تورتكۇل دۇنيەنى تورىندە توعىستىراتىن ايتۋلى «ەكسپو-2017» حالىقارالىق كورمەسىنىڭ اشىلۋ سالتاناتىنا ساناۋلى كۇن قالدى. 115 مەملەكەت پەن 18 حالىقارالىق ۇيىم قاتىساتىن شارادا الەم ەلدەرى ەكونوميكا, عىلىم, تەحنيكا, مادەنيەت, ونەر جانە وزگە دە قوعامدىق سالالارداعى جەتىستىكتەرىن استانا تورىندە پاش ەتپەك.
سونىمەن, «استانا ەكسپو-2017» ۇك باسشىلارى كورمەگە دايىندىق جۇمىستارىنىڭ سوڭعى ساتىسى اياقتالعانىن رەسمي تۇردە جاريالادى. سوڭعى ايلاردا جۇرگىزىلگەن وقۋ-جاتتىعۋ جۇمىستارى مەن تەكسەرۋ شارالارى ويداعىداي وتكەن. حالىقارالىق پاۆيلونداردىڭ ىشكى-سىرتقى كورىنىستەرى بەزەندىرىلىپ, قاتىسۋشىلاردىڭ بارلىعى وزدەرىنە ءتيىستى اۋماقتى تالاپقا ساي رەتكە كەلتىرىپ قويعان. ءبارىنىڭ ۇلتتىق كۇندەرى بەلگىلەنىپ, مادەني شارالاردىڭ دا تىزبەسى بەكىتىلگەن.
كورمەنى ميلليونداعان تۋريستەر تاماشالايتىندىقتان بولار, ءاربىر ەل ءوز مادەنيەتىندەگى ۇلتتىق وزىندىك ەرەكشەلىكتەرىن تانىتاتىن جانە وزدەرىنىڭ ەكونوميكالىق جانە تەحنولوگيالىق دامۋىنىڭ دەڭگەيىن بۇكىل الەمگە كورسەتەتىن بىرەگەي پاۆيلون قۇرۋعا ۇمتىلعان. ال ءبىز ءۇشىن ەڭ ۇلكەن پايداسى – شەت مەملەكەتتەرمەن ساياسي ءھام الەۋمەتتىك ينتەگراتسيامىزدى ارتتىرىپ, ءتۋريزمنىڭ تاسىن ورگە دومالاتامىز.
كورمە تاقىرىبىنا قايتا ويىسساق. «بولاشاقتىڭ ەنەرگياسى». جاھاندىق كورمەگە ۇسىنعان تاقىرىپ جالپىعا ۇناعان. شەتەلدىك قاتىسۋشىلار ءوز پاۆيلوندارىندا بۇل ماسەلەنىڭ الەمدىك قوعامداستىقتى تولعاندىرىپ وتىرعان قازىرگى زامانعى ەڭ وزەكتى ماسەلە ەكەنىن, سونداي-اق, ەكولوگيالىق تازا, قاۋىپسىز جانە جاڭارتىلاتىن ەنەرگيا كوزدەرىن پايدالانۋدىڭ وزەكتىلىگىنە بارىنشا ءمان بەرۋدە. ەندى ەلوردامىز وسى سالاداعى ەڭ ۇزدىك الەمدىك ازىرلەمەلەر مەن ترەندتەر كورسەتۋ ءۇشىن ءتيىمدى الاڭعا اينالۋدىڭ الدىندا-اق تۇر.
«ەكسپو-2017» كورمەسىنە قاتىساتىن كەز كەلگەن مەملەكەت ۇلتتىق كۇندەرىن تويلايتىنى بەلگىلى. ولار ەلوردا تۇرعىندارى مەن قوناقتارى ءۇشىن مادەني ءىس-شارالار مەن قايتالانباس شوۋ وتكىزبەكشى. شارانىڭ شارىقتاۋ شەگىندە قاتىسۋشى-مەملەكەتتىڭ مادەنيەتى كەڭىنەن تانىستىرىلادى. اتاقتى ءارتىستەردىڭ قاتىسۋىمەن وتەتىن مەرەكەلىك كونتسەرتتەر امفيتەاتر, ەنەرگيا حولى, كونگرەسس نەمەسە ونەر ورتالىعىندا وتەدى. كۇللى الاڭ جوعارى تەحنيكالىق دەڭگەيدە جاراقتالعان. نەگىزگى كونتسەرت الاڭدارىندا دۇنيە جۇزىنە ايگىلى ديۋ سولەي تسيركىنىڭ قويىلىمدارىن تاماشالاۋعا, لۋنا-ساياباققا بارۋعا, ەتنو-قالاشىقتا ۇيىمداستىرىلاتىن قولدانبالى ونەرمەن, ۇلتتىق ويىندار جانە ادەت-عۇرىپپەن تانىسۋعا, ۇلتتىق دامنەن اۋىز تيۋگە مۇمكىندىك بەرىلەدى.
سونىمەن, ماۋسىم-قىركۇيەك ايلارى ارالىعىندا وتەتىن كورمە كەزىندە استانا دۇنيەنىڭ ءتورت بۇرىشىنان كەلگەن ەلدەردىڭ مادەنيەتى توعىسقان كەزى رەتىندە تاريحتا قالاتىن بولادى.
بەيبىت قارىمساقوۆ,
«استانا ەكسپو-2017» ۇك باسقارۋشى ديرەكتورى:
– ءبىزدىڭ ماقساتىمىز – كورمەنى جوعارى دەڭگەيدە وتكىزۋ. ساناۋلى كۇننەن كەيىن حالىقارالىق كورمە ءوز جۇمىسىن باستايدى. بارلىق نىساندار دايىن. كورمە اۋماعىندا اباتتاندىرۋعا قاتىستى از عانا شارۋالار قالدى. جالپى, سوڭعى بىرنەشە ايدا جۇرگىزىلگەن بارلىق وقۋ-جاتتىعۋلار مەن دايىندىق جۇمىستارى ءساتتى ءوتتى.
داۋلەت ەركىمباەۆ, كوممەرتسيالاندىرۋ دەپارتامەنتىنىڭ ديرەكتورى:
– ءبىز, ەڭ الدىمەن, ۇلتتىق كومپانيا مەن مەردىگەر ۇيىمدارعا تەگىن بيلەت تاراتۋ ارقىلى تۋرنيكەت جۇيەسىنىڭ قىزمەتىن تەكسەردىك. بۇگىندە 1 ميلليون 200 مىڭعا جۋىق بيلەت ساتىلدى. بۇل ءوزىمىز جوسپارلاعان كورسەتكىشتەن اسىپ ءتۇستى. ويتكەنى كورمەنىڭ اشىلۋى كەزىندە ارى كەتكەندە 1 ميلليون ساتىلادى دەپ جوبالاعانبىز. بەلگىلى بولعانداي, جوسپارىمىز 20 پايىزعا ارتىعىمەن ورىندالدى.
يليا ورازاقوۆ, حالىقارالىق قاتىسۋشىلارمەن جۇمىس
دەپارتامەنتىنىڭ ديرەكتورى:
– كورمەگە قاتىسۋشى ەلدەردىڭ پاۆيلوندارى تولىعىمەن دايىن دەپ ايتۋعا نەگىز بار. تەك شري-لانكا, پاكىستان, بەلارۋس, سلوۆاكيا, ارگەنتينا سەكىلدى ەلدەر ءبىر-ەكى كۇن ىشىندە ارلەندىرۋ جۇمىستارىن اياقتايدى. ءبىز حالىقارالىق قاتىسۋشىلاردىڭ قۇرامىن ۋاقىتىندا جاساقتادىق. قازىرگى ۋاقىتتا ءاربىر پاۆيلوندا 30-150 ارالىعىندا قىزمەتكەر جۇمىس ىستەيدى.
رۇستەم شاكەنوۆ,
قاۋىپسىزدىك دەپارتامەنتىنىڭ ديرەكتورى:
– بۇگىندە كورمە اۋماعىندا بەينەباقىلاۋ, دابىل جۇيەلەرى جانە كىرىپ-شىعۋدى باسقاراتىن قۇرال-جابدىقتار تۇگەل ورناتىلىپ, تەكسەرىلدى. قاۋىپسىزدىكتى قامتاماسىز ەتۋمەن اينالىساتىن قۇقىق قورعاۋ جانە كۇزەت قىزمەتكەرلەرى قاجەتتى دايىندىق كۋرستارىنان جانە شەت تىلدەرىن مەڭگەرۋدەن ءوتتى. سونىمەن قاتار, جەكسەنبىلىك توپتارعا بارىنشا نازار اۋداردىق. ولار ءبىر ساعاتتىڭ ىشىندە 13 مىڭ ادامدى قابىلداي الادى. كۇتۋ ۋاقىتى 30-40 مينۋتتان اسپايدى.
دياس ازبەرگەنوۆ,
سەرۆيستىك قامتاماسىز ەتۋ دەپارتامەنتىنىڭ ديرەكتورى:
– قوعامدىق كولىكتەر, ۋاقىتشا اۆتوتۇراقتارعا قاتىستى بارلىق ماسەلەلەر قالالىق اكىمدىكپەن بىرلەسىپ اتقارىلۋدا. ال كەلۋشىلەر ءۇشىن كورمە اۋماعىندا قىزمەت كورسەتۋگە 7 مەديتسينالىق بەكەت جاساقتالدى. 8 جەدەل جاردەم كولىگى تۇراقتى تۇردە كەزەكشىلىك اتقارادى. جۇمىلدىرىلعان مەديتسينالىق قىزمەتكەرلەردىڭ سانى – 210.
مارات وماروۆ, كونتەنت جانە ءىس-شارالاردى
ۇيىمداستىرۋ دەپارتامەنتىنىڭ ديرەكتورى:
– بارلىق مەرەكەلىك شارالاردى جۇيەلى ۇيىمداستىرۋ – مىندەت. كورمە كەزىندە مادەني ءىس-شارالار ۇلتتىق كۇندەر, ەنەرگيا حولى جانە امفيتەاتر الاڭدارىندا وتەتىن بولادى. وعان قاجەتتى بارلىق تەحنيكالىق جابدىقتار ورناتىلدى, ارتىستەر دە ساقاداي ساي.
اللەن ءشايجۇنىسوۆ,
دامىتۋ جانە تۋريزم دەپارتامەنتىنىڭ ديرەكتورى:
– ەلىمىزدىڭ ءار قالاسىنان كەلگەن ەرىكتىلەر توبى استاناعا كەلىپ جەتتى. جالپى, 4500 ەرىكتىنى ىرىكتەپ الدىق. قاراعاندى, قوستاناي, پاۆلودار وبلىستارى مەن الماتى قالاسىنان 800 ەرىكتى قاتارعا قوسىلدى. كۇن سايىن كورمە اۋماعىندا 1500 ەرىكتى جۇمىس ىستەيدى. ولاردىڭ بارلىعى ءۇش اۋىسىمعا بولىنەدى.
گۇلميرا
ايماعانبەت
