ەلوردادا قازاقستان حالقى تىلدەرىنىڭ ءXVىى قالالىق فەستيۆالى سالتاناتتى جاعدايدا اشىلدى. «كونگرەسس-حوللعا» جينالعان قاۋىم كۇمبىرلەگەن كۇي مەن اسەم انگە قۇلاق قۇرىشىن قاندىرىپ, مىڭ بۇرالعان بيشىلەردىڭ ونەرىنە ءتانتى بولدى. اۋقىمى كەڭ شارادا قازاق حاندىعىنىڭ 550 جىلدىعى, قر كونستيتۋتسياسى مەن قازاقستان حالقى اسسامبلەياسىنىڭ 20 جىلدىعى سىندى بيىلعى ماڭىزدى مەرەكەلەر ايشىقتالدى.
فەستيۆالدى استانا قالاسى اكىمىنىڭ ورىنباسارى ەرمەك امانشاەۆ قۇتتىقتاۋ سوزىمەن اشتى. شارانىڭ ءمان-ماڭىزىن اتاپ وتكەن ول تىلدەر مەرەكەسى قازاق ءتىلىنىڭ قولدانىس اياسىن كەڭەيتۋگە مول سەپتىگىن تيگىزەتىنىن, تەك انا ءتىلىمىزدى عانا ەمەس, ەلىمىزدە تاتۋلىقتا تۇرىپ جاتقان وزگە ۇلتتار تىلدەرىنىڭ ناسيحاتتالۋىنا دا ۇلەس قوسىپ كەلە جاتقانىن ايتتى.
قر پارلامەنتى ءماجىلىسىنىڭ دەپۋتاتى باقىتبەك سماعۇل كورەرمەن بولىپ وتىرعان جاستارعا جىگەرلەندىرەتىندەي سوزدەر ارناپ, جىردان شاشۋ شاشتى.
ساحناعا بوكستان ەكى دۇركىن الەم چەمپيونى, وليمپيادا جەڭىمپازى سەرىك ساپيەۆ كوتەرىلگەندە زال دۇركىرەپ قول سوقتى. «سىزدەردىڭ قولداۋلارىڭىزدىڭ ارقاسىندا الەمگە ايگىلى سپورتشى اتاندىم» دەگەندى حالىققا قاراتا ايتقان اتاقتى سپورتشى دارىندى ءجاسوسپىرىم سپورتشىلارعا الداعى جارىستاردا اق جول تىلەدى.
جالپى, فەستيۆالدىڭ اشىلۋ سالتاناتى ەشكىمدى جالىقتىرعان جوق. مۇندا الەمدەگى تىلدەر جونىندە تانىمدىق اڭگىمەلەر ايتىلدى. ۇلگى-ونەگە بولاتىن كورىنىستەر دە مولىنان قامتىلدى. ماسەلەن, «24 كz» تەلەارناسىنىڭ باعدارلاما جۇرگىزۋشىسى ەلۆيرا يۆانوۆا انا تىلىمىزدە جاڭىلتپاشتاردى ايتقاندا, ەش جاڭىلمادى. ال. كەشتىڭ ونە بويىن كومكەرگەن سان جانرداعى مۋزىكا كورەرمەننىڭ كوڭىل حوشىن اشا ءتۇستى.
بەلگىلى كۇيشىلەر انار مۇزداحانوۆا مەن تۇرار الىپباەۆ كۇيمەن تارتىستى. تانىمال ءانشى, سازگەر ەلەنا ابدىحالىقوۆا مەن جاس ءانشى يبراگيم ەسكەندىر وزدەرى ورىنداعان اندەرىمەن حالىقتىڭ رۋحىن كوتەردى. ايگۇل ەلشىباەۆا «سۇگىردىڭ تەرمەسىمەن» دەلەبەنى قوزدىردى. بۇلارعا قوسا بيبىگۇل جانۇزاق, شاھاريزات سەيداحمەت سىندى انشىلەر ونەر كورسەتتى. «كوك تۇرىكتەر» ءانسامبلى باياعى باعزى زاماندارعا باستادى. «مۋزارت» توبىنىڭ مۇشەسى, حالىقتىڭ سۇيىكتى ۇلى ساكەن مايعازيەۆتىڭ ءان سالۋى كوپشىلىككە سىيلىق بولدى.
فەستيۆال ءالى ەكى اپتاعا جالعاسادى. ونىڭ اياسىندا «ۇزدىك جارناما», «مەملەكەتتىك ءتىل – مەملەكەتتىك قىزمەتتە» اتتى بايقاۋلار, «تاريح پەن ءتىل تامىرلاس» اتتى اقىندار ءمۇشايراسى, «ءبىز مەملەكەتتىك تىلدە قىزمەت كورسەتەمىز» اتتى اكتسيا ۇيىمداستىرىلادى. بارلىق شارالار قالالىق الاڭدا وتەتىن «ءتىل تۇتاستىعى – ەل تۇتاستىعى» اتتى گالا-كونتسەرتپەن قورىتىندىلانادى.
امانعالي قالجانوۆ
