىردى.
سايىسقا قازاقستان ۇيعىرلارىنىڭ رەسپۋبليكالىق ەتنومادەني ورتالىعىنىڭ فيليالى, «تاڭ» تاتار-باشقۇرت ەتنومادەني ورتالىعى, «يۋنچي» دۇنگەن ەتنومادەني ورتالىعى, «جايحۋن» قاراقالپاق ەتنومادەني بىرلەستىگى, «لاد» رەسپۋبليكالىق سلاۆيان قوزعالىسىنىڭ استانالىق فيليالى, «ۆايناح» شەشەن-ينگۋش ەتنومادەني ورتالىعى قاتىستى.
بايقاۋدىڭ ءبىرىنشى كەزەڭىندە قاتىسۋشىلار قازاقتىڭ داستۇرلەرىنەن كورىنىس قويدى. ەكىنشى كەزەڭدە كورەرمەندەر نازارىنا «قازاقستان حالقى اسسامبلەياسىنداعى ەتنومادەني ورتالىقتىڭ ماڭىزى» نەمەسە «ءتىل – دوستىقتىڭ التىن كوپىرى» تاقىرىبىندا بەينەروليكتەر ۇسىنىلدى. ءۇشىنشى كەزەڭدە قاتىسۋشىلار اباي ولەڭدەرىن مانەرلەپ وقىدى.
«ءار مەملەكەتتىڭ ءوز ءتىلى بولماسا, مەملەكەت بولىپ سانالمايدى. ەلباسىنىڭ «ءوز وتانىڭنىڭ پاتريوتى بولۋ – بۇل قازاقستاندى ءوز جۇرەگىڭدە ۇيالاتۋ» دەگەن ءسوزى بار. مەملەكەت بار جەردە ءتىل بولۋى كەرەك. انا ءتىلىمىز –مەملەكەتىمىزدىڭ نەگىزى. ءتىل بار جەردە مادەنيەت تە, ءدىل دە, ساياسات تا بولادى» دەدى نۇر-سۇلتان قالاسى ىشكى ساياسات باسقارماسىنىڭ باسشىسى تالعات راحمانبەردى.
بايقاۋ قورىتىندىسىندا 1-ورىندى «جايحۋن» قاراقالپاق ەتنومادەني بىرلەستىگى, 2-ورىندى «يۋنچي» دۇنگەن ەتنومادەني ورتالىعى, 3-ورىندى قازاقستان ۇيعىرلارىنىڭ رەسپۋبليكالىق ەتنومادەني ورتالىعىنىڭ فيليالى يەلەندى.
