بۇگىن استانادا «ەكسپو-2017» حالىقارالىق مامانداندىرىلعان كورمە اياسىندا قوستاناي وبلىسىنىڭ مادەني كۇندەرى باستالادى. توبىل-تورعاي ءوڭىرىنىڭ مادەنيەتى 9 تامىزعا دەيىن ەلوردا تورىندە سالتانات قۇرادى. بۇل كۇندەرى سۋرەتشىلەر, مۇسىنشىلەر, قولونەر شەبەرلەرى, ءانشى, ارتىستەر, ونەرپازدار, سپورتشىلار ونەر كورسەتەدى.
ءوڭىردىڭ مادەني باعدارلاماسىنا تولىعىراق توقتالساق, 5 تامىزدا كەشكە «ەكسپو» قالاشىعىنداعى امفيتەاترىندا وبلىس كۇندەرىنىڭ اشىلۋ سالتاناتى جانە ءوڭىردىڭ ۇزدىك شىعارماشىلىق ۇجىمدارىنىڭ گالا-كونتسەرتى وتەدى.
6 تامىزدا تۋستەن كەيىن «ەتنواۋىل» ۇلتتىق-مادەني كەشەنىندە «شىرقار ءانىم تۋعان ولكەم – قوستاناي!» كونتسەرتىندە حالىق اندەرىن ورىنداۋشىلاردىڭ جانە ە. ومىرزاقوۆ اتىنداعى وبلىستىق فيلارمونياسى شىعارماشىلىق ۇجىمدارىنىڭ ونەرىن, ال «قولونەرشىلەر» سەكتورىندا 20 قولونەر شەبەرىنىڭ «تۋعان جەر قۇشاعىندا» ەكسپوزيتسيالىق كورمەسىن تاماشالاۋعا بولادى.
وسى كۇنى ساعات 18.00-دە ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ءى. وماروۆ اتىنداعى وبلىستىق قازاق دراما تەاترىنىڭ ىبىراي التىنسارينگە ارنالعان «دالا شامشىراعى» سپەكتاكلى قويىلادى.
7 تامىزدا ساعات 19.00-دە م.گوركي اتىنداعى مەملەكەتتىك اكادەميالىق ورىس دراما تەاترىندا ۇلت ۇستازى احمەت بايتۇرسىنۇلى مەن ونىڭ زايىبى بادريسافاعا ارنالعان «اق كەلىننىڭ ماحابباتى مەن ءولىمى» قويىلىمىن تاماشالاي الاسىزدار.
قالانىڭ ورتالىق الاڭىندا «سلاۆيانسكايا پەسنيا» ورىس حالىق اسپاپتار وركەسترى مەن ءانسامبلىنىڭ «مۋزىكا – دۋشا نارودا» باعدارلاماسى ۇيىمداستىرىلادى.
ال 8 تامىزدا وسى جەردە «كوستانايسكيە زوري» بي ءانسامبلىنىڭ «سيقىرلى بي الەمى» حورەوگرافيالىق شوۋى بولادى.
5 جانە 6 تامىز كۇندەرى «قازانات» اتشابارىندا سپورتتىڭ ۇلتتىق تۇرلەرى بويىنشا جارىستار وتەدى: قىز قۋ, اۋدارىسپاق, جامبى اتۋ, توعىزقۇمالاق, قازاق كۇرەسى, الامان بايگە, قۇنان بايگە سىندى ۇلتتىق ويىنداردى تاماشالايسىزدار.
ال بۇگىن جانە ەرتەڭ «قازاقستان» سپورت كەشەنى ماڭايىندا ۇيىمداستىرىلاتىن قوستاناي وبلىسىنىڭ اۋىل شارۋاشىلىعى ونىمدەرىن وندىرۋشىلەرىنىڭ جارمەڭكەسىندە ايماقتىڭ 14 اۋدانى مەن قالالارىنىڭ ونىمدەرى ۇسىنىلادى.
امانعالي قالجانوۆ
