كەشە تۇندە ەلوردادا توتەنشە جاعداي تىركەلدى. قايعىلى وقيعا كوكتال تۇرعىن الابىنداعى شىڭعىستاۋ كوشەسىندە بولدى. جەكە ءۇيدىڭ اۋلاسىنداعى ۋاقىتشا تۇرعىزىلعان باسپانادان شىققان ءورت تۋرالى حابار توتەنشە جاعدايلار دەپارتامەنتىنىڭ «101» پۋلتىنە ساعات 02:34-تە كەلىپ تۇسكەن.
30 شارشى مەتر اۋماقتى شارپىعان جالىن سالدارىنان 25 شارشى مەترلىك توبە وپىرىلا قۇلاعان. وقيعا ورنىنا جەتكەن ءورت سوندىرۋشىلەر ءتىلسىز جاۋدى سوندىرگەنىمەن, ىشتە قالىپ كەتكەن بالالاردى قۇتقارا المادى. ءورت ورنىنان 2006, 2008, 2013, 2015 جانە 2018 جىلدارى تۋعان بەس بالانىڭ ءمايىتى تابىلدى. ەڭ كىشىسى نەبارى – ءۇش ايلىق. ال ولاردىڭ اكە-شەشەسى تۇنگى اۋىسىمداعى جۇمىستا بولعان ەكەن. قايعىلى وقيعا جايلى الەۋمەتتىك جەلىدە قاراپايىم حالىقتان باستاپ, قوعام بەلسەندىلەرى ماسەلە كوتەردى.
استانانىڭ اينالاسىندا بىرەۋدىڭ ۇيشىگىن جالعا الىپ, ءومىر ءسۇرىپ جۇرگەن وتباسىلار جەتىپ ارتىلادى. ءورتتىڭ 65,9 پايىزى وسىنداي جەكە تۇرعىن ءۇي اۋماقتارىنان شىعادى. استانا قالاسى توتەنشە جاعدايلار دەپارتامەنتىنىڭ مالىمەتىنە سۇيەنسەك, وتكەن جىلى استانادا 699 ءورت تىركەلىپ, 10 ادام قازا تاپقان. ونىڭ بىرەۋى – بالا. ال بيىلدىققا العاش تىركەلگەن ورتتەن ءبىر ءۇيدىڭ بەس بىردەي بالاسى كوز جۇمىپ وتىر. ءبىر تۇندە بار قىمباتىنان ايىرىلعان اتا-انانىڭ اۋىر جاعدايىن ايتپاسا دا تۇسىنىكتى. تۇرمىستىڭ اۋىرتپالىعى, الەۋمەتتىك جاعدايدىڭ تومەندىگى اتا-انانى تۇنگى اۋىسىمدا جۇمىس ىستەۋگە ماجبۇرلەگەنى بەلگىلى بولىپ وتىر.
استانا قالاسىنىڭ اكىمى باقىت سۇلتانوۆ «كوكتال-1» تۇرعىن الابىندا ورىن العان وسى جاعدايعا بايلانىستى شۇعىل جيىن وتكىزدى. «اۋىر جاعدايعا دۋشار بولعان وتباسىنا قايعىرا كوڭىل ايتامىن. قالا باسشىلىعى وقيعا ورنىندا بولدى, قازا تاپقان بالالاردىڭ اتا-اناسىمەن پسيحولوگتار جانە الەۋمەتتىك قىزمەت ماماندارى جۇمىس ىستەۋدە. زارداپ شەككەن وتباسىنا قالالىق الەۋمەتتىك قورعاۋ باسقارماسى تاراپىنان ماتەريالدىق كومەك كورسەتىلەدى. سارىارقا اۋدانى اكىمىنە جەرلەۋ ءراسىمىن ۇيىمداستىرۋدى جانە وتباسىنا ۋاقىتشا باسپانا بەرۋدى, جانعان ءۇيدى تەز ارادا قالپىنا كەلتىرۋ ءۇشىن قاراجات ءبولۋدى تاپسىرامىن» دەدى. ءوز كەزەگىندە, توتەنشە جاعدايلار دەپارتامەنتى باستىعىنىڭ مىندەتىن اتقارۋشى مارعۇلان امانباەۆ وسىعان دەيىن «كوكتال-1» تۇرعىن الابىندا ءورت جانە باسقا دا توتەنشە جاعدايلار بولدىرماۋ ءۇشىن پروفيلاكتيكالىق جۇمىستار جۇرگىزىلگەنىن ايتادى. سول كەزدە دەپارتامەنت قىزمەتكەرلەرى بۇل ۇيگە بارىپ, ولقىلىقتاردى جويۋ ءۇشىن ەسكەرتپە بەرگەن كورىنەدى. قالا باسشىسى اۋدان اكىمدەرى مەن توتەنشە جاعدايلار دەپارتامەنتى جانە پوليتسياعا بىرلەسىپ دەرەۋ جەكە سەكتورداعى ءار ۇيگە بارىپ ءورت قاۋىپسىزدىگى ەرەجەلەرىن ساقتاۋ تۇرعىسىندا تەكسەرىس, ءتۇسىندىرۋ جۇمىستارىن جۇرگىزۋدى تالاپ ەتتى.
جالپى, جەكەمەنشىك تۇرعىن ۇيلەردەگى ءورتتىڭ نەگىزگى سەبەپتەرى پەشتى جىلىتۋ جانە ەلەكتر جابدىعىن پايدالانۋ كەزىندەگى قاۋىپسىزدىكتى ساقتاماۋ سالدارىنان بولادى. جىلىتۋ ماۋسىمى باستالىسىمەن جەكەمەنشىك ۇيلەردەگى ءورتتىڭ تۇتانۋى جانە گازدان ۋلانۋ جاعدايلارى ارتادى.
