ەلورداداعى ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ كونتسەرت زالىندا قازاق وركەسترىنىڭ ححVI-كونتسەرتتىك ماۋسىمىنىڭ جابىلۋىنا وراي قازاقستاننىڭ ەڭبەك سىڭىرگەن قايراتكەرى, كۇيشى انار مۇزداحانوۆانىڭ شىعارماشىلىق كەشى ءوتتى. كۇيشىنىڭ تۋرا 60 جاسقا تولعان تۋعان كۇنىندە وتكەن «اققۋ-دومبىرا» اتتى كونتسەرتتىك كەشتە ا. مۇزداحانوۆانىڭ جانە قازاقستان كومپوزيتورلارىنىڭ كۇيلەرى, اندەرى, وركەسترگە جازىلعان شىعارمالارى ورىندالدى.
كەشكە فيلارمونيانىڭ قازاق وركەسترى, مادەنيەت سالاسىنىڭ ۇزدىگى نۇراي تاناباەۆ, “قۇرمەت” وردەنىنىڭ يەگەرى جانار ءجۇسىپوۆا, حالىقارالىق بايقاۋلاردىڭ لاۋرەاتى فيرۋزا راحمەتوۆا, انار مۇزداحانوۆانىڭ ونەردەگى كۇيشى سىڭىلىلەرى مادەنيەت سالاسىنىڭ ۇزدىگى ءامينا بوشىموۆا, رەسپۋبليكالىق بايقاۋلاردىڭ لاۋرەاتى ايىم بەكباەۆا جانە قر ەڭبەك سىڭىرگەن قايراتكەرى تۇرار الىپباەۆ قاتىستى. قازاق وركەسترى دومبىرا-II توبىنىڭ كونتسەرتمەيستەرى انار مۇزداحانوۆا 1997 جىلى استانا قالاسىندا قۇرىلعان وركەستردە العاشقى كۇننەن باستاپ قىزمەت ەتىپ كەلەدى. ول – كۇيشى رەتىندە حالىق كومپوزيتورلارىنىڭ تۋىندىلارىن ەلىمىزدىڭ ۇلكەن ساحنالارى مەن شەت ەلدەردە دارىپتەپ جۇرگەن ونەر يەسى.
-كوكتەن نۇر, ساحنادا گۇل جاۋعان كەش بولدى. كيەلى ساحنا, شىمىلدىعى سىرعىپ اشىلعاندا ۇلتتىق كيىمدەگى وركەستر قۇرامىن, ولار ورىنداپ وتىرعان شىعارمانى تىڭداپ, تۇلا بويىڭ شىمىرلايدى, جان جۇرەگىڭ ەزىلىپ كەتەدى ەكەن. كۇي قۇدىرەتى, ونەر كيەسى عاجاپ قوي. تورعايدىڭ توپجارعانى, كۇيشى,سازگەر انار مۇزداحانوۆانىڭ كەشى كەرەمەت ءوتتى, – دەيدى زامانداسى, جۋرناليست ءلاززات قاپىشەۆا.
«بابالار ءۇنى» كىتابىنىڭ تەڭ اۆتورى, رەسپۋبليكالىق اسپاپشىلار كونكۋرسى 1-ءشى سىيلىعىنىڭ, «دارىن» مەملەكەتتىك جاستار سىيلىعىنىڭ لاۋرەاتى, قر پرەزيدەنتى قۇرمەت گراموتاسىنىڭ يەگەرى انار ايتبايقىزى – ەكى بالانىڭ اناسى, اياۋلى جار. تەكتىدەن تەكتى تۋادى دەمەكشى, ول – ءارى
ءان-كۇيلەرى تىڭدارمان قاۋىمنىڭ جۇرەگىنەن ورىن تاپقان كومپوزيتور, قازاقستاننىڭ ەڭبەك سىڭىرگەن مادەنيەت قىزمەتكەرى ايتباي مۇزداحانوۆتىڭ قىزى. كونتسەرت بارىسىندا ونىڭ ونەردەگى جانە ومىردەگى وسىنداي ەرەكشە جولى زامانداستارى تاراپىنان ماداقتالىپ, تالانتىن باعالايتىندار الداعى شىعارماشىلىق جولىنا تابىس تىلەدى. جاقىندا ول مادەنيەت جانە ونەر قىزمەتكەرلەرىنىڭ كۇنىنە وراي سالانى دامىتۋعا قوسقان ۇلەسى ءۇشىن استانا قالاسى اكىمىنىڭ العىس حاتىمەن ماراپاتتالعان بولاتىن.
