استانا قالاسى ءماسليحاتىنىڭ دەپۋتاتتارى توتەنشە جاعدايلار قىزمەتىنە قاراستى بىرنەشە قۇرىلىس نىسانىنا بارىپ, ساپاسىن كورىپ, ماسەلەسىن ءبىلدى.
كەيىنگى جىلدارى تابيعي جانە تەحنوگەندىك اپاتتىڭ كوبەيۋ تەندەنتسياسى بايقالىپ وتىر. قۇرعاقشىلىق جىلدارى ءورت ءتىپتى ءورشىپ كەتەدى. بيىل ورمان-توعايلاردى ءورت شارپىپ, قانشاما گەكتار تابيعي بايلىقتان ايىرىلىپ قالدىق. تۇرعىن ءۇي سەكتورىندا دا ءجيى-ءجيى ءورت شىعادى. قازىر ءورتتىڭ الدىن الۋ جانە دەر كەزىندە ءسوندىرۋ ماڭىزدى ىسكە اينالدى. ال قىس ايلارىندا قالىڭ قار تۇسسە, كوكتەم مەزگىلىندە قارعىن سۋدان ساقتانۋ ماسەلەسى تۋىندايدى. قىسقاسى, توتەنشە جاعدايلار قۇرىلىمى قىسى-جازى كەز كەلگەن وقىس جاعدايعا ساقاداي ساي تۇرۋى كەرەك.
بۇل مىندەتتى ساپالى اتقارۋدا سالانىڭ ماتەريالدىق-تەحنيكالىق بازاسى مەن عيماراتتارىن تالاپقا ساي ەتۋ ماڭىزدى. بارىنەن بۇرىن, سالاعا كاسىبي مامانداردى دايارلاۋ جانە تارتۋ مىندەتى تۇر. جاقىندا اشىلعان «جاس قۇتقارۋشى» وقۋ ورتالىعى وسى باعىتتاعى تىڭدىرىمدى ءىستىڭ ءبىرى عانا. جىل اياعىنا دەيىن كوكتال جانە ۇركەر اۋماعىنداعى ءورت ءسوندىرۋ دەپوسىنىڭ قۇرىلىسى اياقتالادى. بۇل قۇرىلىس نىساندارىنىڭ ماسەلەسى جوق ەمەس. حالىق قالاۋلىلارى سول ءۇشىن اتقا قونىپ, قۇرىلىس نىساندارىنا ارنايى باردى.
دەلاگاتسيانى ءماسليحات توراعاسى ەرلان كاناليموۆ باستاسا, بۇل قاتاردا دەپۋتات ازامات ايتحوجين, اسقار سماعۇلوۆ, عابيت ءتاجىمۇراتوۆ, التىنشاش تابۋلدينا, باھاركۇل تولەگەنقىزى جانە توتەنشە جاعدايلار دەپارتامەنتىنىڭ باسشىلىق قۇرامى بولدى.
– قالادا بارلىعى 11 ءورت ءسوندىرۋ ءبولىمى مەن اۆياتسيالىق قۇتقارۋ جاساعى بار. ءبولىم قۇرىلىمىندا 1700-دەن استام ادام قىزمەت ەتەدى, 160-تان استام ارنايى تەحنيكا بار. ەلوردا حالقىنىڭ تورتتەن ءبىرى 16 ەلدى مەكەندە تۇراتىن بولسا, سولاردىڭ ىشىندەگى حالقىنىڭ سانى جانە اۋماعى جاعىنان كوكتال ءىرى ەلدى مەكەن سانالادى. ءبىر جاعى قالانىڭ ىرگەسىندە ورنالاسقان. ياعني سارىارقا جانە سوعان ىرگەلەس اۋدانداردا ءورت بولعان جاعدايدا كوكتالداعى بولىمشەنى قوسىمشا كۇش رەتىندە جۇمىلدىرۋعا بولادى, – دەدى استانا قالاسى تجد باستىعىنىڭ مىندەتىن اتقارۋشى دامير ەرماعامبەتوۆ.
راسىندا 3 مىڭ گەكتار اۋماقتا 36 مىڭنان اسا حالىق تۇرادى. 3 مەكتەپ جانە كوللەدج, 15 بالاباقشا جانە مادەني-سپورتتىق كەشەندەر ورنالاسقان ەلدى مەكەنگە ءورت ءسوندىرۋ دەپوسى سۇرانىپ تۇر. دەگەنمەن قۇرىلىس نىسانىندا ماسەلەلەر تۋىنداۋدا. 2021 جىلى قۇرىلىسى باستالعان نىساندى گازعا قوسۋ قاراستىرىلماعان-دى. دەپۋتاتتار وسى ماسەلەنى نازارعا الىپ, قۇرىلىستىڭ جۇرگىزىلۋ بارىسىمەن تانىستى.
كوكتالداعى ءورت ءسوندىرۋ دەپوسى 4 شىعۋعا ارنالعان جانە جانىندا پاتەر ۇلگىسىندە قىزمەتكەرلەرگە ارنالعان قىزمەتتىك جاتاقحانا سالىنۋدا. مۇنداعى جۇمىستىڭ 65 پايىزى اياقتالدى. ياعني عيماراتتىڭ قابىرعاسى تۇرعىزىلىپ, شاتىردىڭ مەتالل قۇرىلىمىن سالۋ جۇمىستارى باستالدى. ال ۇركەردەگى ءورت ءسوندىرۋ دەپوسى 2 شىعۋعا ارنالعان. مۇندا سۋ جانە سۋ تارتۋ جۇمىسى جۇرگىزىلىپ, كارىز قۇبىرىنا قوسىلدى. قابىرعاسى تۇرعىزىلدى. الايدا بىلايعى جۇمىستارى توقتاپ تۇر. دەپۋتاتتار وسىنىڭ ءمان-جايىن ءبىلدى.
مەردىگەر كومپانيا – «التاير-سك 7» باس ينجەنەرى ءابدىراحمان پايزيەۆتىڭ سوزىنشە, قۇرىلىس ماتەريالدارى قىمباتتاپ كەتتى. سول سەبەپتى قۇرىلىس شىعىنى قايتا ەسەپتەلۋدە. قۇجاتتاندىرۋدى ىشكى اۋديت باسقارماسى قاراۋدا. قىركۇيەك ايىندا قۇرىلىس جۇمىستارىن قايتا باستاۋ جوسپارلانۋدا ەكەن.
