جاقىندا نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن «قازاقشا سويلەيىك» اتتى كلۋب اشىلدى. ونىڭ العاشقى ساباعى «الماتى» بيزنەس ورتالىعىندا ءوتتى.
كلۋبتىڭ ماقساتى – مەملەكەتتىك ءتىلدى ۇيرەنگىسى كەلەتىن ءار ازاماتقا كومەك كورسەتۋ, ءوز ويىن قازاق تىلىندە ەركىن جەتكىزۋگە ۇيرەتۋ.
العاشقى ساباققا قازاق تىلىندە سويلەۋ داعدىسىن جەتىلدىرگىسى كەلەتىن قالا تۇرعىندارى قاتىستى. «رۋحانيات» كوممۋنالدىق مەملەكەتتىك مەكەمەسىنىڭ وقىتۋشىسى دينارا مامىروۆا جۇرگىزگەن ساباق ءارتۇرلى فورماتتا وتكىزىلدى. كلۋب وقىتۋشىسى ءتىل ۇيرەنۋشىلەرگە جاڭا تىلدىك, الەۋمەتتىك جانە مادەني ورتاعا بەيىمدەلۋگە جانە قازاق ءتىلىن كوممۋنيكاتيۆتىك تۇرعىدان جەتىك مەڭگەرۋگە كومەك كورسەتتى. ساباقتا وي شاقىرۋ, پىكىر الماسۋ, ويتالقى, ويىن ەلەمەنتتەرى, جاعداياتتىق تاپسىرمالار, جۇپتىق, توپتىق جۇمىس تۇرلەرى قولدانىلدى.
سونداي-اق «رۋحانيات» مەكەمەسى اعىلشىن ءتىلىن ۇيرەنگىسى كەلەتىندەرگە ساباق وتكىزەدى. جۋىردا «English speaking club» سويلەسۋ كلۋبىنىڭ ساباقتارى الماتى جانە بايقوڭىر اۋداندارى اكىمدىكتەرىندە ۇيىمداستىرىلدى.
بۇل باعدارلاما اعىلشىن تىلىندە سويلەۋ پراكتيكاسىنا قىزىعۋشىلىق تانىتاتىن جانە ونى بەيرەسمي جاعدايدا تەرەڭىرەك مەڭگەرگىسى كەلەتىن تىڭداۋشىلارعا ارنالعان. ساباققا اعىلشىن تىلىندە سويلەۋ داعدىسىن جەتىلدىرگىسى كەلەتىن قالا تۇرعىندارى قاتىستى. كلۋبتى تاجىريبەلى وقىتۋشىلار دجەيمار راموس جانە ارمين بابايان جۇرگىزدى.
ءبىر ايتا كەتەرلىگى, سويلەسۋ كلۋبىنداعى ساباقتى ءتىل تاسىمالداۋشى مامان يەسى جۇرگىزەدى. ساباقتار اپتاسىنا ءبىر رەت وتكىزىلەدى. ورىندار سانى شەكتەۋلى بولعاندىقتان, قاتىسقىسى كەلەتىن ادامدار 24-90-52 نومىرىنە حابارلاسىپ, الدىن الا جازىلۋى شارت. قاتىسۋشىلارعا قويىلاتىن تالاپتار – اعىلشىن ءتىلىن elementary, pre-intermediate دەڭگەيىندە ءبىلۋ.
